Proverbios 15 - Kashibo-Kakataibo Biblia

Usaia uni upí sinani tsóti bana

¹ Nishkë ꞌikëbia bëtsin sinanamikin kakë, an ka uni nishkëbi upí ꞌinun sinanamia; ꞌaínbi ka ꞌatimati banakin unin bëtsi atiaira nishnun ꞌimia.

² Ax sinánñu unikaman ka bana ñuikin an ꞌunánkë ñukama bëtsi ñuixunia; ꞌaínbi ka an ñu unántisa ꞌikëbi ꞌunánkëma atux ꞌatimakin sinánishi banaia.

³ Nukën ꞌIbu Diosan ka uinu kara ꞌikëbi, uni an upíokin sinánkë akama ꞌimainun an ꞌatima ñu ꞌakë akamanbi isia.

⁴ Uix kara mënin sinánñu ꞌaish kuëmënini banaia ax ka achúshi i bimiñu unin upíokin iskësa usaribi ꞌikën; ꞌaínbi ka uix kara ꞌatima sinánñu ꞌaish ꞌatimati banaia an bëtsi uni masá nuitunun ꞌimia.

⁵ An ñu ꞌunántisa ꞌikëbi unántisama tankë an ka aín papan ꞌësëkin kakëxunbi bana kuatima; ꞌaínbi ka uix kara sinánñu ꞌikë an kuni ꞌësëkëxun bana kuatia.

⁶ Upí sinánñu uni aín xubunu ka añu ñubi ꞌaimama ꞌima aín piti ꞌitsaira ꞌia, ꞌaínbi ka ꞌatima sinánñu uni ax aín kanankë anun ñuñu ꞌima.

⁷ Sinánñu unikama an ka bëtsi unikama an ꞌunánkë ñukama ñuixunia; ꞌaínbi ka an ꞌunántisa ꞌikëbi ñu ꞌunánkëma unikama an ñu ꞌunánma ꞌixun bëtsi unikama ꞌunánmima.

⁸ Nukën ꞌIbu Diosan ka uni ꞌatima sinánñukaman ñu ꞌaxunkëxunbi a upí isima, ꞌaínbi ka uni upí sinánñukama an ñukákëxun kuni kuatia.

⁹ Nukën ꞌIbu Diosan ka uni ꞌatima sinánñukama atux ꞌatimati tsókë a kuëënima; ꞌaínbi ka axa aín bana kikësoibi ꞌikë unikama a kuni nuibatia.