Romanos 2 - Kashibo-Kakataibo Biblia

Unin sináncama Nucën Papa Diosan ꞌunáncë

¹ Mitsúnmi uni itsi ꞌuchocëbëtanbi ca uni raírinën ꞌunánti ꞌicën, mitsun camina usa ñu ꞌati ca ꞌucha ꞌicë quixun ꞌunanin. Usa ꞌain camina minribi usa ñu ꞌatancëx —ꞌunánxunma cana ꞌa —quitima ꞌain.

² Cananuna ꞌunanin, Nucën Papa Diosan ca uni aín ꞌucha cupí uisa cara oti ꞌicë usoquin ꞌaquinbi, upí oquin sinánquin an mëníosabi oquin ꞌaia quixun.

³ ¿Bëtsi unimi, an ca ñu ꞌaisama ꞌaia quiax manánquinbi minribi usaribi oquin ñu ꞌacëbi ca Nucën Papa Diosan a unishi ꞌuchonan mi ꞌuchotima ꞌicë quixun caramina sinanin? Usama ca.

⁴ Camina ꞌunánti ꞌain, Nucën Papa Diosan ca mi nuibaíranan, mi ꞌatima ñu ꞌacë ꞌicëbi ꞌatimoquinma mix sinanati ami sinánun cainia. ¿Axa usa ꞌaínbi caramina min ꞌatima ñu ꞌacë ëni ami sinántisama tanin?

⁵ Usa ꞌaínbi camina min sinan ꞌaisama ꞌaish sinanaisama tan. Usai ꞌiquin camina ënquinma camabi nëtën ꞌatima ñuishi sinánquin usaquin ꞌain. A cupí camina anúan Nucën Papa Diosan ꞌuchañu unicama aín ꞌucha cupí castícanti, a nëtën ꞌaisamaira oquin castícancë ꞌinuxun ꞌain.

⁶ A nëtën ca Nucën Papa Diosan camabi uni uisaquin cara oti ꞌicë quixun isti ꞌicën, atun ñu ꞌacësabi oquin.

⁷ Axa —Nucën Papa Diosan ca ꞌë upí isquin abë nëtë́timoi tsónun ꞌimiti ꞌicë —qui cuëëncë uni, an ca ënquinma Nucën Papa Dios cuëëncësabi oquin ñu ꞌaia. Usoquin an ꞌacë uni a ca Nucën Papa Diosan xënibua ꞌaínbi abë ꞌinun ꞌimia.

⁸ Usaquin ꞌimianan ca uicamax cara ami sinántisama tanan aín bana quicësabi oquin ꞌaisama tanquin, atux cuëëncësa oquinshi ñu ꞌatima ꞌaia, a unicama Nucën Papa Diosan ami nishquin castícanti ꞌicën.

⁹ An castícancë ꞌaish ca an ñu ꞌaisama ꞌacë unicama aín ꞌucha cupí, Nucën Papa Diosbë xënibua ꞌaínbi ꞌíma ꞌaisamairai tëmërati ꞌicën. Judíos unibunëxëshia tëmërati ꞌaínbi ca judíosma unibunëxribi aín ꞌucha cupí tëmërati ꞌicën.

¹⁰ Usa ꞌaínbi ca Nucën Papa Diosan an ainan ꞌixun ax cuëëncësabi oquin ꞌacë unicama a uisa ñu cara ꞌicëbëbi bënëtima chuámarua ꞌinun ꞌimianan, abë aín nëtënu ꞌinun ꞌimiti ꞌicën. Judíos unibu ꞌimainun judíosma uniburibi ca an usaquin ꞌimiti ꞌicën.

¹¹ An ca judíos unisaribi judíosma unicamaribi isia.

¹² An Nucën Papa Diosan bana Moisésnën cuënëo, a ꞌunáncëma ꞌixun ñu ꞌatima ꞌacë unicamax ca atun ꞌucha cupíbi ainanma ꞌaish Nucën Papa Diosbë ꞌitima ꞌicën. ꞌImainun ca an Nucën Papa Diosan bana Moisésnën cuënëo ꞌunánquinbi a bana quicësabi oquin ꞌaquinma ñu ꞌatima ꞌacë unicama atux ca aín ꞌucha cupí, a bana quiásabi oquin Nucën Papa Diosan ꞌuchocë ꞌiti ꞌicën.

¹³ Aín bana ꞌunánquinbi a bana quicësabi oquin ꞌacëma uni a ca Nucën Papa Diosan upí isima. Usa ꞌaínbi ca an a bana ꞌunánquin ax quicësabi oquin ꞌacë unicama a cuni Nucën Papa Diosan upí ꞌicë isia.

¹⁴ Usa ꞌain ca judíosma unin Nucën Papa Diosan bana Moisésnën cuënëo ꞌunánquinmabi atúnbi sinánquin a bana quicësabi oquin ꞌacë ꞌixun, uisa ñu ꞌati cara ꞌaisama ꞌicë, uisa ñu ꞌati cara upí ꞌicë quixun ꞌunania.

^15-16 Usoquin upí ñu ꞌaia isquin ca uni itsin ꞌunánti ꞌicën, a unicaman ca asérabi aín nuitu mëu ꞌunania, uisa ñu ꞌati cara asábi ꞌicë ꞌunánan uisa ñu ꞌati cara ꞌaisama ꞌicë quixun. Anúan Nucën Papa Diosan camabi uni isti nëtën ca a unicaman aín nuitu mëúbi ꞌunánti ꞌicën, Nucën Papa Diosan cara ꞌë upí isti ꞌicë, cara ꞌë upíma isti ꞌicë quixun. A nëtën ca Nucën Papa Diosan camabi uni uisa ñu cara ꞌaxa quixun ꞌunánan uisa ñu cara unë́xun aín nuitu mëúbi sinánxa, a camabi ꞌunánquin, uisa cara oti ꞌicë usoquin ꞌanun Jesucristo ꞌamiti ꞌicën, ꞌën unicama ñuixuncësabi oquin.

Moisésnën cuënëo bana ꞌunánquinbia judíos unicaman ꞌacëma ñuicë bana

¹⁷ Usa ꞌaínbi camina —ꞌëx cana judío uni ꞌai —quianan —usaía judíos unicama ꞌinun Moisésnën cuënëo bana ꞌunáncë ꞌaish cana Nucën Papa Diosan iscëx upí ꞌai quianan —judíosma unicamama, nuishi ca Nucën Papa Diosan ainan ꞌinun caísacëxa —quixun sinani rabiacatin.

¹⁸ Moisésnën cuënëo bana ꞌunáncë ꞌixun camina uisa oquin unin ñu ꞌati cara Nucën Papa Dios cuëënia quixun ꞌunánan a banaxa quicësabi oquin ꞌaquin ca unin upí ñu ꞌaia quixun ꞌunanin.

¹⁹ Usa ꞌaish camina, ꞌën cana an Nucën Papa Diosan bana ꞌunáncëma unicama bëxuñusa ꞌaísha bëanquibucënu nicësa ꞌicëbi a bana ꞌunánmiti ꞌai quin.

²⁰ Moisésnën cuënëo bana ca uisai cara judíos uni ꞌiti ꞌicë quiax asérabi quia. A bana ꞌunani camina quin, ꞌën cana an ënë ñucama ꞌunáncëma unicaman upí oquin cuanun ꞌunánmiti ꞌain.

²¹ ¿Mitsun Nucën Papa Diosan bana ꞌunánquin uni itsi ꞌunánmicë ꞌixunbi caramina uisa cupí a bana quicësabi oquin ꞌaiman? ¿Mitsun, unin ca uni itsin ñu mëcamatima ꞌicë quixun caquinbi caramina uisa cupí mitsúnribi ñu mëcamatin?

²² ¿Mitsux, aín xanuma ꞌain ca uni itsin xanubë uni ꞌitima ꞌicë quibi caramina uisa cupí mitsúxribi min xanuma ꞌaínbi uni itsin xanubë ꞌin? ¿Diosma ꞌicëbi ax isa dios ꞌicë quixun unin cacë, a rabiti ca ꞌaisama ꞌicë quixunbi caramina uisa cupí anuxun usa ñu rabiti xubunu atsíntancëxun anu ꞌicë ñu mëcamatin?

²³ Mitsux —ꞌën Moisésnën cuënëo bana ꞌunáncë ꞌaish cana Nucën Papa Diosan iscëx upí ꞌai —quixun sináncë ꞌixunbi a bana quicësabi oquin ꞌacëma ꞌain ca uni itsin mitsun ꞌaia isquin sinánti ꞌicën, —Nucën Papa Diosan unix usai ꞌicë ꞌain cana aín uni ꞌiisama tani —quixun.

²⁴ Asérabi mitsu ñui ca Nucën Papa Diosan bana cuënëo ësai quia: “Mitsux judíos unibu ꞌixunbi ñu ꞌaisama ꞌaia isi ca judíosma unibunëx Nucën Papa Diosmi ꞌatimati banaia”.

²⁵ Mitsun Nucën Papa Diosan bana Moisésnën cuënëo quicësabi oquin asérabi ꞌacë ꞌain ca mitsúxmi ꞌunántioraca ax asábi ꞌicën. Usa ꞌaínbi ca a bana quicësabi oquinmi ꞌacëma ꞌain, mitsúxmi ꞌunántioraca ax ñancáishi ꞌicën.

²⁶ Usaribi oquin ca unicama ax ꞌunántiocëma ꞌixunbi ami catamëquin aín cuëëncësabi oquin ꞌacë ꞌicë Nucën Papa Diosan upí isia, axa ꞌunántioracacë unicama ꞌacësaribi oquin.

²⁷ Usa ꞌain ca an ꞌunántiocëma ꞌixunbi Nucën Papa Dios cuëëncësabi oquin ꞌacë uni a Nucën Papa Diosan upí isti ꞌicën. Isanan ca an ꞌunántiocë ꞌixunbi Nucën Papa Diosan bana ꞌunánquinbi a bana quicësabi oquin ꞌacëma unicama Nucën Papa Diosan upíma isti ꞌicën.

²⁸ ꞌUnántioracacë cupíshima ca uni judío uni ꞌicën. ꞌImainun ca ꞌunántioracacë uni, ax ꞌunántioracacëishima asérabi Nucën Papa Diosmi catamëcë ꞌiti ꞌicën.

²⁹ Axa aín nuitu mëu upiti Nucën Papa Diosmi sináncë uni ax ca asérabi judío uni ꞌicën. ꞌUnántioracacë uni ax ca Moisésnën cuënëosabi oquin aín namishi usoquin ꞌacë cupíma aín nuitu mëu Nucën Papa Diosmi sináncë cupí asérabi judío uni ꞌicën. Usa uni ca unían upí isiamabi Nucën Papa Diosan upí isia.