Salmos 104 - Kashibo-Kakataibo Biblia

Nukën ꞌIbu Dios an kamabi ñu unio a rabiti bana

¹ ¡ꞌËn ꞌIbu Dios kana ꞌën kushibëtanbi rabiti ꞌain! ¡Mix kamina chaiira ꞌianan ꞌën Dios ꞌain! Usa ꞌaish kamina min kushi chaba chaba kikë anun rabumëkësa ꞌain;

² ꞌianan kamina tirítan pëkakë chupan rabumëkësaira ꞌain. ¡Min kamina chupa pëninkësa usa okinshi naí kamë ꞌëo uniokën!

³ ¡Min kamina naínu ꞌikë baka nëbëtsi anu min xubu ꞌati ain itá nitsiankën! Usakin ꞌanan kamina nëtë kuin aribi min caballonën nikinkë usaribi ꞌinun ꞌimia; ¡anun kuani kamina suñun pëchinu ꞌirukiani kuankësa kiani kuanin!

⁴ Usa ꞌain ka suñukama axbi an min bana ñuikë ꞌikën, ꞌimianan kamina kanákamë ꞌëo mërirukë abi an mi ñu mëëxunti ꞌimiakën.

⁵ Min kamina me aín tapunmibi bikin uniokën, anuaxa uínsaranbi shaíkitima okin.

⁶ Parúmpapa baka nëmin an ka me mapuakëxa, achúshi chupan mapukësa ꞌinun. ꞌImainun ka ꞌumpaxan kamabi ain bashikama mapukë ꞌiakëxa.

⁷ Usa ꞌikëbi min munuma banakin kakëx ka, parúmpapa ꞌumpax ëskikiani amo rakarakëaxa; usai ka bënëtishi mix kaná kamë ꞌëo banakësai ꞌikin kakëxun min bana kuatishi ꞌiakëxa.

⁸ Usai ꞌika aín bashikama mapukë ꞌimainun me sapankama axribi ë́skibutanun, anu sënën rakatimi sinánxunkë anubi rakarakëaxa,

⁹ usa ꞌain kamina min uínsaranbi anuax, me mapurutëkëni ꞌëtëkënima anubi ꞌitiokin ꞌimiakën.

¹⁰ Min kamina xëxá ꞌumpaxkama aín bashinuax kuania, baka chami xobuti saënun ꞌimin.

¹¹ A ꞌumpax ka ñuina raëkëmakama an xëaia; ꞌamainun ka ninu ꞌikë ñuinakama atúnribi shimaxun xëaia.

¹² ꞌImainun ka a bakakama kuëbi axa nuánkë ñuina pëchiukaman atun na ꞌaia; ¡usakin ꞌatankëx ka i pëñankama aín xama manánuax tsótax banaia!

¹³ Min kamina mekama, chabotanun mananuaxa, ui ꞌibútanun ꞌimin; usokëbë ka menu ꞌikë ñukama chabáti upiti koia.

¹⁴ Usakin ꞌanan kamina ñuina kaman piti basi koonun ꞌimianan, unin ꞌapáxun mëníokë ñukama aribi, aín bimi piínua menuax tuatanun ꞌimin,

¹⁵ usakin ꞌaia ain bimi pi kushiirabu ꞌianan ka uvas baka xëai kuëëni, ain bëmánan upí ꞌinun ꞌikë ax xënin ꞌikësamaira ꞌinun chábachábaki ꞌia.

¹⁶ Nikama ꞌimainun ka Líbano menu ꞌikë kunxankama, Diosanbia unimia akamax ꞌumpaxan chabókë menu ꞌikën.

¹⁷ A ikamanu ka ñuina pëchiñu chukúma an aín na ꞌaia, ꞌimainun ka pino kakë ikama ain pëñanu cigüeña kakë ñuina pëchiñu chabu akamaxribi ꞌia.

¹⁸ Usai ꞌimainun ka aín bashi manankama anu cabra raëkëmakama ax bukuia, ꞌimainun ka mapara kininu marisa ñuina raëkëmakama ax unëtia.

¹⁹ Min kamina ꞌuxë an imë́ pëkakë a uínsaran kara ꞌuxëkama isitia akama ꞌunánti ꞌakën; barin ka uínsaran kara xupibuti bë́ankiti ꞌikë a ꞌunánxa.

²⁰ Bari kuabuti xupibuti bëánkibukë ka ninuax ñuinakama ax tsuákibutia.

²¹ ꞌImainun ka paru ꞌinúan aín piti ñuina bitankëx kuëëtia; usai ꞌikin ñukákëxun ka Diosan aín piti ꞌinania.

²² ꞌAínbi ka barin urukin pë́kabëtsinkëbë, anua ꞌikë aín kinikamanu rikiantankëx anu ꞌuxi rakabutia.

²³ Usa ꞌain ka unin xabakuatsinkëbë nirutankëxun, aín ñu mëëti ꞌakin bari xupibuti kuabutamainun ꞌaia.

²⁴ ¡Uiti ñukamaira kaina mix Dios ꞌixun ꞌakën! A ñukama kamina mix sinánñuira ꞌixun ꞌakën; ¡usa ꞌain ka kamabi menu min ꞌa ñukama ꞌikën!

²⁵ Anu ka parúmpapa naxbaira ꞌianan ënën menma kuani bëchunkë ax ꞌikën, usa ꞌain ka nun tupuntisamaira ñuina chabu ꞌimainun chukúmaratsubu axbi anu ꞌia;

²⁶ anun ka manë nunti chaiirabu ax kuania, ꞌimainun ka bëtsi ñuinakan ꞌëo min unio akamaxribi anu ꞌia, abë ka anu ꞌikë ñuinakama atux kuaia.

²⁷ A ñuinakamax ka min kakësoishi ꞌia, usa ꞌain ka a ñuinakaman anunmi aín piti nëtë ꞌikëbëtan piti ꞌinánti ashi kainia.

²⁸ Usai ꞌikin ka min ꞌinánkëxun atun piti; mëkënan ꞌakësokin bixun piti upíirabu a puchákin pia;

²⁹ ꞌianan ka mixmi ami kasuakëkëbë rakuëtan bamai, ꞌianan minmi anun uinti ꞌinankëmax bamai amiribishi me putu ꞌitëkënia.

³⁰ ꞌAínbi ka minmi anun uinti suñu ꞌinan, ꞌaínbi kamina minmi unio ñukama raíri këñukiantamainun, axa bërí unikëkama aribi anúan uinti suñu ꞌinanin.

³¹ ¡Usa ꞌain ka Nukën ꞌIbun kushi ax uínsaranbi këñutima ꞌikën! ¡Nukën ꞌIbu ax ka an unio ñukama a isi ꞌitsaira kuëënia!

³² An iskëx ka mekama bërëi shaíkia; ꞌimainun ka aín bashikamanuax an mëëkëx ꞌikësa ꞌinun kuin niruia.

³³ ꞌËx tsókëpan ꞌaish kana; anun kantati akë anun ꞌën ꞌIbu Diosmi kantati ꞌain.

³⁴ ꞌËn kana Nukën ꞌIbu ꞌën sinanën asabika kain; usa ꞌain ka Dios an ishi ꞌë kuëënun ꞌimia.

³⁵ ¡ꞌUchañu unikama ax ka ënë menuax nëtë́ti këñuti ꞌikën! ¡Usaia atux ꞌimainun ka an ꞌatima ñu ꞌakë unikama atúxribi ꞌaíma ꞌinun këñuti ꞌikën! ¡Usa ꞌain kana Nukën ꞌIbumi upíokin sinani ꞌën kushibëbi kantati ꞌain! ¡Ësokin kananuna Dios rabiti ꞌain! ¡Usa ka ꞌiti ꞌikën!