Romanos 1 - Kashibo-Kakataibo Biblia

Romanu ꞌicë axa Jesucristomi catamëcë unicama Pablonën quirica buánmia

¹ ꞌËx cana Pablo ꞌain, an Jesucristo quiásabi oquin aín bana uni ñuixuncë. Usa ꞌixun cana mitsu quirica buánmin. Nucën Papa Diosanbi ca Jesucristomi catamëquin ainan ꞌinux ië́nun unicama aín bana ñuixunun ꞌë caísacëxa.

² Nucën Papa Diosan ca ainan ꞌinux ië́ti bana an sinánmicëxun aín bana uni ñuixuncë unicama bëráma cuënëomiacëxa.

³ A cuënëomia banax ca aín Bëchicë, Nucën ꞌIbu Jesucristo ñui quicë ꞌicën. Aín ꞌunan papa ax ca Davidnën rëbúnqui ꞌiacëxa.

⁴ Usa ꞌicëbi ca bamatancëx baísquicë cupía, Nucën Papa Diosan Bëru Ñunshin Upitan ꞌamicëxun unin ꞌunánti ꞌicën, Nucën ꞌIbu Jesucristo ax ca Nucën Papa Diosan Bëchicë ꞌianan asaribi upí ꞌaish cushiira ꞌicë quixun.

⁵ Jesucristo cupí ca Nucën Papa Diosan nuibaquin nun nu uni aín bana ñuixunun mëníocëxa, camabi menua an Nucën ꞌIbu Jesucristomi catamëquin an cacësabi oquin ꞌacë unicama ꞌinun.

⁶ Mitsúxribi camina Nucën Papa Diosan Jesucristonan ꞌinun caíscë ꞌain.

⁷ Ënë quirica cana cuënëoxunin, Roma ëmanuaxmi Nucën Papa Diosan nuibaquin ainan ꞌinun caíscë ꞌaish ax cuëëncësabi oi ꞌicë, micamaishi. Nucën Papa Dios ꞌimainun Nucën ꞌIbu Jesucristonën nuibaquin ꞌaquincëxmi chuámarua bucucanti cana cuëënin.

Romanu cuantia Pablonën sinan

⁸ Ësoquin pain cana mitsu cain, mitsux camina asérabi Jesucristomi catamëti quixun camabi menu ꞌicë unicaman chanioia cuaquin, cana ꞌëxribi Jesucristonan ꞌixun Nucën Papa Dios —asábi ca —quixun caquin a rabin.

⁹ ꞌËn cana Nucën Papa Dios cuëëncësabi oquin chiquíshquinma aín Bëchicë ñuiquin unicama bana ñuixunin. An ca ꞌunania, ꞌën cana abë banaquin nëtë camabi mitsu ñucáxunin.

¹⁰ Mitsu ñucáxuanan cana a ñucatin, bëráma cuainsa taníbi cuancëma cupí, bërí mitsu isi cuanuan ꞌë ꞌaquinun.

¹¹ Mitsúxmi asérabiira Jesucristomi cushicë ꞌinun ꞌaquinuxun cana mitsu isi cuainsa tanin.

¹² ꞌËx Jesucristomi cushicë ꞌixun ꞌaquincëxmi mitsúxribi ami cushicë ꞌain mitsubë cushionani cuëënmiananux cana mitsu isi cuainsa tanin.

¹³ ꞌËn xucë́antu, cuainsa taníbi cana cuancëma ꞌain. ꞌItsai cana mitsu isi cuainsa tan quixunmi ꞌunánti cana cuëënin. Mitsúxmi Jesucristomi catamënun, bëtsi menu ꞌicë unicama ꞌaquincësaribi oquin mitsu ꞌaquini cuainsa cana tan.

¹⁴ Raëcë ꞌimainun raëcëma unicama, ꞌimainun an quirica ꞌunáncë ꞌimainun an quirica ꞌunáncëma unicama, a unicamanbi Jesucristo ñui quicë bana ꞌunánun cana an cacësabi oquin ꞌën aín bana ñuixunin.

¹⁵ Usa ꞌaish cana ꞌëx, Roma ëmanu ꞌicë mitsuribi anun Jesucristomi catamëti Nucën Papa Diosnan ꞌiti bana ñuixuinsa tanin.

Uisai cara Jesucristomi catamëti ꞌicë quicë bana ꞌicë quixun Pablonën ñuia

¹⁶ ꞌËx cana ënë bana unicama ñuixuni rabiniman. Axa a bana quicësabi oi Jesucristomi catamëcë uni a ca Nucën Papa Diosan aín cushínbi ainan ꞌinun ië́mia. Judíos unicama pain ñuixuntancëxun cana judíosma unicamaribi a bana ñuixunin.

¹⁷ A bana ꞌunáncë ꞌixúinshi cananuna ꞌunanin, uisaira oquin cara Nucën Papa Diosan ainan ꞌinun nu ië́mia quixun. Nun ꞌucha tërë́nun Jesucristomi catamëtiashi ca ainan ꞌinun nu ië́mia. Usai ami catamëcë cupíshi cananuna Nucën Papa Diosnan ꞌiti ꞌain. Usai ca ꞌiti ꞌicë quiax ca aín bana cuënëo ësai quia: “Ui unicama cara Nucën Papa Diosan upí isia, ax ca asérabi ami catamëti tsóti ꞌicën”.

Unicaman Nucën Papa Dios ꞌunánma bana

¹⁸ Cananuna ꞌunanin, Nucën Papa Diosan ca an aín bana quicësabi oquin ꞌaisama tancë ꞌixun bëtsi uniribi ami sinánxma ꞌinun quixun paráncë unicama, a uisa cara oti ꞌicë usoquin castícanti ꞌicë quixun.

¹⁹ Usa unicamax ca an unio ñucama isquinshi uisaira cara Nucën Papa Dios ꞌicë quixun ꞌunántisa ꞌaíshbi ami sinanima.

²⁰ Isquinmabi ca unin Nucën Papa Dios ꞌunánti ꞌicën, an unio ñucama isquin. Usa ꞌain ca an camabi ñu unio cupí, unin Nucën Papa Dios, ax ca asérabi Dios ꞌicë quixun ꞌunánan ax ca nëtë́timoi usabi cushiira ꞌicë quixun ꞌunántisa ꞌaíshbi ami sináncëma ꞌicën. Usa ꞌaish ca, ꞌunáncëma ꞌaish cana ami sináncëma ꞌain, a unicamax quitima ꞌicën.

²¹ A unicaman, ui cara Nucën Papa Dios ꞌicë quixun ꞌunánquinbi ca a sinánquin, —mix camina Nucën Papa Dios ꞌai —quixun caiman. Nucën Papa Diosan ñu ꞌaxuncëxunbi ca a unicaman —camina nu ñu ꞌaxuan, ca asábi ꞌicë —quixun rabiquin cacëma ꞌicën. Caquinma atun sináncësa oquinshi ꞌacë ñuishi ꞌacë ꞌixun ca ꞌatima ñuishi ꞌai sinánñuma unisa ꞌicanxa.

²² —ꞌËx cana sinánñu ꞌai —quicë ꞌaíshbi ca sinánñumasa ꞌicën.

²³ Usa ꞌixun ca Nucën Papa Dios, ax cushiira ꞌaish bamatimoi tsócë, a rabiquinma ami manúanan axa bamati ꞌaínbi uni iscësa oquin ñu unionan ñuina pëchiñu ꞌimainun axa men nirícë ñuina, axa men nicë ñuina, acama iscësa oquin —ax ca nun dios ꞌicë —quiquin a rabinuxun unioia.

²⁴ Usa ꞌain ca Nucën Papa Diosan atúxa upí ꞌiti ꞌaquinti ëanan a unicaman aín cuëëncësabi oquin ñu ꞌatima ꞌanun ëanxa. Usaquian Nucën Papa Diosan ëncëxun ca atúnbi a ꞌai rabínquinma ꞌatima ñuira ꞌaxa.

²⁵ Usa ñu ꞌaquin ca Nucën Papa Diosan bana cuaquinma, unin cëmëquin ñuicë banaishi sinánxa. Nucën Papa Dios, an camabi ñu unio, a rabiquinma ca an unio ñuishi rabiaxa. Nucën Papa Dios ax ca xënibua ꞌaínbi aira unin rabicë ꞌiti ꞌicën.

²⁶ Atúxa usa ꞌicë ca Nucën Papa Diosan atúan cuëëncësabi oi ꞌiquian ñu ꞌatima ꞌanun ëanxa. Xanúxribi ca bënëñu ꞌiisama tani bëbúxmabi bëtsi xanubë ꞌia.

²⁷ Usaribiti ca nucë bënë uníxribi xanuñu ꞌiisama tani, xanúxmabi bëtsi unibë ñunshini ꞌia. Usai ꞌiquin ca uni itsi rabínmia. Usai ꞌi ca asérabi nucë bënë unin ꞌacësa oquin sinaníma axbi ꞌuchai Nucën Papa Diosmi sinántisama tania.

²⁸ Usa unicama ca ami sinántisama tania Nucën Papa Diosan aín sinan upíma ꞌixun ꞌatima ñuira ꞌanun quixun ëanxa.

²⁹ Usa ꞌixun ca uisa ñucamax cara ꞌatima ꞌicë acama ꞌaia, bëtsi uni ꞌatimonan, ainanmabi uni itsin ñu biisa tanan, aín xanuma ꞌaínbi xanubë ꞌianan, xanúxmabi bëtsi unibë ꞌianan, bëtsi uni ꞌicësamaira oi ñuñu ꞌiisa tania. ꞌIanan ca uni ꞌaisa tanan, bëtsibë cuëbicanánan, uni itsi paránan, uni itsimi ꞌatimati banaia. Usa ꞌaish ca a unicamax ꞌaisamairai banai uni itsimi manania.

³⁰ Usai ꞌi ca uni itsi ñui cëmëanan ami sinanima Nucën Papa Diosmi manutia. Usai ꞌiquin uni itsi —ꞌaisama ca —quixun ñuianan ca abi rabiacati cërúanan raíri unimi nëtëtima ꞌësë́nanan aín tita aín papan bana cuaisama tania.

³¹ Usa ꞌaish ca sinánñuma ꞌianan, aín quicësabi oquin ñu ꞌacëma ꞌianan uni itsi nuibacëma ꞌianan abë nishananxbi uni itsibë mëníonainsama tanan ꞌaquinsa ꞌicëbi uni ꞌaquinima.

³² Atun ca ꞌunania, Nucën Papa Diosan mëníosabi oi ca usa unicama ainanma ꞌaish xënibua ꞌaínbi abë ꞌitima ꞌicë quixun. Usaía Nucën Papa Dios quia a ꞌunánxunbi ca usa ñu ꞌaia. Atúinshi ꞌaíma ca uni itsínribia usaribi oquin ꞌaia isti cuëënia.