Proverbios 6 - Kashibo-Kakataibo Biblia

Chikish unikama usakin ꞌësëti bana

⁶ Anua ꞌikë aín putu anu kuanxun kamina: uisai kara ꞌunán ꞌia, isikuanti ꞌain, chikish unikama; anuxun kamina a ñu kara ꞌaia akama iskin anua ꞌunánti ꞌain:

⁷ an usakin kamina ñu ꞌati ꞌai kixun kanan usai kamina ꞌiti ꞌai kixun an kati aín ꞌapu ꞌaíma ꞌaínbi ka,

⁸ baritiañu atun piti bikë a aín kininu bukunruia.

⁹ ¡Uínsaran kaina chikishimi ꞌuxtisashi tankë anuax niruti ꞌain! ¡ꞌIanan kaina uínsaran mitsux ꞌuxi rakábukë anuax nirukanti ꞌain!

¹⁰ Usai ꞌuxtisa tani bëti ꞌuxunmi namánan, min pëñan ꞌikúbianx ꞌuxi tantikëbëbi ka,

¹¹ kuainbëkinishi nikë uníxa ꞌakanantishi ꞌaish mëníokax, ukë usaribi kuatsini ukin ñuñuma ꞌiti an mi biti ꞌikën.

Ënë ñukama ꞌati ka Dios kuëënima

¹⁶ Anu ka mapai achúshi ꞌimainunbi, achúshiribi a ꞌatia Dios kuëënkëma a ꞌikën:

¹⁷ ax ka an ꞌatimakin bëtsi uni iskë, ax këmëi banakë uni, uni an uisa ñubi ꞌakëmabi bëtsi ꞌakë uni,

¹⁸ an ñu ꞌatima ꞌatishi sinánkë uni, an ñu ꞌatima ꞌati sinánishi nikë uni,

¹⁹ usakinsa ñu ꞌaxa kiax këmëi banakë uni ꞌimainun an aín xukë́nbëbi mëëananti barikë uni akama ka ax ꞌikën.