Rut 4 - Kashibo-Kakataibo Biblia

Booznën Rut xanuo ñuikë bana

¹ Usai ꞌikë basikëbë ka Booz kakë uni ax anun ëmanu atsínti xëkuënu tsóti kuankëxa, ax ka anuaxa uni timë́ax banakë ꞌiakëxa. Anua tsótanbi ka a ñuia Booz kikë aín aintsi ax inúakëxa. Inutiabi ka Booznën kuënkin kakëxa: —Ënupan ka tsóbuti ut kixun. Kakëx aí ka aín aintsi ax tsóbuakëxa.

² Tsóbukëbëtan ishi ka Booznën mapai rabë́ uni apanbu a ëmanu ꞌikë kuëankëxa, kuënkë́xa aia ka a rapasu tsóbunun kixun kakëxa. Kakë́xa atux tsóbukëbëtan ka

³ Booznën aín aintsi a kakëxa: —Noimíka Moabnuax utëkëanxa, usa ꞌixun ka nun aintsi Elimélec aín me ꞌia a maruti sinánxa.

⁴ ꞌËn kana ësokin minribimi ꞌunánun mi kain, min marutisa tankin kamina ꞌati ꞌain, usa ꞌain kana bërí ënë ëmanu ꞌikë aín kushibu ënëkaman kuamainunbi mi kain. Mix kamina Elimélecnën aintsi ꞌibu ꞌain, usa ꞌixun kamina min a me marutisa tankin maruti ꞌain. Min ꞌaiama kana ꞌën maruti ꞌain, usa ꞌain kamina ꞌën ꞌunánkë ꞌinun ꞌë kati ꞌain, mi ꞌimainun ꞌëxëshi kana a me maruti asábi ꞌain. Kakëx ka aín aintsi ꞌibu ax kana maruti ꞌai kiax kiakëxa.

⁵ Usai kia ka Booznën ësokin kakëxa: —ꞌAínbi kamina ꞌunánti ꞌain Noemí aín me marukin kamina moabita xanu kasunamëkë Rut aribi min xanu ꞌinun biti ꞌain, usakinmi ꞌakëbë ka axa ñukë uni aín me ax aín anën ꞌakë ꞌiti ꞌikën.

⁶ Ësokin kakëxun kuakin ka aín aintsin kakëxa: —Usa ꞌain kana a me marutima ꞌain, a me marukin ꞌën kuríkinën ñankáishi kupíotima kupí kana bitima ꞌain. ꞌËn bakë bëchikë kamanbi ka anun ꞌën kupíokë kuríki aín kupí bitëkëntima ꞌikën. Usa ꞌain kamina min marutisa tankin maruti ꞌain; ꞌën kana minmi ꞌën ꞌakësa ꞌinunmi marunun mi kain.

⁷ Bërámabi ka Israelkama bëtsi ñu ꞌinani usaibi ꞌikë ꞌaish ꞌiakëxa: usa ꞌain ka aín aintsi ainan ꞌikë ñu ꞌinani ꞌianan, bëtsi ñu marukin sënë́onxun ꞌinani ꞌianan, ainanbi ꞌinua a marukë ñu a bëtsi ꞌinánkin aín taxaka amo ꞌikë ëchíkin bëtsi ꞌinánkëxa, usakin ka atux usai ꞌikë ꞌixun usabiokin ꞌakëxa,

⁸ aín aintsi an ka aín taxaka táchikikin bikin ꞌinánkin Booz kakëxa: —Min kamina maruti ꞌain.

⁹ Usakin ꞌinánkëxun ka Booznën anua ꞌikë uni apanbu ꞌimainun abë ꞌikë unikama kakëxa: —Mitsúnbi kamina ꞌunánin ꞌën kana Noemínën me Elimélec Quilión ꞌimainun Mahlónën me ꞌia a maruti ꞌain.

¹⁰ ꞌImainun kana mitsun ismainunbi Rut moabita xanu raëmëkëa aribi ꞌën xanu ꞌiti biti ꞌain, usa ꞌain ka a me ꞌën bikëbë aín bënë Mahlón ñua aínbi aín anë ñunuax nëtë́tima ꞌikën, ꞌianan ka uisaxunbi ënë ëmanuxun manukë ꞌitima ꞌikën. Bërí kamina mitsúnbi usakin ꞌaia isin.

¹¹ Ësai kia ka anu ꞌikë ꞌapukama ꞌimainun anua timë́kë unikama atúnribi kakëxa: —Usa ka nunbi kananuna ꞌunanin. ¡Usa ꞌain ka min xanu ꞌiti Rut a Nukën ꞌIbun Raquel ꞌimainun Lía ꞌasaribiokin ꞌakinti ꞌikën, ꞌakinkëxun ka ꞌitsaira tuapakëxa usa ꞌain kananuna israel unibu ain rëbúnki nux ꞌain! ꞌImainun kananuna mixmi bëtsi uni kamasamaira ꞌianan upí sinánñu ꞌain Efrata kakë ꞌikëbi Belén kakë ëma ënu ꞌiti kuëënin.

¹² Usa ꞌain ka Nukën ꞌIbun a mi bikë xanu ënëmi ꞌitsaira bakë bëchipanun mi ꞌamiti ꞌikën. Usakin ꞌimikëbë ka ꞌaisamaira min aintsikama ꞌiti ꞌikën, Tamarmia Judá kakë uni aín bëchikë Fares ainan ꞌiásaribiti.

¹³ Usa ꞌain ka anuan biti nëtë sënë́nkëbëtan Booznën aín xanu ꞌinun Rut biakëxa. Bitankëxa abë ꞌiaka Nukën ꞌIbun tutankëxa bëbu tuá bakënun ꞌimiakëxa, ꞌimikëxun ka bëbu achúshiokin tuakëxa.

¹⁴ Usakian ꞌan ka anu ꞌikë xanu kaman Noemí kakëxa: —¡An min baba achúshi mi ꞌinánkë Nukën ꞌIbu ax ka upíokin rabikë ꞌiti ꞌikën, an ka min kani oia atua bërúanti ꞌikën! ¡Usa ꞌain kananuna min baba ax kara kanitankëx Israel kamanuax uisa uni kara ꞌiti ꞌikë kixun isti ꞌain!

¹⁵ An ka mi upíokin sinánmianan kaniakëtiabi mi ꞌakinti ꞌikën, min ñexuta Rut aín tuá ꞌikën, usa ꞌain ka aín ñe ꞌikë, an mi nuibakë ax ka mapai achúshi ꞌimainun rabë́ tuákën ꞌakësamaira okin mi nuibatia.

¹⁶ Usa ꞌain ka Noemínën aín baba ꞌitsaira kuëënkin bikin nuibakëxa, usakin nuibakin bitankëxun ka anbi bërúankin kaniokëxa.

¹⁷ Usakin aín baba ꞌikúkë Noimí isí ka a ꞌurama ꞌikë xanukamax kiakëxa: ¡Ax ka Noemínën tuá ꞌikën! Usa ꞌikë ka a rapasu ꞌikë xanukaman atúnbi Obed kakin anëxuankëxa a tuakëx ka kanitankëx Jesé aín papa ꞌiakëxa, ꞌimainun ka David aín xutókë ꞌiakëxa.

Davidnën chaitiokëkama ꞌia ñuikë bana

¹⁸ Ënë unikamax ka Fares kakë uni aín rëbúnki ꞌiakëxa: Fares ax ka Hezrón aín papa ꞌiakëxa, Ram ax ka Aminadab aín papa ꞌiakëxa.

¹⁹ Hezrón ax ka Ram aín papa ꞌiakëxa, Ram ax ka Aminadab aín papa ꞌiakëxa.

²⁰ Aminadab ax ka Nahasón aín papa ꞌiakëxa, Nahasón ax ka Salmón aín papa ꞌiakëxa.

²¹ Salmón ax ka Booz aín papa ꞌiakëxa, Booz ax ka Obed aín papa ꞌiakëxa.

²² Obed ax ka Jesé aín papa ꞌiakëxa, ꞌimainun ka Jesé ax Davidnën papa ꞌiakëxa.