Oseas 6 - Kashibo-Kakataibo Biblia

Diosmi kananuna sinanatëkënti ꞌai kiax Israel unikama kia bana

¹ Kamaxi Diosmi sinanatëkënti kamina ukanti ꞌain. An ka ꞌatimo ꞌixunbi nux ñu ꞌatima ꞌai ꞌuchakëkama nu mëníoxunti ꞌikën; usokin ꞌatimo ꞌixunbi mëníotëkënkin ka chuámarua tanun nu ꞌimiti ꞌikën.

² An ka bënë́kinshi nun ñu ꞌatima ꞌakëkama mëníokin nukama upí ꞌimiti ꞌikën, usakin ꞌakin ka nukama an iskëx upí tsónun ꞌimiti ꞌikën.

³ ¡A mi kushikin kananuna Dios ꞌunántëkënti ꞌain! Usakin ꞌakëbë ka Dios nukamanu ꞌi ꞌutëkëni barin urukin pë́kabëtsinkë usa ꞌianan, ka me chabóia mitakuatsinkëbë ꞌuí ꞌibúkësa usaribiti ꞌuti ꞌikën.

Diosan Israel unikama ami sinanakatsi kia ká ñuikë bana

⁴ Ësai ka Dios kia: “¿Añu karana ꞌën Israelkama mitsubëtan ꞌati ꞌain? ¿Judá añu karana ꞌën mibëtan ꞌati ꞌain? Mitsúnmi ꞌë nuibakë ax ka pëkarakuatsinkëbë kuénkuru ꞌibúkë usa ꞌianan, nibí ñantámashi ꞌibúkin me chabotankëx pëkarakëbë nëtë́kë usashi ꞌikën.

⁵ Usa ꞌain kana ꞌën kakëxua an Dios kikë bana ñuikë unikaman mitsu ꞌatimonun ꞌamia, ꞌën bana an bana ñuikë unikama ñuikë a bananbia këñunun ꞌimian. Usa ꞌain ka ꞌën ꞌupiokin ꞌakë ñukama ax kuni upí ꞌaish tirísaribi ꞌikën.

⁶ Usa ꞌain kana mitsunmi ꞌë nuibati a kuëënin, ꞌën kana mitsunmi ñuina rëtankëxun xaroxunti a kuëënima, usa ꞌain kamina ax ka Dios ꞌikë kixun ꞌë ꞌunánkanti ꞌain, usakin ꞌunánkin kamina ꞌë ñuina rëtankëxun ꞌaímai këñutanun xaroxunkantima ꞌain.”