Proverbios 1 - Kashibo-Kakataibo Biblia

Kirika anua upí bana ꞌunánti kuënëo

¹ Ënëx ka Salomón Davidtan bakë bëchikë Israel kaman ꞌapu ax kia bana ꞌikën,

² ax ka uisai ꞌi kara: sinánñuira ꞌixun bëtsi ꞌësëkin, uisai kara a banakama kia kixun ꞌunánmiti a ꞌikën,

³ ꞌianan ka uisai ꞌësëanáni, upitax bëtsibë tsóti, upí ñuishi ꞌati, upí sinánñu ꞌianan: rabiakati banakëma ꞌiti a kamaribi ꞌunánmiti bana ꞌikën;

⁴ a banakaman ka uni bënábu ñu ꞌunairakëma ꞌikëbi, upíokin ꞌunánkin a banakama kikësabiokin ꞌai sinanakin chuámarua tanun ꞌimia.

⁵ Uix kara sinánñuira ꞌianan upíokin bana kuakë ꞌixunbi kuatia ax ka, ñu ꞌunánkësamaira okin a banakama ꞌunani anunbi aín sinan chaiira ꞌiti ꞌikën,

⁶ uisai kara ñu ꞌunairakë unikama ax bëtsi ñuikësai kia anbi kuanan, bëtsi ñu ñui banakë ꞌimainun a ꞌunánti banakama kikë abi uisai ki kara a banakama kia abi kuatia.

⁷ Uikamax kara ñu ꞌunánkëira ꞌisatania an ka Diosan bana kikësabiokin ꞌakin; uisai kara a banakama kia usabi okin ꞌati ꞌikën; ꞌaínbi ka an bana kuakëma unikama ax uisabi okin kati kuëënima ꞌianan, uisa bana upibi ꞌunámikin kaisama ꞌikën.

Usai uni bënákama bëtsin paránxun ñu ꞌatima ꞌamikaskëx ꞌiti bana

⁸ ꞌËn nuibakë bëná unikaman min papan ꞌësëkëxun kamina aín bana kuati ꞌain, kuanan kamina min titan ꞌunámikin kakë bana a kamaribi manutima ꞌain,

⁹ a banakamax ka upíira ñumi min tëxanu tëñuxun ꞌarakakësa ꞌianan: achúshi mañuti upíira min maxkánu mañukësa ꞌiti ꞌikën.

¹⁰ Usa ꞌain kamina uni ꞌuchañukaman parántisa tankëxunbi, ¡atu kuëënxuntima ꞌain, ꞌën nuibakë bëná unikama!

¹¹ Atun sapi ka mi kati ꞌikën: Nukamabë kamina kuani uti ꞌain; nun kananuna uisokin ꞌaisa kara istánkëx anuxun ñu ꞌatima ꞌatinu unëti ꞌain, usakin ꞌatankëxun kananuna anu pakëtia uisa ñu ꞌakëmabi uni ꞌaxun aín ñukama unë́xun kainxun biti ꞌain.

¹² Usakinnu ꞌakëx ka ñu upí ꞌakë unikama ax nëminra kini anu pakëtia ñukësa usaribi ꞌiti ꞌikën.

¹³ Usakin ꞌatankëxun atun ñukama ashi bitankëx kananuna bëtsi bëtsi ñuñu ꞌiti ꞌain, ¡usakin ꞌakin kananuna mëkamakë ñukama nun xubukamanu bukunti ꞌain!

¹⁴ Usa ꞌain kamina nukamabëtan minribi uisax karanuna kuríkiñu ꞌiti ꞌai kixun tani ꞌuti ꞌain, usa ꞌain ka nun ꞌakë ñukama ax kamaxunbi nun biti ñu ꞌiti ꞌikën.

¹⁵ ¡Usakin kakëxbi kamina atubë kuantima ꞌain bëná unikama mitsux! Usai ꞌikin kamina atúan ñu ꞌaisama ꞌakinkaskëxunbi atubëtan ꞌatima ꞌain,

¹⁶ usai ꞌikin ka atun bënë́kinshi ñu ꞌatima ꞌati sinánxun ꞌaia; ¡ꞌianan ka bënë́kinshi uni aín imi ꞌapamikin ꞌati sinánxun ꞌaia!

¹⁷ Amia ñu ꞌitánun nankë axa an istisokin nankë ami ka ꞌisákama pakëtima,

¹⁸ usa ꞌaínbi ka a unikamax atun tsótimi kuaikin, anu ñuina pakëti ꞌakë, usaribiokin atúnbi unë́xun ñu ꞌatima ꞌakë anunbi ꞌaisama ñunu pakëtia.

¹⁹ Usaribi ka an ñuñu ꞌixunbi ꞌitsaira ñuñu ꞌiti kuëënkë unikama atux ꞌikën: usa ꞌaish ka ꞌitsaira ñuñu ꞌiti kuëëni anunbi bamaia.

Ñu ꞌunania bëná unikama upí sinánñu ꞌiti bana

²⁰ An ñu ꞌunánkë unikama ax ka anun xubunu kuanti ëman anuax kianan anun ëmanu kuanti bai cha ꞌakë anun kuani ꞌësai nukaman kuanun kiti ꞌikën;

²¹ kianan ka ꞌapukaman bana mëníokë ëma xëkuëkama ꞌimainun anuxua ñu marukankë anuaxi kianan ëma sënënakëkë anuxunbia kuakanun kiti ꞌikën:

²² Uni bënákama mitsux kamina usai ꞌiti ka kixun bënë́kinshi ñu ꞌatima ꞌaisa ꞌianan, usakin ñu ꞌakëxa asábi ꞌikë kiax ami kuaianan bana kuakëma ꞌikanin, ¿usa sinanbu ꞌixun kaina uínsarainra mitsun usai ꞌikin ñu unántisama tani ami kuaikë akama ënkanti ꞌain?

²³ Usa ꞌain kamina ꞌën kakëxun ꞌën bana kuati ꞌain, kuatia kana ꞌën mitsu ꞌën ꞌunánkë banakama ꞌunánmianan; ꞌën sinánkë banakama mitsu ñuixunti ꞌain.

²⁴ Usa ꞌain kana ꞌën mitsu ënumi ukanun kan, ꞌaínbi kamina mitsun ꞌën kakëxunbi ꞌën bana kuaisamatan.

²⁵ Usai ꞌikin kamina ꞌën kakëxunbi ꞌën bana kuaisama tankin timakan; ꞌimainun kamina usai kamina ꞌitima ꞌai kakin ꞌësëkin kakëxunbi ꞌën bana kuaisama tankan.

²⁶ ¡Usa ꞌain kana uisa ñu ꞌatima kaina inuti, a nëtë ꞌikëbëtan anun ꞌën mitsu usanti ꞌain! ¡ꞌimainun kana uínsaran karamina mitsun rakuë́tanshi bamatisa tankani anun ꞌëx mitsumi kuaiti ꞌain,

²⁷ ꞌianan ka uínsaran kaina mitsux rakuëanan bëtsi bëtsi ñu mitsunu ꞌikëbë bënëti masá nuitukë an ka suñuanën kamabi ñu këñubëtsinkësa usaribi okin mitsu ꞌati ꞌikën!

²⁸ Usai ꞌikin kamina a nëtën ꞌakinnun kixun ꞌë kuënkanti ꞌain, ꞌaínbi kana ꞌën mitsun kakëxunbi kuashiti ꞌain; usokëxun barikinbi kamina ꞌë mërakantima ꞌain;

²⁹ usa ꞌaínbi kamina mitsun ꞌën ꞌunánmikaskëxunbi, ꞌunanima ꞌianan Diosan bana kikësoi ꞌisamatankanin.

³⁰ Usai ꞌikin kamina mitsun ꞌën ꞌësëkëxunbi ꞌën bana kuaisama tankin timanan; ꞌën usai ꞌiti mitsu ꞌunánmikë usai ꞌisama tankanin.

³¹ ¡Usaími ꞌikë anbi ka mitsu ꞌupitax ꞌisama okin tëmëramiti ꞌikën! ¡Usaími ꞌikankëbë ka mënioisama mitsúnbi sinánxun ꞌakë ꞌaisama ñukama ax ꞌiti ꞌikën!

³² Axa bënë́kinshi ñu ꞌatima ꞌamitisa unikama ax ka ñuti ꞌikën upíokin sinánxun ñu ꞌakëma kupí, ꞌimainun ka an bana kuakëma unikama atúxribi anbi bërúankakin ñu ꞌakëma anunbi ꞌaisama orakakë ꞌiti ꞌikën,

³³ ꞌaínbi ka uin kara ꞌën kakëxun ꞌën bana kuaxa, ax kuni ꞌupitax chuámarua tsóti añu ñu ꞌatimamibi rakuë́tima ꞌikën, kiax ka an ñu ꞌunánkë unikama kiakëxa.