Rut 2 - Kashibo-Kakataibo Biblia

Rut kakë xanu Booz kakë uni aín naënu tëa ñuikë bana

¹ Noemí ax ka Elimélec aín bënë aín aintsiñu ꞌiakëxa, ax ka Booz kakin anëkë ñuñuira ꞌianan sinan mëninshi ꞌikë unin ꞌunánkë ꞌiakëxa.

² Achúshi nëtën ka Rutnën aín ñe Noemí kakëxa: —ꞌË kaina an ñu ꞌapákë bikë unikaman bikin tëoia cebada ꞌapákë atu kaxú kuankin binun kara ꞌë bimitima ꞌikë istánun xutima ꞌain. Kixuan kakëxun ka asabika. —Kamina isikuanti ꞌain —kixun ain ñen kakëxa.

³ Usakian kakëx ka anua cebada ꞌapákë aín bimi bikë unikama ꞌikë anu kuankëxa. Kuanxun ka unikaman bikin ënkë cebada bimi atu kaxú kuankin anribi biakëxa, a naëx ka Booznan ꞌikë kixun ꞌunánxumabi ka usakin biakëxa, ax ka Elimélec kakë uni aín aintsi ꞌibu ꞌiakëxa.

⁴ Usai anu tëmainun ka naë ꞌibu Booz ax Belénnuax aín unikaman kara an ñu ꞌapákë bitsia kixun isi uakëxa ukin ka an ñu bimi bikë unikama uisa kaina ꞌain, kixun atu kakëxa: —¡Nukën ꞌIbun ka mitsu ꞌakinkin bërúanti ꞌikë kixun kakëxa! Kakëxun ka atúnribi kakëxa: —Miribi ka Nukën ꞌIbun upíokin sinánxukin ꞌakinti ꞌikë kixun kakankëxa.

⁵ Usakin katankëxun ka Booznën an ñu mëia bërúantia anëkë uni ñukákëxa: —¿Uinu ꞌikë unin bëchikë kara xanu ux ꞌik?

⁶ Kixuan ñukákëxun ka an tëia uni bërúanti anëkë unin kakëxa: —Ax ka moabita xanu axa Noemíbë Moab kakë ëmanuax ukë a ꞌikën.

⁷ An ka uxun ꞌën karaisana an ñu ꞌapákë ain bimi bikë unikaman ënkë a atu kaxú kuankin binun bimitima ꞌai kixun ka ꞌë ñukáxa, ñukákëxun kana binun kixun kan, usa ꞌain ka bëráma upunkin ñu bimi bibaiti bari maníkëbë chukúmashi tanti uaxa.

⁸ Usakian kakëxun ka Booznën Rut kakëxa: —Kamina ësokin mi kamainun kuati ꞌain, usa ꞌain kamina bëtsi unin naënua ñu ꞌapákë aín bimi bitsi kuantima ꞌain. Ënubi kamina an ꞌë ñu mëëxunkë xanu kama abë bërúti ꞌain,

⁹ usa ꞌain kamina ꞌën ñu mëmikë uni kamabëtan uimiuküa kara ñu ꞌapákë aín bimi atun bitsia amia bikëbëtan minribi auküa biti ꞌain. ꞌËn kana an ꞌë ñu mëëxunkë unikaman mi ꞌatima okinma upiokinshi ꞌakinun kixun kan. Shimakin ꞌumpax xëatisa tankin kamina uinu kara ñutëmi bixun ꞌumpax nania anua bitankëxun xëati ꞌain.

¹⁰ Usakin kakëxun ka Rutnën aín bëmánanën me tikai tëtúbuti ꞌikin Booz ñukákëxa: —¿Uisaxun kaina min ꞌë ꞌunán ꞌixunmabi ax ka upí sinánñu xanu ꞌikë kixun, ꞌëx bëtsi menu ꞌikë xanu ꞌikëbi ꞌë ꞌunánin?

¹¹ Kixuan kakëxun ka Booznën kakëxa: —ꞌËn kana upíokin ꞌunánin min bënë ñukëma ꞌain kamina min ñe kamabi ñu upíokin ꞌakian, ꞌimainun kamina min papa min aintsikama ëbëtsini anumi tsókë me anuax nubë tsóti uan, bëráma kananuna min ꞌunánkëma uni ꞌiakën.

¹² ¡Minmi ꞌakë ñukama kupín ka Diosan mi ꞌakinti ꞌikën! ¡Israel unibunën Dios kamina an mi ꞌakinun barian! ¡Usa ꞌain ka ꞌatapa tuañunëan aín tuákama bërúankin aín pëchinu atsímikësa obëtsinkin mi bëaxa. Usa ꞌain ka kamabi min ꞌakë ñukama kupí mi ꞌakinti ꞌikën!

¹³ Kixun kakëxun ka Rutnën kakëxa: —Mix kamina upí sinánñu uni ꞌësaribi ꞌain, minmi nuibakin kakë banakama an ka ꞌë upíokin sinánmia. ꞌËx kana an mi ñu ꞌaxunkë xanu achúshimabi ꞌain.

¹⁴ Usokin katankëxun ka anúan piti hora ꞌikëbëtan Booznën anribia atubëtan pinun kixun Rut kakëxa: —Katankëxun ka ënu ka ut, kixun kuëankëxa, kuënkëx uax tsóbutia ka pán tukakë ënë kamina bimi baka kachakë ënu chabóti ꞌain kixun kakëxa. Kakëx ka Rut anua an cebada bimi bikë unikama pi tsókë atu rapasu tsóbuakëxa. Tsóbutia ka Booznën cebada bëru tutush okë a pinun kixun ꞌinánkëxa, ꞌinánkëxun ka ꞌaímai puchákin piakëxa, pikinbi ka cebada tutush okë tëxëokëxa.

¹⁵ Usakin ꞌatankëxa Rut amiribishi cebada bimi bitsi kuantëkënkëbëtan ka Booznën an ñu mëëxunkë unikama kakëxa: —Anribia cebada bimi nëakin bitsia kamina. Bixuma ꞌanun kixun katima ꞌain.

¹⁶ ꞌImainun kamina nëakin bikëxa cebada bimi rëukutia, abia tupikin binun isëshiti ꞌain. ¡Uínbi ka usakian ꞌaia ubiotima ꞌikën!

¹⁷ Usokian kan ka Rutnën cebada bimi Booznën naënua bari kuabuti ñantabutamainun biakëxa. Bitankëxun kamabi an bikë a aín xonua rishkikin tákakëx ka, tupúnkëx veinte kilo inumikian bikë cebada bimi ꞌiakëxa.

¹⁸ Usokin ꞌaxun bibiani ka Rut na bibaikë ñu bimi buani anuaxa ukë Belén kakë ëma anua aín ñe ismi kuankëxa. Kuanxun ismitankëxun ka piti tëxëokë buánkë a bixun aín ñe Noemí ꞌinánkëxa.

¹⁹ ꞌInánkëxun ka Noemínën ñukákëxa: —¿Uinu kaina tëbaitin? ¿Uisoxun kaina ꞌaisamaira cebada bimi bibaitin? ¡Diosan ka an mi ësokin ꞌakinkë uni chuámarua ꞌinun ꞌimiti ꞌikën! Kixuan kakëxun ka Rutnën ain ñe ui unin naënu kara ñu bimi bitsi tëbaitia kixun ñuixuankëxa. —Anua ꞌën ñu bimi binux tëkë uni ax ka Booz kakin anëkë ꞌikën —kixun ka ñuixunkin kakëxa.

²⁰ Ñuixunkëxun ka aín ñe Noemínën kakëxa: —¡Nukën ꞌIbun ka a uni upíokin ꞌakinti ꞌikën! An ka nu nuibakin bërí upíokin ꞌakianxa, bërámibi ka nun aintsi bamakëkama abë nuibanankë uni ꞌiakëxa. A unix ka nun aintsi ꞌibu ꞌikën, usa ꞌaish ka ax achúshi uni an nu ꞌakinti asábi ꞌikën.

²¹ Kixuan kakëxun ka Rutnën katëkëankëxa: —ꞌËn karaisana amiribishi an ñu ꞌaxunkë xanu kamabëtan aín ñu bimi këñukin sënë́onkin bikintima ꞌai kixun ka ꞌë kaxa.

²² Usakian kakëxun ka Noemínën aín ñexuta kakëxa: —ꞌËn nuibakë ñexuta asábi ka ꞌën sinánkëx sapikamina an ñu ꞌaxunkë xanu kamabë anu tëi bërúti ꞌain, usa ꞌain kamina bëtsi uninu ñu ꞌapákë aín bimi bitsi kuantima ꞌain, bëtsi unínma mi ubioia usa ꞌain.

²³ Usokian aín ñen kakëx ka Rut amiribishi Booz kakë uni ain naënu kuanxun ñu bimi anu tëkë xanu kamabëtan bikin cebada ꞌimainun trigo ꞌapákë aín bimi këñukin binun ꞌakiankëxa. Usai tëibi ka aín ñebë ënananima abëbi ꞌiakëxa.