Rut 3 - Kashibo-Kakataibo Biblia

Booznën Rut nuibakin ꞌakian ñuikë bana

¹ Achúshi nëtën ka abë banakin ësokin Noemínën aín ñexuta Rut kakëxa: —Mix kamina ꞌën ñexuta ꞌain, usa ꞌain kana ꞌën achúshi uni min bënë ꞌiti bitankëxmi abë upiti tsónun barixunti ꞌain.

² Ka kuat, nun aintsi Booz an ñu ꞌaxunkë xanukamabëmi aín naënu tëkë, ax ka bërí xupibukëbë, anuxuan aín trigo bimi aín xo tákanan mëníoti anu kuania.

³ Usa ꞌain kamina ꞌën mi kakë ësoibi ꞌiti ꞌain: —Nashitankëx ro sanuira anun ꞌianan min chupa upíira pañubiani kamina anu kuanti ꞌain. ꞌAínbi kamina pianan xëai sënë́nkëma pain ꞌikë mia unánun ꞌunánmitima ꞌain.

⁴ ꞌAínbi kamina uinu kara ꞌuxi ꞌibútia a upiokinra isti ꞌain. Istánkëx munu ñuitsima kuanxun aín taëmiuxun anuan rakukë chupa tabiti a tanain rakabuti ꞌain. Usaími rakábukë ka anbi añu kaina ꞌati ꞌai kixun mi kati ꞌikën.

⁵ Kixuan kakëxun ka Rutnën kakëxa: —Uisai ꞌinun kaina ꞌë ka usaibi kana ꞌiti ꞌain kixun.

⁶ Kakëx ka Rut aín ñen kakësabi oi ꞌikiani Booznën naënu kuankëxa.

⁷ Usai ꞌimainun ka Booznën upí sinánkëshi ꞌixun pianan xëakëxa. Usokin ꞌatankëx ka anu ñu ꞌapákë aín bimi bixun tsamankin nankë rapasu ꞌuxi ꞌibúakëxa. ꞌIbuón ka imë́ naëx Rut ñuitsimaira uxun anúan rakukë chupa aín taëmixun tabitankëx a tanain rakabuakëxa.

⁸ Usa ꞌain ka Booz ain ꞌuxonkënuax imë́ naëx bësui, kuainakëkinbi aín taëmi xanu rakákë tani ratuakëxa.

⁹ —Ratúkin ka ¿ui kaina mix ꞌain? —kixun Booznën ñukákëxa. Ñukákëxun ka Rutnën kakëxa: —ꞌËx kana an mi ñu mëëxunti xanu a ꞌai kixun kakëxa. Mix kamina ꞌën aintsi ꞌibu ꞌain usa ꞌain kamina ꞌë ꞌakinti ꞌain. ꞌËn kana min xanu ꞌinun ꞌë biti kuëënin.

¹⁰ Kakëxun ka —¡Nukën ꞌIbun ka! ¡Mi upíokin ꞌakinti ꞌikë! —kixun Booznën kakëxa—. Kanan ka bërí kamina uinsaranbimi min bënë ñukë ꞌain usai ꞌikëma anun ësai ꞌia kixun ka kakëxa. Usa ꞌain sapi kamina ꞌësama bëná uni barianan ñuñuira barikimabi ñuñuma unibi bariti ꞌian. ꞌAínbi kamina ꞌakëma ꞌain kixun kakëxa.

¹¹ ꞌËn kana mi kain, usa aín kamina rakuë́tima ꞌain, kamabi ꞌën ëmanu tsókë unikaman ka ꞌunánxa, mix kamina achúshi xanu upí sinánñu ꞌai kixun. Usa ꞌain kana añu ꞌanun kaina ꞌë kain a mi ꞌaxúnti ꞌain.

¹² ꞌAínbi ka asérabi ꞌëx min aintsi ꞌibu ꞌaínbi bëtsi min aintsi ꞌibuira mi ꞌurama ꞌikë anu ꞌikën.

¹³ Usa ꞌain kamina ënë imë́ ënu bërúti ꞌain. Imë́ishi ka min aintsi ꞌibu ꞌixun mi bisatankin biti ꞌikën; ꞌaínbi kana an bitsiama, ꞌën mi binuxun Nukën ꞌIbun ismainunbi mi kain. Usa ꞌain kamina bërí ënubi pëkaratamainun ꞌuxti ꞌain.

¹⁴ Usakian kakëx ka a imë́ Booznën taëmiu ꞌuxi rakabuakëxa. Usaia ꞌikë a pëkarati xabakuatsini pëkara iratisama ꞌaínshi niruax ka Booznëan usai ꞌinun kónkësabi oi kuankëxa: ꞌAínbi ka ënë xanu ka naënu kuanxa kixun uínbi ꞌunántima ꞌikë kixun kakësabi oi ꞌiakëxa.

¹⁵ Usa ꞌain ka Booznën kakëxa: —Min chupa anunmi rakukë a bikin kamina upíokin rëtëkërë kati ꞌain. Kakëxuan rëtëkërë kaxun Rutnën tuinmainun ka cebada cuarenta kilo inumikin ꞌaruxuankëxa. ꞌAruxun papimikëx a buani anuaxa ukë ëmanu kuankëxa.

¹⁶ Kuanxa anua ꞌikë anubi bëbaia ka aín ñen Rut ñukákëxa: —¿ꞌËn ñe xuta uisa kara anumi kuankë anu ꞌiax? Kixuan ñukákëxun ka Rutnën usaía ꞌikëkama ñuixuanan usakian Booznën ꞌakë kamabi ñuixuankëxa,

¹⁷ kanan ka ënë cebada kama ꞌinánkin ꞌë kaxa: —Ñu uanima mëkëinshi kuanx kamina min ñenu bëbatima ꞌain.

¹⁸ Ësakian ñuixunkëxun ka aín ñe Noemínën kakëxa: —ꞌËn ñexuta bërí kamina uisakin kara a unin mi ꞌaia isti ꞌain. Ënë ñu ka usa ꞌiti ꞌikë kixun mibëtan mëníokëma ꞌixun a unin bërí upíokin sinántima ꞌikën.