Proverbios 23 - Kashibo-Kakataibo Biblia

⁴ Ñuñu ꞌiti sinani kamina ꞌitsaira ñu mëi tëmëratima ꞌain; usai ꞌikinma kamina ꞌitsairami sinánkë a ënti ꞌain.

⁵ Usa ꞌain ka upíokin min iskë ax bënëtishi tëtëkamë ꞌëo aín pëchi, ꞌirui nuankiani kuankë usaribi ꞌinun nëtë́tia.

¹⁹ ꞌËn bakë bëchikë upíokin kakëxun kamina ꞌën bana kuakin ꞌunánti ꞌain; usa ꞌain kamina upí ñuishi ꞌati sinánti ꞌain.

²⁰ An ñu paë xëax paë́nkë unikama ꞌimainun, pikën tankëma ꞌixuan ꞌitsaira pikë unikama atubë kamina timë́tima ꞌain,

²¹ axa paë́nishi nikë ꞌianan piti pishi nikë unikama axribi ka anunbi ñuñumaia, usaía atux ꞌimainun ka chikish unikama axribi chupa xëni unin rakankë bikë tukibukëra pañuax kuaínbëkini nitsia.

²² An mi bëchia min papan, kakëxun kamina aín bana ꞌupiokin kuati ꞌain; min tita kamina kaniakëtia, kuëënkima istisama tantima ꞌain.

²³ ꞌAisamaira ñu ꞌunámikin, ꞌësëkë ꞌixun kamina bëtsi ñu ꞌakin uisa ꞌixunbi a manutima ꞌain.

²⁴ Uinu ꞌikë unin bakë bëchikënëx kara ñu ꞌunánkë ꞌianan, upí ꞌikë an ka aín papa upí tani chuámarua ꞌinun ꞌimia;

²⁵ ¡usa ꞌain kamina, min papa ꞌimainun min tita chuámarua tani kuëënun ꞌimiti ꞌain!

²⁶ Mix ꞌën bakë bëchikë ꞌixun kamina, ꞌën mi kakë banakama kikësokin kana ꞌati ꞌai kixun ꞌë kati ꞌain, usa ꞌain kamina ꞌën mi ꞌunánmikë banakama axa min ꞌunánkë ꞌinun ꞌimiti ꞌain;

²⁷ Xanu ꞌunánkëma bëtsi bëtsi unibëa ꞌikë, ax ka me nëminra ꞌitánun aín ana chukúma ꞌinun nëmionkin naëkësa ꞌikën;

²⁸ ꞌIanan ka a xanux, an ñu mëkamakë uníxa aín ñu binuxun uni ꞌanux unëkë usaribi ꞌikën, usa ꞌixun ka ꞌitsaira uni aín nami ꞌai anuribi anuribi kuankin ñu ꞌatima ꞌanun ꞌimia.

²⁹ ¿Uix kara tëmërain? ¿Uix kara bëtsimi manánti ꞌit? ¿Uix kara mëëanantishi sinani nianan ꞌatima ñu ꞌax masá nuituti nitsin? ¿Ui kara ñu ꞌatima ꞌakëmabi bëtsi uni ꞌatimokin ñun tëain? ¿Ui kara ꞌitsaira ñu paë xëai aín bëru chëxë kuatsinxun isin?

³⁰ Ax ka uínsaranbi an bëxnan xëakin ënkëma unikama ꞌianan, an barixun anun paë́nti bërí ꞌakë bëxnan bëtsi uni xëakinkë unikama ax ka usai ꞌia.

³¹ Usa ꞌain kamina a xëax paë́nti ꞌakë a istima ꞌain. ¡Ax ka xëanuxun anu ꞌarukë ñunuax xëaishitisa ꞌitanun ꞌia! ¡Usa ꞌikë ka unin a xëakin upí tania!

³² ꞌAínbi ka upitankin xëatankëxunbi unin runun ꞌakëxun, aín paë tankë usaribi tani, an xëakë anbi ꞌaisama okëx bamaia.

³³ Usakin xëakëxun ka mi bëtsi ñu ismianan, min kuëënkësoimi sinanima bananun ꞌimia;

³⁴ kamina achúshi nunti chaiiran parúmpapan bëchunkin shaikakësa usaribi kuankin tanti ꞌain, ꞌianan kamina anubia nitsínkë i aín rëbunu ꞌuxax rakakësa tanti ꞌain,

³⁵ tani kamina kiti ꞌain: ꞌË ka mëëkanxa, ꞌixunbi kana tankëma ꞌain; ꞌianan kana ꞌëa rishkikankëxubi ꞌunánkëma ꞌain; usakin ꞌakëxbi kana usabi bësukiani amiribishi ñunshinkiani a xëati baritëkëni kuanti ꞌain.