Proverbios 7 - Kashibo-Kakataibo Biblia

Xanu bëtsi bëtsi unibë ꞌikë uni paráni usai kikë bana

¹ ꞌËn kakëxun kamina ꞌën banakama kuati ꞌain, bëná unikaman, ꞌën bakë bëchikësa ꞌikë kana mi kain; ꞌën mi kakë ax kikësaibi ꞌiti banakama ënë kamina manukinma sinánti ꞌain.

² ꞌËn bana ax kikësaibi ꞌiti ꞌimainun a ꞌunánti bana mi ꞌunánmikë akama kamina; min bëru napu ami ꞌakësaribi okin upíokin bërúanti ꞌain, usakin ꞌai kamina upí tsókanti ꞌain.

³ ꞌIanan kamina min mëkënan tuinkësa ꞌitánun ꞌakin, min maxkánubi ꞌinun upíokin ꞌunánti ꞌain.

⁴ Min chirabakë xanusaira ꞌikë ñu ꞌunainra ꞌiti a nuibanan, kamina min ꞌunánkë uni ꞌakësaribi okin sinánñuira ꞌiti bana aribi manukinma sinánti ꞌain.

⁵ Usakin a banakama ꞌunánkë ꞌixun kamina, an bëtsi ënxun bëtsi uni bikë xanun abë ꞌinun kakëxbi abë ꞌikinma, bana upitan mi kuëmëninkin kakëxunbi kuëëntima ꞌain.

⁶ Achúshi nëtën kana ꞌën xubu xëkuë chukúma anun isti ꞌakë anun, uanxun aín xabankënën iskëxbi ka,

⁷ uni bënákama an usa ka kixun ñu ꞌunairakëmakama, anu ꞌiakëxa, atubë ka achúshi uni bëna an ñu ꞌatima ꞌati kuëëinrakë ꞌiakëxa usa ꞌikë kana a isakën.

⁸ Iskëx ka anun xubunu kuanti bai kuanx anu këñúkë anun shitákiani, kuani amia xanu aín xubu ꞌikë amibi kikiani kuankëxa.

⁹ Kuanbi ka xupibuti ñantanbukëbë bë́ankibuakëxa.

¹⁰ Usaia ꞌikëbëa xanu aín ꞌikënuax chikitia uni an iskëxbi ka bëtsi bëtsi unibë ꞌikë xanu ꞌikësaibi upiti mëníokakin upí chupa pañuxunbi aín nami bërúankëma ꞌiakëxa,

¹¹ usa ꞌaish ka achúshi xanu an bënë́kinshi ñu ꞌakë ꞌimainun abi sinánxun uisa ñu kara ꞌaisatania usakin ꞌanan, aín xubunubi tsóti ꞌunánma ꞌaish,

¹² kuainbëkinishi ëmanu nianan anua uni tanti tsóti ꞌakë, ꞌianan anun uni nikë bai aín sënë́nkë anuxunbi kainxun, uinu ꞌikë uni pain kara mëraia a bixun banakinkë xanu ꞌiakëxa.

¹³ Usa ꞌain ka xanu an uni bëna a ꞌikúkin bikin bëtsuku kakin, sinanimaishi banakin kakëxa:

¹⁴ ꞌËn dioskama xaroxunkin bikë nami ꞌën xubunu ꞌikë a ꞌëbë kuanxun pi kuanti kaina kuëëntima ꞌain, bërí kana ꞌën usokin ꞌakatsi kikë usokinbi ꞌaxuntankëx asábi ꞌiti ꞌain.

¹⁵ Usa ꞌain kana mibë mërananux anumi ꞌikë anu chikían; ¡ꞌianan kana mi istisaira tan, usa ꞌain kana bërí mi mëran!

¹⁶ Anu ꞌëx ꞌuxkë anu kana upíira okin lino anun rakuti ꞌakë egipcionua ꞌën marukë a ꞌapabëtsian,

¹⁷ ꞌanan kana sanuira ꞌitánun áloe ꞌimainun canela kakë ro a ꞌimainun aroma kakë mirra ꞌakë anúnribi ꞌabëtsian.

¹⁸ Usa ꞌain kamina ꞌëbë anuxunu nun kuëënkësokin; pëkaratamainun ꞌë nami mi ꞌaminun anu kuanti ꞌain, usai ꞌi kananuna anuax nu rabë́ kuëënti ꞌain,

¹⁹ ꞌën bënë ka ꞌën xubunuma ꞌikën: an ka ꞌuraira kuankin ꞌëratsushi ꞌë ëbianxa;

²⁰ kuankin ka achúshi pisha kuríki buánxa; usa ꞌain ka anun ꞌuxë turuti nëtë ꞌitámainun masima utima ꞌikën.

²¹ Usokin bana upitan kakëx, kuëënkin ka uni bëna kana ꞌati ꞌai kixun sinánbiani,

²² uni bëna ax xanu a nuibiani abë kuani: vaca bënë anuxun ꞌatinu buánkëx kuankësa usaribi kiani kuanxa, usai ꞌika chaxu ami ꞌiti maban nankëmi ꞌikë usairibi ꞌia,

²³ pian aín xabánu ꞌakëx ꞌikësa usaribiti ꞌianan; ñuina pëchiñu ami ꞌiti nankë ꞌaínbi ami, ꞌi kana bamati ꞌai kixun ꞌunaxmabi ami ꞌikësa usaribiti ꞌiaxa.

²⁴ Usa ꞌain kamina uni bëná mix ꞌën kakëxun, ꞌën bana kuati usaibi ꞌiti ꞌain.

²⁵ Usa ꞌain kamina iskin amiokin sinántima ꞌain; ꞌianan kamina a nuibiani abë kuanti sinántima ꞌain,

²⁶ a xanu ꞌucha kupí ka ꞌitsaira uni ñuaxa; ¡usa ꞌaish ka an ñumikë uni ꞌitsaira ꞌikën!

²⁷ Uinu ꞌikë unikamax kara aín xubunu atsínia, ax ka aín ñuti baria anu kuankë ꞌikën.