Romanos 3 - Kashibo-Kakataibo Biblia

¹ ¿Usa ꞌain cara judíos unicamax bëtsi unicamasamaira ꞌic? ¿Unántioracacë ꞌiti ax cara ñancáishima ꞌic?

² Ca asérabi usama ꞌicën. Judíos unibu pain ca Nucën Papa Diosan aín bana ꞌináncëxa. ꞌInánquin ca camabi unin ꞌunánun a bana judíos uni raíri cuënëomiacëxa.

³ ¿Bëtsi bëtsi judíos unicaman Nucën Papa Diosmi sináncë ꞌixunbi ñu ꞌaisama ꞌacë ax cara Nucën Papa Diosan ꞌucha ꞌic?

⁴ Ca usama ꞌicën. Uníxa aín quicësa oquin ꞌananbi cëmëti ꞌaínbi ca Nucën Papa Diosainshi asérabi camabi ax quiásabi oquin ꞌaia. Usa ꞌain ca Nucën Papa Dios ñui aín bana cuënëo ësai quia: Camabi unin ca ꞌunánti ꞌicën, min bana ca asérabi upí ꞌicë quixun. Asábi cara quixun ꞌunántisa tanquin isquinbi ca min ꞌacë ñu asábiira isquin unin —mix camina upí ꞌai —quixun ꞌunánti ꞌicën.

⁵ ¿Nun nu ax cuëëncësabi oquin ꞌaiama oquin, upí ꞌinun quixun an nu castícania isquian uni raírinën Nucën Papa Dios, ax ca aín sinan upíira ꞌicë quixun ꞌunáncë ꞌain caranuna uisoquin sinánti ꞌain? ¿An nu castícancë cupí ca Nucën Papa Dios upíma ꞌicë quixun caranuna sinánti ꞌain? Usai quicë banax ca unin abi sináncësa ꞌicën.

⁶ Usama ca. ¿ꞌAtima ñu ꞌaiabi isëshicë ꞌixun cara Nucën Papa Diosan uisaxun anúan ꞌati nëtë sënë́ncëbëtan unin cara upí ñu ꞌaxa, cara upíma ñu ꞌaxa quixun isti ꞌic?

⁷ ¿Ami ꞌu, upí ꞌinun quixun an nu castícania isquian uni raírinën Nucën Papa Dios, ax ca aín sinachacë ꞌicë upí ꞌinun ꞌë castícania isquian uni raírinën Nucën Papa Dios ax ca aín sinan upíira ꞌicë quixun ꞌunáncë ꞌaínbi cara uisacasquin Nucën Papa Diosan ꞌë castícania? —quixun sapi ca bëtsi bëtsi unin sinania.

⁸ ¿Usa ꞌain caranuna uisacasquin ñu ꞌatima ꞌaiman?, Nucën Papa Diosan sinan ca upí ꞌicë quixun unicaman ꞌunánun. Usai ꞌuchati ca asábi ꞌicë ca Pablo ꞌimainun abë ꞌicë unicama quia quiax ca bëtsi bëtsi uni nu ꞌatimoti sinani nu ñui quia. Usaía ax quicë unicama a ca Nucën Papa Diosan ꞌuchoquin castícanti ꞌicën.

Camáxbi cananuna ꞌuchañu ꞌain, quicë bana

⁹ ¿Nucën Papa Diosan cara judíos unicama bëtsi unicamasama upíira isin? Usama ca. Cana mitsu can, judíosma unicama ꞌicësaribiti ca judíos unicamaribi aín sinan upíma ꞌaish ꞌuchañu ꞌicën.

¹⁰ Nucën Papa Diosan bana cuënëo ca quia: An ñu upíshi ꞌacë uni ca ꞌaíma ꞌicën, achúshirabi.

¹¹ An Nucën Papa Diosan bana cuacë uni ca ꞌaíma ꞌicën. Axa Nucën Papa Diosan sinánmicë ꞌiisa tancë uni ca ꞌaíma ꞌicën.

¹² Camabi unix ca Nucën Papa Diosmi manúaxa. Ami manúxun ca ꞌatima ñu ꞌatishi sinania. An upí ñuishi ꞌacë uni ca ꞌaíma ꞌicën. Achúshirabi ca ꞌaíma ꞌicën.

¹³ Anu uni bamacë racáncë quini mapucëma ꞌain ca anuax aín anëcë chiquitia. Usaribiti ca ꞌatima uni aín cuëbínuax bana ꞌatima ꞌimainun cëmëi quicë bana chiquitia. Aín banan ca uni itsi ñui cëmëia. Usaquin ca amia cëmëcë uni masá nuitumia. Aín banax ca runun cuëbínu ꞌicë muca, an uni paëocë, usaribi ꞌicën.

¹⁴ Usa ꞌaish ca uni itsi ñui ꞌatimati bananan uni itsimi nishi banaia.

¹⁵ Sinánñumasa ꞌixun ca uni ꞌatishi sinania.

¹⁶ Uinu cara cuania anuxunbi ca ꞌatimati banaquin masá nuitumianan uni ꞌatimamia.

¹⁷ Ca uni itsibë nuibanani upiti ꞌiti ꞌunaníma.

¹⁸ Axa nun cushi ꞌaínbi ca Nucën Papa Diosmi racuë́ti sinaníma.

^19-20 Usa banacama ca judíos unibunën cuanun Nucën Papa Diosan aín unicama cuënëomiacëxa quixun cananuna ꞌunanin. Aín bana ꞌináncëma pain ꞌixun ca Nucën Papa Diosan judíos unicama ainan ꞌinun ꞌimiacëxa. Ainan ꞌimitancëxun ca uisaira cara ainan ꞌaish uni upí ꞌiti ꞌicë quixuan ꞌunánun aín bana judíos unicama ꞌináncëxa. A bana isquin ca judíos unicamainshima camabi unin ꞌunánti ꞌicën, uisairai ꞌi cara Nucën Papa Diosan iscëx atun nuitu upíma ꞌicë quixun.

Cristomi catamëcë unicamaxa Nucën Papa Diosan iscëx ꞌuchañuma ꞌicë ñuicë bana

²¹ Moisésnën usai judíos unicama ꞌiti cuënëo bana ꞌacë cupíma Cristo cupíshi ca usaira oquin Nucën Papa Diosan uni upí ꞌimia quixun ca bërí camabi unin upí oquin ꞌunánti ꞌicën. Ca usai ꞌiti ꞌicë quixun ca Moisés ꞌimainun an Nucën Papa Dios quicë bana uni ñuixuncë unicamanribi cuënëocëxa.

²² Camabi uni an Jesucristomi catamëquin —aín quicësabi oquin ca ꞌën ꞌuchacama tërë́nti ꞌicë —quixun ꞌunáncë, acama ca Nucën Papa Diosan upí isia. Jesucristomi catamëcë cupíshi ca an judíos uni ꞌimainun judíosma uniribi upí isia.

²³ Camabi unix ca Nucën Papa Diosan iscëx ꞌuchañu ꞌicën. Upíira ꞌinuan Nucën Papa Diosan unio ꞌaíshbi ca usama ꞌicën.

²⁴ Usa ꞌicëbi ca Jesucristo, camabi unin ꞌucha cupí bama ꞌaían, cupíoima ami catamëtiashi Nucën Papa Diosan nuibaquin aín ꞌucha tërë́nquin uni ꞌuchañuma isia.

²⁵ Ami catamëtía, uni aín ꞌuchacama tërë́ncë ꞌinun ca camabi unin ꞌucha cupía Cristo bamanun Nucën Papa Diosan mëníocëxa. An Jesucristo bamati mënío ꞌixun ca bëráma ꞌiá uniribi, axa sinanatia Nucën Papa Diosan aín ꞌuchacama ashiquin manumiacëxa. Usaquin an ꞌá cupí ca camabi unin ꞌunánti ꞌicën, Nucën Papa Diosan ca asérabi upíira upí ꞌixun an usai ca ꞌiti ꞌicë quixun mëníosabi oquin ꞌaia quixun.

²⁶ Usaribi oquin ca, Nucën Papa Diosan Jesucristo bamati mënío ꞌixun, bëríribi axa Jesucristomi catamëcë unicama aín ꞌuchacama tërë́nquin manumia. Usaquin ꞌacë cupí ca camabi unin ꞌunánti ꞌicën, asérabi ca Nucën Papa Diosan upíira upí ꞌixun an usai ca ꞌiti ꞌicë quixun mëníosabi oquin ꞌaia quixun.

²⁷ An usai ca uni ꞌiti ꞌicë quicë bana quicësabi oquin ꞌacë uni, ax sapi ca rabíti ꞌicën, —ꞌën nuitu ca Nucën Papa Diosan upí isia —quixun sinani. Usa ꞌaínbi ca axa Jesucristomi catamëcë unin ꞌunania, —Jesucristo cupíshi ca Nucën Papa Diosan ꞌë upí isia —quixun. Usaquin ꞌunani ca rabitíma.

²⁸ Cananuna ꞌunanin, aín ñu upí ꞌacë cupíma, Jesucristomi sinani ami catamëcë cupíshi ca uni Nucën Papa Diosan aín ꞌuchacama tërë́nquin an iscëx upí ꞌinun ꞌimia quixun.

²⁹ ¿Nucën Papa Diosan cara judíos unicamaishi aín uni ꞌimianan judíosma unicamaribi aín uni ꞌimitima ꞌic? Ca aturibi ainan ꞌimiti ꞌicën.

³⁰ Nucën Papa Dios ax ca achúshi ꞌicën. An ca judíos unicama ꞌacësaribi oquin judíosma uniribi Jesucristomi catamëcë cupíshi, an iscëx aín nuitu upí ꞌinun ꞌimia.

³¹ ¿Jesucristo cupíshi cana ꞌën ꞌucha tërë́ncë ꞌaish Nucën Papa Diosan iscëx upí ꞌai quixun sinánquin caranuna Nucën Papa Diosan bana Moisésnën cuënëo ax ca cuatima ꞌicë quixun sinánti ꞌain? Usama ca. Jesucristomi catamëtishi cananuna asérabi Nucën Papa Diosan bana quicësabi oíira ꞌiti ꞌai quixun cananuna unicama ñuixunin.