Proverbios 3 - Kashibo-Kakataibo Biblia

Sinánñuira ꞌinuxun a ꞌunánti bana

⁵ An ñu ꞌunánkë unix ka ësai kiakëxa: Min nuitunënbi sinani kamina Nukën ꞌIbu mi katamëti ꞌain, usai ꞌi kamina rabiakati ꞌën kana bëtsi unin ꞌakësamaira okin ñu ꞌunan kiax kitima ꞌain.

⁶ Kamabi ñu ꞌakin kamina Nukën ꞌIbu Dios mia ꞌakinun a pain ñukáti ꞌain, usokinmi ꞌakëxun ka kamabi upíokin ꞌanun mi ꞌamiti ꞌikën.

⁷ Min sinanën kamina ꞌëx kana ñu ꞌunainra ꞌai kiax kitima ꞌain; usai ꞌikima kamina Diosmishi katamëkin ñu ꞌatima ꞌatimi sinánkë a manuti ꞌain:

⁸ ¡usai ꞌi kamina uni ro xëatankëx ꞌikësai min nami kushiti ꞌain!

⁹ Nukën ꞌIbu Dios kamina ami ꞌarakakë min ñukama ꞌinánti nankë a ꞌinánan kamina, min naënu ꞌapákëxa tsinasati tuákë aribimi bixun ꞌinántimi nankë a ꞌinánti ꞌain;

¹⁰ usokin mi ꞌakëbë ka anu nanti ꞌakë anuax min piti ñukama këñutima ꞌimainun ami xëati nankëkama ax anu nankë anuax këñutima ꞌikën.

¹¹ Uni bënákama min kamina, Diosan usai ꞌiama ꞌinun kakëxun kuaisama tantima ꞌain ꞌimainun kamina an mi usai kamina ꞌitima ꞌai kixun kakëx a kuëënima nishtima ꞌain;

¹² an nuibakë uni a ka Diosan usakin kamina ñu upima ꞌatima ꞌai kixun ꞌunánmia, achúshi unían aín bakë bëchikë a nuibairakë a ñu ꞌatima ꞌaxuma ꞌanun kakësaribi okin ka an ꞌaia.

¹³ Chuámarua ka an ñu ꞌunántibi sinánxun, upíokin kuakin ꞌunánkë ax ꞌiti ꞌikën;

¹⁴ usa ꞌain ka usakian ꞌakë ax manë kuríki bikësamaira ꞌiti ꞌikën, an ñu ꞌunánkë an kuri marukin anun kanánkësamaira ꞌiti ꞌikën.

¹⁵ Ñu ꞌunánkë ax ka maxá upíira iskësamaira ꞌianan; ¡bëtsi ñukama unin kuëën irakë usamaira ꞌiti ꞌikën!

¹⁶ Usa ꞌain ka uni ñu ꞌunánkë ain mëkeu anun xënibua ꞌaínbi tsókësa ꞌikën, mëmiuribi mëshpakësa ꞌi kuëënkë ax ꞌiti ꞌikën.

¹⁷ Usai ꞌikian an nu ꞌësëkë ax ka upíira ꞌikën; an ka ñu ꞌatima ꞌaíma upitax tsónun uni ꞌimia.

¹⁸ Uix kara ñu ꞌunairakë ꞌikë ax ka i bimiñu unin upí iskë usaribi ꞌixun ꞌatima ñu ꞌaisa tankinbi tënëia; ax ka chuámarua tani usokin ñu ꞌakëma ꞌaish tsóti ꞌikën. ¡Ax ka chuámarua usakin ñu ꞌakë ꞌaish tsotia!