Proverbios 20 - Kashibo-Kakataibo Biblia

Diosan ka uni tsóti bërúaia kixun ñuikë bana

¹ A xëati paëokin uvas baka ꞌakë an ka xëakëxun uni sinanimaishi bananun ꞌimia; usa ꞌixun ka a xëati paëokin ꞌakë a xëakinxun bëtsi unikamabë banakin sharákinia; usai ꞌika; uisai kara banati ꞌikë kixun sinanimaishi banaia.

² Achúshi ꞌapu nishkë ax ka paru ꞌinúan kuëërui banakë usaribi ꞌikën; uin kara nishmia aka nishkin uisa kara okatsia usakin ꞌati ꞌikën.

³ Ui unin kara ꞌupiokin sinani bëtsibë mëëananti sinanima a unix ka usa ka kixun unin rabikë ꞌikën, ꞌaínbi ka ñu ꞌunánkëma uni ax kuni usai ꞌia.

⁴ Uin kara anun naëoti baritia ꞌaínbi ꞌaisamatani chikishkin naë oima; an ka anúan unin ñu ꞌapáxun aín bimi biti nëtë ꞌikëbëtan bisa tankinbi anua biti ꞌaíma ꞌain bitsima.

⁵ Bëtsin ꞌunánnuma ꞌaisa tankin sinánkë ñukama ax ka ꞌumpax nëminsaribi ꞌikën, usanu ꞌikëbi ka uix kara sinánñuira ꞌikë an bëríbi ꞌunania.

⁶ Anu ka ꞌitsaira uni axa ꞌën kana mi uisabi otima ꞌai kiax banakë uni ꞌikën, ꞌaínbi ka uinu ꞌikë unínbi asérabi ami ꞌunánmaisa uni mëraima.

⁷ ¡Diosan ka chuámarua ꞌinun unin bakë bëchikëkama ꞌain papan ñu ꞌunámikin, kanioxun ënkë a unikama aín papa tsóasaribi ꞌinun tsónun ꞌimia!