Salmos 100 - Kashibo-Kakataibo Biblia

Nukën ꞌIbu Diosan ka ainan ꞌinun nu uniokëxa ki kantati bana

¹ ¡Nukën ꞌIbumi ka kuëëni kantakan, kamabi menu ꞌikë unikama!

² Kuëënkin ka Nukën ꞌIbu rabikan; ¡usai ꞌika munuma banai kuëëni kamina anuxun a rabiti xubunu rikuatsinkanti ꞌain!

³ Usai ꞌikin kamina upíokin Nukën ꞌIbu ax ka Dios ꞌikë kixun ꞌunánkanti ꞌain; an ka nu uniokëxa usa ꞌaish kananuna ainan ꞌain; nux kananuna ain unikama ꞌain, ¡usa ꞌikë ka unían ain ñuina ꞌarakakësa usaribi ꞌikë nu bërúaia!

⁴ Anuxun a rabiti xubu ain xëpútikama anu kamina rikuatsinti ꞌain, rikuatsini kamina anun rabi kantati aín bana anun kantakin rabikin asábi ka ¡kakin upíokin sinánkin aín anë rabiti ꞌain!

⁵ Nukën ꞌIbu Dios ax ka upíira ꞌikën; an uni nuibakë ax ka bërí ꞌa ꞌixunma nu nuibakë ꞌikën, ꞌianan ka an upí ñubu ꞌa ax uínsaranbi këñutima oi ꞌia ꞌikën.