Rut 1 - Kashibo-Kakataibo Biblia

Elimélec kakë uni ꞌimainun aín aintsikama Moab kakë menu tsóti kuan ñuikë bana

^1-2 A baritian Israelkama atun ꞌapuñuma ꞌain ka bëtsi uni raírinëx atun ꞌapu ꞌiakëxa, a baritiakaman ka a menu a piti ñu ꞌaíma ꞌain numi ꞌiakëxa. Usa ꞌain ka achúshi uni Judá kakë menua ꞌikë Belén kakë ëma anuax Elimélec ax Moab kakë me anu ꞌitsama baritia tsóti kuankëxa. Kuankin ka ain xanu Noimí ꞌimainun aín bakë bëchikë bëbu rabë́ Mahlón kakë a ꞌimainun Quilión a buánkëxa. A unikamax ka efrateo ꞌaíshbi Belén menu tsókë unibi ꞌiakëxa. Usa ꞌain ka anuax kuantankëx Moab kakë me anu tsóti bërúakëxa.

³ ꞌAínbi ka Elimélec Noemínën bënë ax anu tsóti kuanxbi anuax ñuakëxa, ñuan ka a xanu ain tuá rabëbëshi bërúakëxa.

⁴ Usai anu pain ꞌikin ka a rabë́xunbi moabitas xanu biakëxa; a xanu achúshinëx Orfá kakë ꞌimainun ka bëtsíxribi Rut kakin anëkë ꞌiakëxa. ꞌAínbi ka mapai rabë́ baritia sënë́nti ꞌurama ꞌain

⁵ Mahlón ꞌimainun Quilión axribi ñuakëxa, ñuan ka aín tita Noimí tuáñuma ꞌianan bënuñuma bërúakëxa.

Noemí ꞌimainun Rut Belénnu kuan bana

⁶ Achúshi nëtën ka Noemínën Moab menu ꞌixun Nukën ꞌIbun kaísa aín menua numi chaiira ꞌikëbi nëtë́miaxa kixun ñuikania kuakëxa.

⁷ Usakin kuati ka amiribishi Judá kakë menu kuantëkënti sinántankëx anua ꞌikë me anuax ain ñexuta rabëbë aín menubi kuantëkëankëxa;

⁸ ꞌaínbi ka bainuxun aín ñexuta rabë́ kakëxa: —Mitsun titan xubunu kamina kuantëkënti ꞌain, Nukën ꞌIbun ka ꞌatimokin tëmëramikima upíokin mitsu ꞌakinti ꞌikën, ꞌimainun ka ꞌë ꞌakianan ꞌën tuákama ꞌakinkësaribi okin mi ꞌakinti ꞌikën,

⁹ ꞌanan ka bënutëkëntankëxmi min bënëbë upiti tsónun mi ꞌakinti ꞌikën: —Ësokin katankëxun ka aín ñexuta Noemínën kuantanun kixun bëtsuku kakëxa, ꞌaínbi ka a rabëtan inkin,

¹⁰ ësokin kakëxa: —¡Usama ka! ¡Nux kananuna min menu mibëbi kuantëkënti ꞌain!

¹¹ Kakëxunbi ka Noemínën munuma banakin kuainsama taniabi katëkëankëxa: —ꞌËn ñexuta kamina kuanti ꞌain, ¿añu ꞌanux kaina ꞌë nuibiani ꞌëbë kuainsa tanin? ꞌËx kana mitsu an kanitankëxun biti nukëbënë okin tuatëkëntisama ꞌain.

¹² Usa ꞌain kamina mitsun xubunubi kuantëkënti ꞌain. ꞌËx kana kaniakëkë xanu ꞌaish amiribishi bënutëkëntisama ꞌain. ꞌËx xuntaku ꞌaish ënë ñantánbi bënutankëxun tuatëkënia,

¹³ ¿kaina mitsun atubë biranaxun kania kaintsian? ¿a tuákama kania kaini sapi kamina mitsux bënuñuma nitsian? Usama ka usai kamina ꞌën ñexuta ꞌaish ꞌëbë bërútima ꞌain. Nukën ꞌIbun ka ꞌitsaira tëmëranun ꞌë ꞌimiaxa, ꞌaínbi kana tëmëraia mitsu isi ꞌëx ꞌikësamairai ꞌitsaira masánuituti ꞌain.

¹⁴ Usokin kakëx ka atux amiribishi intëkëankëxa. Usai ꞌitankëxun ka Orfánën ꞌëx kana ꞌën xubunubi kuantëkëni kixun kakin aín ñe achúshi okin bëtsuku kabiani kuankëxa, ꞌaínbi ka Rut axëshi aín ñebë bërúakëxa.

¹⁵ Bërútia ka Noemínën kakëxa: —Ka kuat, min tsabë ka ain me anua aín dioskama ꞌikë anubi kuantëkënia. Usa ꞌain kamina mixribi abë kuanti ꞌain.

¹⁶ Kakëxunbi ka Rutnën kakëxa: —ꞌË kamina mi ëbiani mibë ënanankiani kuantanun kixun katima ꞌain. ¡Uinu karamina kuanin anubi kana ꞌëxribi mibë tsóti kuanti ꞌain! ꞌImainun ka min ëma ax ꞌën ëmaribi ꞌiti ꞌikën, min Dios axribi ka ꞌën Dios ꞌiti ꞌikën, min ëmanu tsókë unikama ax ka ꞌën aintsiribi ꞌiti ꞌikën, ꞌimainun kana min rabikë Dios aribi ꞌën Dios ꞌikë rabiti ꞌain.

¹⁷ ꞌAnan ka uinu kara mi ñuia mainia anuribi ñuia ꞌë maínti ꞌikën. ¡Usa ꞌain ka Nukën ꞌIbun mibë ënanankiani kuania ñukëma pain ꞌikë ꞌaisamaira okin ꞌë tëmëramiti ꞌikën!

¹⁸ Ësakin kakëxun ka Rutnën ka ꞌë ëinsamaira tania kixun ꞌunánkin Noemínën uisakinbi katëkëama ꞌikën.

¹⁹ Usai ꞌikiani ka xanu rabë́ bain Belén kakë ëmanu bëbai kuankëxa. Kuania bëbakiania isi ka Belénnu ꞌikë unikama ratuti tsuákirui kikankëxa. Kikankëbë atúxribi tsuákirui ka xanukama kanankëxa: ¿Ënëx kara Noemí ama ꞌik?

²⁰ Kiabi ka Noemínën atu kakëxa: —ꞌË kamina bërí Noemí kakin anëtima ꞌain; Mará kakin kamina ꞌë anëti ꞌain, Dios kamabi kushiñu an ka ꞌaisamaira ꞌëx nishkë anunbi tëmëranun ꞌë ꞌimiaxa.

²¹ Ënuax chikiti kana ꞌën bënë ꞌimainun ꞌën tuakamabë chikiakën ꞌaínbi kana bërí ñuñuma utëkënin, usai ꞌëx ꞌiti sapi ka Nukën ꞌIbun kuëëankëxa. ¿Uisa kupí kaina Dios kamabi kushiñu an ꞌaisamaira okin tëmëramikëbi Noemí kakin ꞌë anëkanin?

²² Ësai ka Noemí Moab kakë aín me anubi ꞌain ñexuta Rut kakë moabita abë kuantëkëni ꞌiakëxa. Belén ëmanuxuan atun cebada ꞌapákë bikin pëukankëbë ka Noemí bëbakëxa.