Proverbios 22 - Kashibo-Kakataibo Biblia

An ñu ꞌunankë unikama kia ñuikë bana

¹ Usai ka a uni tsotia kixun unin ñuia kuakë ax ka, kuri ꞌimainun kuríkiñu ꞌikë usamaira ꞌikën.

² Ñuñu uni ꞌimainun ñuñuma uni ax ka: a rabë́bia Diosan unio ꞌikën.

³ Uni an sinánkin ñu ꞌakë an ka ꞌaisa ꞌikëbi a ꞌaxi ꞌaisama ꞌiisa iskin ñu ꞌaima; ꞌaínbi ka sinánñuma uni ax kuainxunshi ñu ꞌakë anunbi tëmëraia.

⁴ Upasara ꞌixun ax kikësabiokin Diosan bana ꞌakë, ax ka ñuñuira ꞌi kuëëni upiti tsókë usamaira ꞌikën.

⁵ An ñu ꞌatimashi ꞌati sinánkë unikama aín tsóti ax ka anu ñu pakëti unin unëkin ꞌakë usarabi ꞌikën; ꞌaínbi ka axa bërúankati nikë uni ax añu ꞌati kuëënima.

⁶ Min bakë bëchikë kamina xuratsu ꞌikëishi uisai kara tsóti ꞌikë kixun ꞌunánmiti ꞌain, usokin ꞌunánmikëxun ka kaniakëkinbi sinánkin min ꞌunánmia bana a manutima ꞌikën.