Romanos 4 - Kashibo-Kakataibo Biblia

Amia catamëtia Nucën Papa Diosan Abraham upí isa

¹ Usa ꞌain sapi cananuna quiti ꞌain, ¿uisa cupí cara nucën rara Abraham a Nucën Papa Diosan upí isacëx?

² Aín ñu ꞌacë cupía Nucën Papa Diosan upí iscë ꞌaish ca Abraham —ꞌëxbi cana upí ꞌai —quiax rabía ꞌitsíanxa. Usa ꞌaínbi ca Nucën Papa Diosan iscëx, a cupía Abraham rabíti ñu ꞌaíma ꞌiacëxa.

³ Abraham ñui ca Nucën Papa Diosan bana cuënëo ësai quia: “Ami sinánquian, an ca asérabi aín quicësabi oquin ꞌati ꞌicë quixun ꞌunáncë ꞌaish ami catamëcë cupí ca Nucën Papa Diosan Abraham upí isacëxa”.

⁴ Usa ꞌain ca ënëx ësa ꞌicën. An uni ñu mëëxuncë uni a ca an ñu mëëmicë unin cupíoia. A curíqui ax ca ꞌináinshicëma ꞌicën, ax ca aín ñu mëëcë cupí ꞌináncë ꞌicën.

⁵ Usa ꞌaínbi ca axa ñu upí ꞌacëma ꞌaíshbi, Nucën Papa Diosan ca aín quicësabi oquin ꞌaia quixun ꞌunani ami sináncë uni a Nucën Papa Diosan ainan ꞌimia, an ꞌuchañu unibi ami catamëtia ainan ꞌimicë ꞌixun.

⁶ Upí ñu ꞌananbi upíma ñu ꞌacë ꞌicëbi ca aín ꞌuchacama tërë́ntancëxun Nucën Papa Diosan uni upí isia. Usaquian iscë unix ca cuëënia quiax ca David ësai quiacëxa:

⁷ Ui unicama cara Nucën Papa Diosan tërë́nquin aín ꞌucha manuia, acamax ca chuáma tani cuëënia.

⁸ Ui unicama cara Nucën ꞌIbu Diosan aín ꞌucha manuquin sinánmitëcënima, ax ca chuámarua tani cuëënia.

⁹ ¿Judíos unicamaishi ñui cara David usai quiacëx? Usama ca. Judíosma unicamaxribi ca aín ꞌuchacama tërë́ncë ꞌaish usai cuëënti ꞌicën. Cananuna mitsu can, ax aín quicësabi oquin ca Nucën Papa Diosan ꞌati ꞌicë quixun sinani ami catamëcë cupí ca Nucën Papa Diosan Abraham upí isacëxa.

¹⁰ ¿Uinsaran cara Nucën Papa Diosan a upí isacëx? ¿ꞌUnántioracacë ꞌicë cara Abraham Nucën Papa Diosan upí isacëx? Usama ca. ꞌUnántioracacëma pain ꞌicëbi ca Nucën Papa Diosan a upí isacëxa.

¹¹ Nucën Papa Diosan ca Abraham ami catamëtia an upí iscë cupía ꞌunántioracanun cacëxa. Usaquian Nucën Papa Diosan Abraham cá cupí cananuna ꞌunanin, judíosma unicamax ca judíos unibu ꞌicësaribiti, ꞌunántioracacëma ꞌaíshbi Nucën Papa Diosmi catamëcë ꞌaish Abrahamnën rëbúnquisa ꞌicë quixun.

¹² Judíos unicamax Abraham ꞌiásaribiti ꞌunántioracacë ꞌaíshbi ca axa Abraham ꞌiásaribiti Nucën Papa Diosmi catamëcëcama axëshi asérabi Abrahamnën rëbúnqui ꞌicën.

An ca aín quicësabi oquin nu ainan ꞌinun ië́miti ꞌicë quixun sináncë unishi ca Nucën Papa Diosan ainan ꞌinun ië́mia quicë bana

¹³ Nucën Papa Diosan ca Abraham ësaquin cacëxa: “Mi ꞌimainun min rëbúnquicamax ca ꞌitsa ꞌaish ꞌënan ꞌianan ꞌën mi ꞌinánti me anu ꞌiti ꞌicën”. Axa usai ca uni ꞌiti ꞌicë quicë bana quicësabi oquin ꞌacë cupíma asérabi ami catamëcë cupíshi ca Nucën Papa Diosan usaquin Abraham cacëxa.

¹⁴ Usai ca uni ꞌiti ꞌicë quicë bana quicësabi oquin ꞌacë cupíshi unicama Nucën Papa Diosan iscëx upí ꞌaish ainan ꞌain ca, ami catamëcë cupíshi ca Nucën Papa Diosan uni upí isia quicë bana ax cëmë ꞌitsíanxa. Usa ꞌain ca Nucën Papa Diosan aín rëbúnqui ñuiquin Abraham cá bana ax ñancáishi ꞌitsíanxa.

¹⁵ Cananuna ꞌunanin, usai ca uni ꞌiti ꞌicë quicë bana atúan cuati, a ꞌaíma ꞌain ca anun uni ꞌuchoti bana ꞌaíma ꞌicën. Usa ꞌaínbi ca usai ca uni ꞌiti ꞌicë quicë bana ꞌunáncë ꞌixunbi axa quicësabi oquin ꞌacëma ꞌaish uni ꞌuchocë ꞌiti ꞌicën.

¹⁶ Usa ꞌain ca Nucën Papa Diosan Abraham ꞌimainun aín rëbúnquicamaxa atun ñu ꞌacë cupíma ami catamëtíshi asérabi ainan ꞌiti mëníocëxa. Judíos unibu, an atun cuati bana quicësabi oquin ꞌacë, a unicamaishima, uicamax cara Abraham ꞌicësaribiti Nucën Papa Diosmi catamëtia, a camabi ca Nucën Papa Diosan ainan ꞌinun ꞌimia. Usa uni ꞌaish cananuna nucamaxribi Abrahamnën rëbúnquisa ꞌain.

¹⁷ Nucën Papa Diosan bana a ñuiquian cuënëo ax ca ësai quia: “Mi cupía min rëbúnqui ꞌitsaira ꞌinun cana mi aín rarami ꞌinun ꞌimin”. Usaquin ca Nucën Papa Diosan amia catamëcë ꞌixun Abraham cacëxa. Nucën Papa Dios ax ca an uni bamacëbi tsótëcënun baísquimiti ꞌianan an aín sinanëinshi, ꞌaíma ꞌicëbi, ñu uniocë a ꞌicën.

¹⁸ Nucën Papa Diosan “Min rëbúnqui ca ꞌaisamaira uni ꞌiti ꞌicë” quixun cacëxun ca Abrahamnën sináncëxa, Nucën Papa Diosan ꞌë cacësabi oi ca ꞌën rëbúnqui ꞌaisamaira ꞌiti ꞌicë quixun. Uisai cara usai ꞌiti ꞌicë quixun ꞌunánquinmabi ca ami catamëquin, Nucën Papa Dios quicësabi oi ca ꞌiti ꞌicë quixun sináncëxa.

¹⁹ Abraham cien baritiañusa ꞌaish cushima ꞌimainun ca aín xanu Sara axribi xëni ꞌaish tuatisama ꞌiacëxa. Usa ꞌixunbi ca Abrahamnën —uisa ꞌaish carana bëchicëñu ꞌiti ꞌai —quixun ꞌunánquinmabi —Nucën Papa Diosan ꞌë cacësabi oi ca asérabi ꞌiti ꞌicë —quixun sináncëxa.

²⁰ Usai ca ꞌitima ꞌicë quixun sinánquinma, Nucën Papa Diosan ca asérabi aín quicësabi oquin ꞌati ꞌicë quixun sinani ami catamëquin ca Abrahamnën Nucën Papa Dios rabiacëxa.

²¹ Rabiquin ca, an ca asérabi cushi ꞌixun ax quicësabi oquin ñu ꞌati ꞌicë quixun sináncëxa.

²² Usai ꞌía ax ami catamëcë cupíshi ca Nucën Papa Diosan Abraham asérabi upí uni ꞌicë isacëxa.

²³ An iscëx ca ami catamëcë cupí Abraham upí uni ꞌicë quixun cuënëomia ꞌaínbi ca a banax Abrahamishi ñuiquinma,

²⁴ nuribi ñuiquin Nucën Papa Diosan aín uni cuënëomia ꞌicën. Usa ꞌain cananuna Nucën Papa Dios, an Nucën ꞌIbu Jesús bamacëbi baísquimia, an ca ami catamëcë cupíshi nu upí isia quixun ꞌunánti ꞌain.

²⁵ Nucën Papa Diosan ca nun ꞌuchacama tërë́ncë ꞌaíshnu upí ꞌinúan bamanun ꞌimitancëxun Jesucristo baísquimiacëxa. An usoquin ꞌá ꞌaínnu ami catamëtia ca Nucën Papa Diosan nu upí isia.