Salmos 115 - Kashibo-Kakataibo Biblia

Nukën ꞌIbu Dios naínu ꞌikë an ka ꞌashi rabikin bëtsi ñu rabiti kuëënima kikë bana

¹ Nukën ꞌIbu Dios nukamax kananuna rabikë ꞌitima ꞌain min anëx kuni ka rabikë ꞌiti ꞌikën, usa ꞌain kananuna nux rabikë ꞌitima ꞌain; ¡Mix kamina nuibanankëira ꞌianan asérabi min ñu ꞌakë a kupín rabikë ꞌiti ꞌain!

² ¿Uisa kupín kara numi kuaikin ñu ꞌatima ꞌakë unikaman uinu kara nun Dios ꞌikë kixun nu ñukáti ik?

³ Nun ꞌIbu Dios ax ka naínu ꞌikën; usa ꞌixun ka añu kara ꞌaisa tania akamabi ꞌakëxa.

⁴ An Diosan bana kuakëma unikaman rabikë ñukama ax ka kuri ꞌimainun manë uxua usakin ꞌati sinánxua, unínbi aín mëkënan uniokë ꞌikën:

⁵ Usa ꞌaish ka kuëbíñu, ꞌaishi banaima ꞌianan; bëruñu ꞌixunbi isima;

⁶ ꞌianan ka pabiñu ꞌixunbi, bana kuatima; ꞌianan ka rëkinñu ꞌixunbi anun ñu xëtima;

⁷ ꞌianan ka mëkënñu ꞌixunbi anun añu ñubi mëima; ꞌianan ka taëñu ꞌaíshbi anun nitsima; ¡usa ꞌaish ka achúshi banarabi aín tërunuax chikítima!

⁸ Usaribi ka an a ñukama uniokëma a ꞌimainun an a ñukama rabikë unikama ax ꞌikën.

⁹ Israel unikama, ¡mitsux kamina Diosmi katamëti ꞌain! An ka ꞌakianan nu bërúaia.

¹⁰ Sacerdotekama, ¡mitsúxribi kamina Diosmi katamëti ꞌain! An ka nu ꞌakianan bërúaia.

¹¹ Mitsux Dios rabikë ꞌixun kamina, ¡ami katamëkin ashi rabiti ꞌain! An ka nu ꞌakianan kamabi uniribi bërúaia.

¹² ¡Diosan ka numi sinánkin nukama upíokin sinánxunti ꞌikën! ꞌIanan ka Israel unikamaribi upíokin sinánxuanan, sacerdotekamaribi upíokin sinánxukin ka

¹³ an a rabikë unikamaribi uisa uni kara ꞌikëbi, kushi uni ꞌimainun kushima uni akama upíokin sinánxunti ꞌikën.

¹⁴ ¡Usa ꞌain ka kuëënun Diosan mitsu ꞌimainun mitsun bakë bëchikënën, rëbúnkikama ꞌaisamaira ꞌinun kaínun ꞌimiti ꞌikën!

¹⁵ ¡ꞌËn kana kuëënin Dios an me, ꞌimainun naí kamë ꞌëo unio an ka upíokin sinánxunkin mitsu ꞌakinti ꞌikën!

¹⁶ Naí kamë ꞌëo ax ka Nukën ꞌIbunan ꞌikën, ꞌimainun ka uni ainan ꞌinun me ꞌinánkëxa.

¹⁷ Axa ñukë unikaman ka Dios rabikasmati ꞌikën, anua atux ꞌikë anuax ka uíxbi banaima;

¹⁸ usa ꞌaínbi kananuna ñukëma pain ꞌixun nukaman kuni, xënibua ꞌaínbi bëríbi Dios rabiti ꞌain ¡Usa ꞌain ka axëshi rabikë ꞌiti ꞌikën!