Salmos 103 - Kashibo-Kakataibo Biblia

Nukën ꞌIbu ka nun kushibëtanbi rabiti ꞌikë kikë bana

¹ ꞌËn kana Nukën ꞌIbu Dios ꞌën kushibëtanbi rabiti ꞌain; ꞌanan kana ꞌën kushibëtanbi aín anë upíira a rabiti ꞌain.

² ꞌËn kana Nukën ꞌIbu Dios ꞌën kushibëtanbi rabiti ꞌain; usakin ꞌakin kana kamabi ñu ꞌë ꞌakinkë a manukinma sinánti ꞌain.

³ An ka ꞌën ꞌatima ñu ꞌakëkama tërënxunkin ꞌë mëníoxuanan, kamabi ꞌën ꞌinsínkëkama ꞌë pëxkuxunia,

⁴ an ka ñutisa ꞌikëbi ꞌë nuibairakin ië́mia, ax nuibanairakë ꞌixun kamabi ñu upíokin ꞌanun ꞌë nuibatia,

⁵ ꞌanan ka kamabi ñu upíbu ꞌë ꞌinania ꞌianan ka ꞌë bënátëkëni tëtëkamë ꞌëo ain rani rëukubutankëx amiribishi ꞌirutëkënkësa usairibi ꞌi ꞌëx kushi ꞌinun ꞌë ꞌimia.

⁶ Diosan ka asérabi upí ñu ꞌaxunkin, axa bëtsin ꞌatimokëx tëmërakë unikama ꞌakinia.

⁷ Usa ꞌixun ka Moisés ꞌimainun Israel unikama uisa ñu atu ꞌaxunti kara kuëënia kixun ꞌunánmiakëxa.

⁸ Dios an ka nuibanairakë ꞌixun; bënëtishi nishkima munu ñu ꞌaia.

⁹ Usa ꞌixun ka nukama kamabi nëtëinra usakin kamina ñu ꞌatima ꞌai, kixun nu kai numi xënibuti nishima, bënëtishi aín nishkë nëtë́tia;

¹⁰ usa ꞌixun ka nukama ꞌatima ñu ꞌai ami ꞌuchaiabi a sinánkin nu ꞌatimaira okin, tëmëramiti ꞌixunbi nu ꞌamá ꞌikën;

¹¹ ꞌimainun ka uikaman kara ax kikësabiokin ꞌaia a unikama nuibakë ax chaiira ꞌikën, usa ꞌaish ka naí ꞌimainun mebëtan sënë́nsaira ax nuibanankë ax ꞌikën.

¹² ꞌIanan ka nux ꞌuchakëkamaribi; nunua ꞌuramikin, bëtsibëa me kuainakëti ꞌurakë usaribi ꞌinun ꞌimiaxa.

¹³ Uikaman kara a nuibakin ax kikësabiokin ꞌaia, a unikama ka Diosan unían aín bakë bëchikëkama ꞌakësaribi okin nuibatia;

¹⁴ usa ꞌixun ka Diosan ꞌunánxa, añu ꞌá karanuna ꞌai kixun: an ka upíokin ꞌunania nux kananuna me putu ꞌakë ꞌai kixun.

¹⁵ Unin tsóti ax ka xubi koibia chushikë usashi ꞌikën; ꞌianan ka ninu ro uá urukë iskë usaribi ꞌikën:

¹⁶ usa ꞌikëa suñun kushi bëkikin masókëx ka nëtë́tia usai ꞌiaka, unin uisai kara ꞌiaxa kixun ꞌunanima.

¹⁷ ꞌAínbi ka Diosan unikama nuibakë ax usabi nëtë́tima oi ꞌia, uikaman kara ax kikësabiokin ꞌaia a unikama; ꞌianan ka uin kara an kakësabiokin ꞌaia a nuibanan aín rëbúnkikamaribi aín chaitikama ꞌasaribiokin bëríbi nuibatia,

¹⁸ ꞌanan ka uikaman kara an achúshi ñu mënio ax kikësabiokin a bana tankin ꞌanan ax kikësabi oi ꞌiti aín bana a manukima ꞌaia a unikama nuibatia.

¹⁹ Nukën ꞌIbu Dios ax ka naíkamë ꞌëo anu ꞌapuira ꞌikën, usa ꞌaish ka ax kamabi ñukaman ꞌibuira ꞌikën.

²⁰ ¡Anu uxun ka aín ángel kushiirabu an Nukën ꞌIbu Dios rabiti ꞌikën! Mitsun kamina an kakësabiokin ꞌanan, uisakin ñu ꞌanun kara mitsu kaia usakin ꞌaxunti ꞌain.

²¹ ¡Anu uxun ka aín suntárukaman ꞌupiokin sinánkin Nukën ꞌIbu Dios rabiti ꞌikën, ñu mëëxuanan an kuëënkësa okinshi ꞌaxunti ꞌikën!

²² ¡Anu uxun ka Nukën ꞌIbu Dios kamabi ñu an unio ꞌianan, kamabi bëtsi menu ꞌikë unikaman a rabiti ꞌikën! ꞌËn kana Nukën ꞌIbu Dios ꞌupiokin sinánxunkin ꞌën kushibëtanbi rabiti ꞌain.