Proverbios 8 - Kashibo-Kakataibo Biblia

Usai ñu ꞌunan ꞌaish upí ꞌiti bana

¹ Ñu ꞌunankë ꞌiti axa munuma banai kikësai ꞌimainun ka; sinánñuira ꞌiti axribi ꞌain bana kuanun munuma banai kushin kikësa ꞌiti ꞌikën.

² Ax ka ꞌain bashi tësapanu nirakëkësa ꞌianan, anun ꞌinúkë baikamanu nirakëkësa,

³ ꞌianan ka anun atsínti xëkuë chakama ꞌurama nirakëax, anun ëmanu atsínti xëkuënuax kikësa ꞌikën:

⁴ ꞌËx kikë banakama ënëx ka mitsun kuati kikë bana ꞌikën.

⁵ Bëná unikama ñu ꞌunairatisamakama, ¡mitsun kamina ꞌashi buinxun upíokin ñu ꞌati ꞌunánti ꞌain!

⁶ ꞌËn mitsun uisa ñux kara upí ꞌikë kanan, uisa ñu ꞌaia kara bëtsin añux ka ꞌatima ꞌikë mi katima bana kamainun kamina kuati ꞌain.

⁷ ꞌËn mitsu kati bana ax ka asérabi ꞌëx kikë ꞌikën, ꞌëx kana këmëi banati kuëëniman.

⁸ Kamabi bana ꞌëx kikë ax ka asérabi upí ꞌikën; a bananu ka këmëi banakësa bana ꞌaíma ꞌikën.

⁹ Uin kara ꞌën bana kuatia, an ka ꞌën banakama ax ka asérabima ꞌikë kixun mitsu katima ꞌikën.

¹⁰ Usa ꞌain ka ñuñu ꞌisatanan kuríkiñu ꞌianan kuriñu ꞌisatankin sinánkë a ꞌimainun ꞌën ꞌunánmikë banakama ꞌashi ꞌunánkanti ꞌikën.

¹¹ Ñu ꞌunáinrakë ꞌiti ax ka maxá upíira pënë́kë abëbi sënë́nmaira ꞌianan; ¡kuëëinrakin bikë ñukama axi abë sënë́nma ꞌikën!

¹² ꞌËx kana ñu ꞌunáinrakë a ꞌain, usa ꞌaish kana sinaínrakë abëbi ꞌin, usa ꞌixun kana upíokin bana ñuixunkë a mërati ꞌunan.

¹³ Uin kara Diosan kakësokin ꞌaia an ka ñu ꞌatimakama a timati ꞌikën. ꞌËx kana rabiakakë ꞌimainun, bëtsi unibëtan sënë́nma kana ꞌai kikë uni ami ꞌianan, ꞌatima ñu ꞌakë ꞌimainun këmëi banakë uni amiribi nishin.

¹⁴ Ënu ka anun ësëananti a ꞌimainun anun ñu upíshi ꞌakin pëuti ax ꞌikën, ꞌianan kana ꞌëx anun ñu ꞌunainra ꞌiti a ꞌianan, kana kushiñu ꞌiti aribi ꞌain.

¹⁵ ꞌË kupínka ꞌapukama ꞌapu ꞌia, usa ꞌain ka aín kushikaman usai uni ꞌiti bana nania.

¹⁶ ꞌËn kana ꞌapukama aín kushibu, ꞌimainun anun sipuanuxun kati bana kikësabiokin ꞌapukama anun ꞌamin.

¹⁷ ꞌËn kana uikaman kara ꞌë nuibatia a kamaribi nuibatin, ꞌimainun ka uikaman kara ꞌë baria a kamanribi ꞌë mëraia.

¹⁸ ꞌËn kana nuibakin ñuñuira ꞌimikin, ꞌaisamaira ñuñu ꞌia bëráma ꞌiásamaira ꞌinun ꞌimin.

¹⁹ ꞌËn ꞌinánkë ax ka kuri charokëxa upíira ꞌikë iskësamaira ꞌikën; ꞌimainun ka ꞌën ꞌinántisa tankë ax manë uxua upisamaira ꞌikën.

²⁰ ꞌËn kana ñu upí ꞌati sinani bai puntëtan nikësa ꞌixun, upí ñushi ꞌati sinanin.

²¹ Usa ꞌixun kana an ꞌë nuibakë akamaribi ainan ꞌiti ñu ꞌinánti ꞌain; usokin ꞌakëx ka aín xubukamanu ꞌitsaira ñu upíñu ꞌiti ꞌikën.

²² Nukën ꞌIbu Diosan ka kamabi ñu uniokin ꞌë irapain uniokëxa, usakin ꞌë pain ꞌatankëxun ka kamabi ñuribi uniokin taëokëxa.

²³ Usakin ka me uniokëmapan ꞌixun ꞌë irapain. Uniokë ꞌiakëxa.

²⁴ ꞌË irapain ka parúmpapakamabëa, xëxákama ꞌimainun baka rarakama ꞌisama pain ꞌain uniokëxa.

²⁵ Bashikama ꞌimainun matá mekama ꞌaisama pain ꞌixun ka Diosan ꞌëira pain ꞌati sinánkë ꞌiakëxa;

²⁶ usa ꞌaínbi ka me unionan anua kóti ñukamaribi ꞌanan, uisa me chamarabi uniokëmapan ꞌiakëxa.

²⁷ Uínsaran kara naíkamë ꞌëo kuman batsisa a; parúmpapa chaiira manámia ꞌinun uni oia anu kana ꞌëxribi anu ꞌiakën.

²⁸ Uínsaran kara naíkamë ꞌëonu anubia ꞌitinu nëtë kuin ꞌimianan, parúmpapa nëminra anubia ꞌitinu ꞌimianan,

²⁹ anubia rakanun parúmpapa baka kanan, meribi anuaxa shaíkitinuma ꞌimia,

³⁰ anu kana ꞌëxribi a ënima abëbi ꞌiakën. Anu kana an ñu uniokë unisa ꞌaish nëtë́tibi ꞌëx kuëënmi anu ꞌiakën, usai ꞌikana an ismainunbi kamabi nëtë abë kuaiakën;

³¹ usa ꞌain kana Diosan me uniokë ꞌain anuax kuëëni, ¡chuámaruatankin unikamabë kana ꞌëx ꞌai kixun sinani kuëëankën!

³² Usa ꞌain kamina bërí mitsux uni bënábu ꞌixun ꞌën kakëxun kuati ꞌain; kuati kamina ꞌëx ꞌikësaribiti ꞌi chuámarua ꞌikanti ꞌain.

³³ ꞌËn ꞌësëkin kakëxun kuanan kamina; sinánñuira ꞌiti bana ꞌën mitsu ñuixunkë ënëribi kuaisamatankin timatima ꞌain.

³⁴ Chuámarua ka uin kara ꞌën kakëxun ꞌën bana kuatia ax ꞌiti ꞌikën, ꞌianan ka kamabi nëtë́an an bërúankë unisa ꞌixun ꞌën xubu xëkuë kamanuxun, bana kuati ukë a ka Diosan ꞌakinti ꞌikën.

³⁵ Uin kara ꞌën kakëxun kuatia an ka uisai ꞌira kara upiti tsóti ꞌikë kixun ꞌunánti ꞌikën, usai ꞌia ka Diosan kuëënkin ꞌakinti ꞌikën;

³⁶ usa ꞌaínbi ka uix kara ꞌën kakëxun kuaisama tani ꞌuchaia a unix ka uisa ñu kara ꞌiti ꞌikë kixun ꞌunánimabi tsóti ꞌikën; ¡uikaman kara ꞌën kakëxun ꞌën bana kuaisamatania an ka aín bamati baria!