Salmos 105 - Kashibo-Kakataibo Biblia

Diosan Israel unikama ꞌakian ꞌikë ñuikë bana

¹ Nukën ꞌIbu Dios kananuna aín anë ñuikin rabiti ꞌain; usa ꞌain kamina kamabi ëmanu ꞌikë unikama an ꞌakë ñukama ñuixunti ꞌain.

² Anun kantakin kamina rabiti ꞌain. ¡ꞌImainun kamina an ñu chabu ꞌa akama ñuikanti ꞌain!

³ Aín anë upíira a sinani kananuna rabikanti ꞌain. ¡Bëtsi Dios nun rabikë usaribi ka ꞌaíma ꞌikën, usa ꞌain ka aín nuitu upitani an Dios rabikë unikama kuëënti ꞌikën!

⁴ Nukën ꞌIbu Dios kamina ax kushiira ꞌikë barikanti ꞌain; usakin ꞌakin kamina kamabi nëtën Dios barikanti ꞌain.

⁵ ꞌImainun kamina an ñu chabu ꞌa a ꞌianan aín bana sinánti ꞌain;

⁶ mitsux kamina aín uni Abraham aín rëbúnkikama ꞌianan, Jacob an kaisa aín bakë bëchikëkama ꞌain, usa ꞌixun kamina ꞌëx kia kuati ꞌain.

⁷ Ax ka nun ꞌIbu ꞌianan nun Dios a ꞌikën; ¡Usa ꞌikë ka kamabi menuxun aín bana ꞌunánxa!

⁸ Usa ꞌixun ka uiti baribi kara inúa ꞌaínbi, axa usakin ñu ꞌakatsikikin achúshi ñu mënio ꞌa banakama a manutima ꞌikën,

⁹ ꞌianan ka usakin ñu ꞌaxunuxun achúshi ñu mëníokinun Abraham kakin abëtan ꞌa ꞌixun, Isaac asérabi katëkënxuma ashikin kakëxa,

¹⁰ ꞌimainun ka a tanti bana a Jacob ꞌaxuankëxa, ꞌaxuanan ka uínsaranbi a manutima okin achúshi ñu mëníokin Israelkama ꞌaxuankëxa,

¹¹ usa ꞌain ka ësai kiakëxa: ꞌËn kana Canaán kakë me bëtsinanpan ꞌiá ꞌaísha ainan ꞌitánun ꞌinánti ꞌai kiakëxa.

¹² Atux ka ꞌitsama unishi ꞌiakëxa usa ꞌaish ka bëtsi menu ꞌikë ꞌaish kuainbëkinishi nikë ꞌiakëxa,

¹³ usa ꞌaish ka bëtsi menu ꞌitankëx bëtsi menuribi ꞌianan, bëtsi ëmanu ꞌitankëx bëtsi ëmanuribi kuani niakëxa,

¹⁴ Usai ꞌikëbëtan ka uínbi atu ubionun Diosan ꞌamiama ꞌikën ꞌianan ka ꞌapukamanribia uisabi atu oxuma ꞌanun ꞌamiama ꞌikën:

¹⁵ ꞌËn kaískë unikama ꞌatima oxuma ꞌanan kamina an bana ñuikë ꞌën unikamaribi uisabi otima ꞌai kixun ka ꞌapukama kakëxa.

¹⁶ ꞌIanan ka, a menua numi chaiira ꞌinun, ꞌimikin atun piti ñu ꞌaíma ꞌinun ꞌimiakëxa.

¹⁷ ꞌAínbi ka Diosanbi an atu ꞌakinun José, aín xukë́nkama ami nishkin marua ꞌixunbia atu ꞌakinun ꞌimiakëxa.

¹⁸ Egiptonu ꞌikë unikaman ka tëmëramikin manë risin tëkërëkaxun; sipunu ꞌinun ꞌimiakëxa.

¹⁹ Axa kia nëtë́a sënë́ntamainun ka Diosan José usakin pain tëmëramiakëxa, usakin ꞌaxun ka a nëtë sënë́nkëbëtan asérabika ꞌëx usai kia bana sënë́anxa kixuan ꞌunánun ꞌunánmiakëxa.

²⁰ Usai ꞌikëbëtan ka kamabi ëmakamanu ꞌikë unikaman ꞌapu, an José sipunua chikínun aín unikama ꞌamiakëxa;

²¹ usakin ꞌaxun ka, kamabi unikaman ꞌapu ꞌinun ꞌimianan, an kamabi aín xubunu ꞌikë ñukamaribi isti anëakëxa,

²² usakin ꞌakëxun ka an ꞌapu ꞌakinkë ꞌimainun aín unikama aturibi usaía sinánñuira ꞌiti banakama aribi ꞌunánmiakëxa.

²³ Usai anu ꞌia ka Diosan Jacob, ꞌikëbi Israel kakë ax, bëtsi menuax Egipto menua ꞌikë Cam kakë me anu tsóti kuakëxa.

²⁴ Usai ꞌia ka Diosan ꞌaisamaira ꞌia ꞌuakamë ꞌëonun an kaískë unikama ꞌimiakëxa, usakin ꞌimikin ka egipcio unikamasamaira ꞌia kushiirabu ꞌinun ꞌimiakëxa.

²⁵ Usa ꞌaínbi ka egipcio unikaman Diosanbi atumi nishkian ain unikama ꞌatima onun kixun sinánmiakëxa, usokëxun ka Diosan kaískë unikama a atumi nishkin bëtsi bëtsi okëxa.

²⁶ Usa ꞌain ka Diosan aín uni Moisés, ꞌimainun Aarón an ꞌakintia kaískë uni a xuakëxa,

²⁷ atun ka Diosan ꞌamikëxun anu uni ꞌikëma me anuxun: ¡unin isáma ñu chaiirabu Egipto me Cam kakë anuxun ꞌakëxa!

²⁸ ꞌAkin ka Diosan bëánkibukë chaiira an anu ꞌibúkin a me mapunun ꞌamiakëxa usakin ꞌakëbëtanbi ka egipcio unikaman atun kakëxun aín bana kuaisama tankëxa.

²⁹ Usakin ꞌanan ka anua ꞌikë baka kamanua ꞌikë ꞌumpaxkamaribi imi ꞌikëbëa, bakanu ꞌikë ñukama këñunun ꞌimiakëxa;

³⁰ ꞌimianan ka ꞌaisamaira ꞌashá kamabi Egipto menu uninun ꞌimiakëxa, usakin ꞌimikëx ka ꞌapun xubu ꞌukëmëu anua ꞌuxkë anubi ꞌashá atsíankëxa.

³¹ Usakin ꞌimiax ka Dios kiakëxa chipë ꞌimainun sëbë ka uniti ꞌikën kikëbëa, nëtë kuin tunankuatsini ukësa usaribi kuatsini ukin egipcio unikaman me tsitsirunun ꞌimiakëxa.

³² ꞌImainun ka Diosan ꞌuñe ꞌibúnun ꞌimikinma, matsin tita bëruñu ꞌibúnun ꞌimianan ka, mëríru mëriruia tsi ëxku iskësai kaná a menu ꞌibúnun ꞌimiakëxa.

³³ Usai ꞌikin ka uvas ꞌapákëkama ꞌimainun higuera ꞌapakëkamaribi këñuakëxa; ¡ꞌanan ka Egipto menu ꞌikë i kamaribi masókëxa!

³⁴ Usakin ꞌanun ꞌamitankëxa Dios kikëbë ka ꞌaisamaira champu uakëxa; ¡usa ꞌaish ka nun tupun tupun kaisamaira ꞌiakëxa!

³⁵ ¡Usa ꞌixun ka a champukama kamabi ninu ꞌikë i pëchikama këñukin pianan, kamabi menu atun ñu ꞌapákë akamaribi këñukin aín pëi piakëxa!

³⁶ ¡Usakin pain ꞌamitankëxun ka Egipto menubi ꞌikë, unikaman rëkuë́n bakë bëchikëkamaribi këñunun ꞌimiakëxa!

³⁷ Usakin pain ꞌatankëxun ka Diosan ain unikama kuri ꞌimainun manë uxua buania chikinun ꞌimiakëxa, usakin ꞌimikëx kuani ka uinu ꞌikë ñaká achúshinu ꞌikë unixi tsiankianima kuankëxa.

³⁸ Kuania atu isi ka egipcio unikama kuëënkankëxa, amira atux rakuëkankëxia Israel unikamax kuania isi ka kuëënkankëxa.

³⁹ Diosan ka a isbiania kuanti nëtë kuin atu manámi ꞌimianan, tsi rëkirukësa ꞌixuan pë́kakëbë imë́ kuankanti aribi ꞌimiakëxa.

⁴⁰ ꞌIanan ka atun pitia ñukákëxun ꞌumpanxonëmë ꞌëo këñun, naínu ꞌikë piti aribi ꞌinánkëxa ꞌinánkëxun pi ka pananima puchacëshi ꞌikankëxa.

⁴¹ ꞌImainun ka mapara panarabëkëbë anuax ꞌumpax chikíakëxa chikiti ka anu uni ꞌikëma memi ki baka rarasa ꞌinun ꞌumpax rakakëxa.

⁴² Usakin ꞌakin ka Diosan uínsaranbi manukinma usakin ñu upí ꞌaxunuxua, aín uni Abraham ka a sinánkëxa.

⁴³ Usakin ꞌakian Diosan chikinkëx ka aín unikama, munuma kuëëni sharákin rabibiani chikikankëxa,

⁴⁴ ꞌimainun ka bëtsi menu ꞌikë unikaman me atu ꞌinánan, atun ñu ꞌapákë akamaribia binun ꞌinánkëxa,

⁴⁵ usakin ꞌakëxuan a tanti banakama ꞌimainun, an ꞌunánmikë banakama kikësabiokin ꞌanun ka usakin ꞌakëxa. ¡Usa ꞌain kananuna ashi rabiti ꞌain!