Proverbios 27 - Kashibo-Kakataibo Biblia

¡Uínbi ka uisai kara ꞌinuxun ꞌaia kixun ꞌunanima!

¹ Imë́ishi kana usakin ñu ꞌati ꞌai kiax kamina kitima ꞌain. Kamina ꞌunanima imë́ishi karamina uisai ꞌiti ꞌain.

² Mibi rabiakatima kamina bëtsi unikaman kunia uisa uni kaina ꞌai istankëxun mi rabinun ꞌiti ꞌain; usa ꞌain ka mibi rabiakati ax upíma ꞌikën.

³ Maxákama ꞌimainun masikama ax ka ꞌëñë ꞌikën, ꞌaínbi ka usamaira ꞌunántisa ꞌikëbia ñu ꞌunánkëma unikama atun nishkë ax ꞌikën.

⁴ Xuamati uni ꞌakatsi nishkë, ꞌimainun ñu ꞌakatsi nishkë an ka uni ꞌatimanun ꞌimia, ꞌaínbi ka bëtsin ñu ꞌakëbë nutsikë ax nëtë́tima ꞌikën, ꞌimainun ka sinanima kishikë ꞌikën.

⁵ Ñu ꞌatima ꞌaia kashikin bëtsi kati ax ka asábi ꞌikën, usa ꞌain ka kakinma unë́xun nuibakë usamaira ax ꞌikën.

⁶ Nun ꞌunánkë unían uisakin kara nu ꞌaisatania usakin ꞌakë ax ka asábi ꞌikën, ꞌaínbi ka numi nishkë unían nu nuibakin mëkën ꞌinánkin bikë ax nun ꞌunánkë unían nu bikë usamaira.