Proverbios 13 - Kashibo-Kakataibo Biblia

Salomónnëxa ñu ꞌunáinrakë ꞌaish kia ñuikë bana

¹ Uinu ꞌikë unin bakë bëchikënën kara ñu ꞌunánkë isa tania an ka aín papan ꞌësëkëxun aín bana kuatia; usa ꞌaínbi ka uin kara ꞌësëkëxunbi bana kuaisama tania ax uisakinbi kaisama ꞌinun nishia.

² Uix kara ꞌupiokin ñu ꞌakatsi kia an ka ax kikësabiokin ꞌaxun ñu bitsia, usa ꞌaínbi ka ꞌatima sinánñu unikamax upíokin sinánkin ñu ꞌaíma, ꞌaisama ñunu pakëti ꞌikën.

³ Uix kara sinaínrax banaia an ka aín tsóti bërúaia; usai ꞌimainun ka axa sinanima ꞌatimati banakë uni ax aín banakënënbi ꞌatimorakatia.

⁴ Uin kara chikishan tapun ꞌixunbi ñu bisatania an ka añu ñubi bitsima; usa ꞌaínbi ka uix kara ñu mëëkë uni ꞌikë an kuni an bisatankë ñu bitsia.

⁵ Uni upí sinánñu an ka këmëi banakë a kuëënima; uni ñu ꞌatima ꞌakë ax ka ñu ꞌatima ꞌaibi anunbi rabinti ꞌunánma ꞌikën.

⁶ Uni upí sinánñukama ax ka an ñu upí ꞌakë anunbi upitax nitsia; ꞌaínbi ka an ñu ꞌatima ꞌakë anunbi uni ꞌuchañunëx tëmëraia.

⁷ Anu ka bëtsi bëtsi uni ñuñuma ꞌaishi ñuñu ꞌisatankë ꞌikën, ꞌimainun ka bëtsi bëtsi uni ñuñuira ꞌaishi ñuñuma unisa ꞌikën.

⁸ Ñuñuira uni a ka bëtsi unin aín ñu kupí ñatankë ꞌiti ꞌikën, ꞌaínbi ka ñuñuira ꞌixun aín kuríkinën kupíox chikiti ꞌikën; usa ꞌaínbi ka ñuñuma unikama atun uínsaranbi a ꞌakatsi uni kikë bana kuatima.

⁹ Upí sinánñu unikama ax ka tirítan pëkakësa ꞌaish kuëënti ꞌikën; ꞌaínbi ka ꞌatima sinanñu unikama ax tirí bënákënu ꞌikësa usaribi atun tsóti ꞌikën.

¹⁰ Axa rabiakakë uni an ka bëtsi unibë mëëanantishi kuëënia; usa ꞌaínbi ka sinan mëninñushi uni an ꞌësëkin kakëxun bana kuatia.

¹¹ ꞌItsaira ñu mëëi tëmërakinma bikë ñu ax ka basikëma ꞌaínshi këñutia; usa ꞌaínbi ka unin ñu mëëxun bikë ax kuni munu bixun bixun nankë ax ꞌaisamaira ꞌinun chanun ꞌimia.

¹² A ꞌati sinánxun ꞌakë ñu ax ꞌikëbëma ka uni masánuitutia, ꞌaínbi ka usakin ꞌati sinánxun ꞌakë ñu ax ꞌikëbë kuni uni kuëënia.

¹³ Uin kara kakëxunbi bana kuakinbi ñu ꞌaisama tania ax ka usakin ꞌaxuma anuma kana ꞌia kiax masánuituti insa tani kiti ꞌikën; usa ꞌaínbi ka an kakëxun bana kuakë ax kuni ꞌupitax tsóti kuëënti ꞌikën.

¹⁴ An ñu ꞌunánkë unikaman ꞌunánmikë banakama ax ka anun tsóti ꞌikën, usa ꞌixun ka bamatinu ꞌikëbi nu ië́miti ꞌikën.

¹⁵ Uix kara ꞌupiokin ꞌësëkin bana uni ñuixunkë ꞌikë a ka kamabi unin aín bana kuatia, ꞌaínbi ka an ꞌatimakin uni bana ñuixunkë uni ax ka aín bana unin kuaisamatankëbë tëmëraia.

¹⁶ Uni upí sinánñu an ka ꞌupiokin sinánkin ñu ꞌaia, ꞌaínbi ka ꞌatimakin ñu ꞌakë uni a usakin ka a unin ñu ꞌaia kixun unikaman ꞌunania.

¹⁷ An bana ñuitia bëtsi unin xukë uni an ꞌatima banaishi uni ñuixunkë an ka ꞌatima bana ñuixunkin uni ꞌaisama sinánmia, ꞌaínbi ka an bana upí ñuitia bëtsi unin xukë uni an kuni asérabi bana ñuia.

¹⁸ Uin kara kakëxunbi bana kuaisamatania a ka ñuñuma ꞌia uínbi kuëënima; ꞌaínbi ka uin kara kakëxun bana kuatia a kuni unikaman kuëënti ꞌikën.

¹⁹ Nun ꞌaisatankë ñu a ꞌatankëx kananuna upí tani kuëënin. ꞌAínbi ka an kakëxunbi bana kuaisama tankë unikama an sinanakin ñu ꞌatima ꞌakë a ënti kuëënima.

²⁰ Uin kara ñu ꞌunánkë uni kamabë nitsia an ka atun ꞌakësaribi okin ñu upí ꞌunania; ꞌaínbi ka uix kara ñu ꞌunántisama tankë unikamabë nitsia an ñu ꞌunanima.