Romanos 6 - Kashibo-Kakataibo Biblia

Ainan ꞌaish ꞌuchatëcënuxma Cristo cupí Nucën Papa Diosnan ꞌiti bana

¹ ¿Nux ꞌuchañuira ꞌicëbi ca Nucën Papa Diosan Jesucristo cupí nu upí isia quixun sinani caranuna uisari quiti ꞌain? ¿Nucën Papa Diosan nu nuibaquin nun ꞌucha tërë́ntëcënun caranuna amiribi amiribi ꞌuchati ꞌain?

² Usama ca. Nun ꞌucha cupí Jesucristo bama ꞌain cananuna nux ꞌuchatëcënuxma abë bamacësa ꞌain. Usa ꞌaish cananuna unin bamaquin aín ꞌucha ashiquin ëncësa usaribi ꞌain. ¿Usa ꞌaish caranuna uisa cupí ꞌuchaíshi tsóti ꞌain?

³ Cananuna usai ꞌitima ꞌain. ¿Jesucristonën uni ax ca nashimicë ꞌaish ꞌuchatëcëntimoi Cristobë bamacësa ꞌicë quixun caramina ꞌunaniman?

⁴ Nux nashimicë ꞌaish cananuna Jesucristo, nun ꞌucha cupí bama ꞌain ꞌuchatëcëntimoi abë bamacësa ꞌian. Usa ꞌaish cananuna bamacëbia Nucën Papa Diosan Jesucristo, aín cushínbi baísquimia cupí, usaribi ꞌaish bëtsi sinánñu ꞌianan bëráma ꞌicësai ꞌitëcëntima oquin Nucën Papa Diosan ꞌimicë ꞌain.

⁵ Nubëa Cristo ꞌain cananuna abë bamacësa ꞌaish axa bamatancëx bëtsi ꞌinun baísquicësaribi ꞌiti ꞌain.

⁶ Cananuna ꞌunanin, Cristonanma pain ꞌixun cananuna ënquinma nux cuëëncësa oquinshi ñu ꞌatima ꞌacën. Usa ñu sinántëcënuxunma cananuna Cristobë bamacësa ꞌixun ꞌuchati sinántëcëntima ꞌain. Uni bamacë an ca ñu ꞌaisama ꞌati sinántëcënima. Usaribi oquin cananuna nux Cristobë bamacësa ꞌixun ñu ꞌatima ꞌatëcënti sinántima ꞌain.

⁷ Usa ꞌaish cananuna unían bamaquin aín ꞌucha ashiquin ëncësa usaribi ꞌain.

^8-9 Cananuna ꞌunanin, bamaxbi baísquia ꞌaish ca Cristo uínsaran nëtë́nbi bamatëcëntima ꞌicën. Axa bamatëcënti ca ꞌaíma ꞌicën. —Usa ca —quixun ꞌunánquin cananuna ësaquinribi ꞌunanin, nun ꞌuchacama ëni Cristobë bamacësa ꞌaish cananuna abë baísquicësa ꞌaish xënibua ꞌaínbi abë ꞌiti ꞌain.

¹⁰ Cristo ax ca camabi unían ñu ꞌatima ꞌacëcama nëtë́nux achúshitishi bamacëxa. Bamatancëx, bamatëcëntimoi baísquia ꞌaish ca ax Nucën Papa Dios cuëëncësabi oíira ꞌia.

¹¹ Usaribiti camina mitsux Cristobë bamacësa ꞌixun mitsun ꞌucha ashiquin ëncë ꞌaish, abë baísquicësa ꞌaish Jesucristo ꞌicësaribiti Nucën Papa Dios cuëëncësabi oíira ꞌiti ꞌain.

¹² Usa ꞌixun camina ꞌuchañu ꞌaish ꞌatima sinánñu ꞌixun mitsun sináncësa oquinshi ꞌaisama ñu ꞌatima ꞌain.

^13-14 Cristonanma ꞌixun uisa ñu cara ꞌatima ꞌicë quixun ꞌunánquinbi ꞌá ꞌaíshbi camina Cristo cupí Nucën Papa Diosan uni ꞌaish usai ꞌiman. Usa ꞌaish camina mitsux Nucën Papa Diosbë ꞌitimoi bamati ꞌiá ꞌaíshbi bërí aín uni ꞌaish ax cuëëncësabi oi ꞌiti ꞌain. Usa ꞌixun camina mitsun mëcën, mitsun taë, mitsun namicama anun ñu ꞌaisama ꞌaquinma Nucën Papa Dios cuëëncë ñuishi ꞌati ꞌain.

An ñu mëëmicë unin uni ñu mëëxuncësaribi oquin ꞌuchañu unin ñunshin ꞌatimanën ꞌapu ñu mëëxuncë bana

¹⁵ ¿Axa quicësabi oínu ꞌiti bana quicësabi oquinu ꞌacë cupíma ami catamëtiaishi ca Nucën Papa Diosan ꞌën ꞌuchacama tërë́nti ꞌicë quixun sinánquin, caranuna amiribi amiribi ꞌaisama ñu ꞌatëcënti ꞌain? Cananuna ꞌatima ꞌain.

¹⁶ Camina upí oquin ꞌunanin, mitsun uni itsi —ꞌëx cana min uni ꞌiisa tani —quixun catancëxun camina aín uni ꞌixun ax quicësabi oquinshi ñu ꞌaxunti ꞌain. Usaribiti ca uni ñunshin ꞌatimanën ꞌapu cuëëncësa oquinshi ꞌacë ꞌaish aín uni ꞌicën. Aín uni ꞌaish ca Nucën Papa Diosbë ꞌitimoi bamati ꞌicën. Usa ꞌaínbi ca uni itsix Nucën Papa Dios cuëëncësabi oquin ꞌacë ꞌaish aín uni ꞌianan an iscëx upí ꞌicën.

^17-18 Mitsux ñunshin ꞌatimanën ꞌapu cuëëncësa oquinshi ꞌacë ꞌiá ꞌaíshbi camina bërí usama ꞌain. Camina a aín unicaman mitsu ꞌunánmicë bana Cristo ñuicë sinánan a bana quicësabi oquin ꞌain. Mitsun ñu ꞌatima ꞌácama ëncë ꞌixun camina Nucën Papa Dios cuëëncësabi oquin ñu upíshi ꞌain. Usaquinmi ꞌaia mitsu ꞌunánquin cana cuëënquin Nucën Papa Dios —asábi ca —quixun cain.

¹⁹ Mitsúxmi unin sináncësa oquin sináncë ꞌicë cana mitsúnmi cuaisa banáinshi mitsu ñuixunin. Bëráma camina mitsun mëcën, mitsun taë, mitsun namicama anun ñu ꞌatima ꞌatishi sinánquin usoquinshi ꞌacën. Usoquin ꞌá ꞌixunbi camina bërí mitsun mëcën, mitsun taë, mitsun namicama anun ñu upíshi ꞌati sinánquin usoquinshi ꞌati ꞌain, usaquinmi ꞌacëbëa Nucën Papa Dios cuëënun.

²⁰ Ñu ꞌatima ꞌatishi sináncë ꞌixun camina mitsun bëráma Nucën Papa Dios cuëëncësabi oquin ꞌati sinánma ꞌain.

²¹ Ñancábi camina usa ñu ꞌacën. Mitsúxmi usai ꞌiá sinani camina bërí rabinin. Usa ñucama ꞌati an ëncëma unix ca usabi ꞌaish ashiti Nucën Papa Diosbë ꞌitimoi bamati ꞌicën.

²² Mitsúnmi ñu ꞌatima ꞌatëcënxunma ꞌanun Nucën Papa Diosan ꞌimicë ꞌixun camina ax cuëëncësabi oquin ꞌain. Usoquin ꞌaia ca Nucën Papa Diosan mitsu an iscëxmi upí ꞌinun ꞌimia. ꞌImianan ca nëtë́timoimi abë ꞌinun mitsu ꞌimia.

²³ Aín ꞌucha cupí ca uni ië́timoi bamati ꞌicën. Usa ꞌaínbi ca axa aín ꞌucha tërë́nun Nucën ꞌIbu Jesucristomi catamëcë unicama a abë xenibua ꞌaínbi ꞌinun Nucën Papa Diosan ië́mia.