Oseas 4 - Kashibo-Kakataibo Biblia

Israel unikamax Nukën ꞌIbumi ꞌucha ñuikë bana

¹ Israel unikaman ka ësai ka Nukën ꞌIbu kia kuati ꞌikën. An ka ënë menu tsókë unikama nishanankë a uisokin kara ꞌati ꞌikë sinánxa, ënë menu ka uni nuibanani tsókë ꞌaíma ꞌianan, bëtsi uni mëëkaskin uisai kara Diosan bana kia abi ꞌunanima.

² Usa ꞌain ka atunu këmëishi banati ꞌimainun bëtsi paránti ꞌianan, bëtsi ꞌati ꞌimainun mëkamati ꞌianan, aín xanuma ꞌikëbi bëtsi xanu ꞌanan bënë́kinshi ñu ꞌatima ꞌati ꞌitsaira ꞌikën, ꞌianan ka bëtsin ꞌakëbë ꞌakëbëtan uni ꞌati ashi anu ꞌitsaira ꞌikën.

³ Usa ꞌain ka ënë menu uni ñukë ꞌain pañukë chupa a pañuax masá nuituti nitë́xëkë usa ꞌixun añu ñubi kuëënima; usa ꞌain ka anu tsókë unikama kushiñuma ꞌikën; usai ꞌimainun ka raëkëma ñuina ꞌimainun, manan nikë ñukama bamamainun parúmpapanu ꞌikë tsatsakama axribi bamaia.

Dios sacerdote unikaman ka ñu ꞌatima ꞌaia kiax kia bana

⁴ Ësai ka Dios kia: “¡Uínbi ka usakin kamina ñu ꞌatima ꞌai kixun bëtsi uni katima ꞌikën! ꞌËx nishkë ax ka sacerdote mimi ꞌëx nishkë ꞌikën.

⁵ Mix kamina nëtëinra ꞌianan imë́ ñu ꞌatima ꞌai pakëti ꞌain, usai ꞌikëbë ka mibë an Dios kikë bana ñuikë uníxribi pakëti ꞌikën, ꞌimainun kana min titaribi ꞌën këñunun ꞌimiti ꞌain.

⁶ ꞌËn unikaman ka añu ñubi ꞌunánkëma ꞌiaxa, usa ꞌaish ka ꞌatima okin masókë ꞌiaxa. Usa ꞌain kamina sacerdotekama mitsúxribi ñu ꞌunánkëma ꞌiakën, usa ꞌain kana ꞌënribi anuxun ꞌë rabiti xubunu mikamax ꞌiti kuëëniman. Min kamina Dios ꞌixun ꞌën ꞌunánmikë banakama manua, usa ꞌain kana ꞌëxribi min rëbúnkin kamami manúti ꞌain.

⁷ Sacerdotekama ꞌitsakëbë ka uníxribi ꞌitsaira ꞌëmi ꞌuchakëxa; usa ꞌain kana atúan biti ñu ꞌinankima ñuumasara ꞌinun ꞌimiti ꞌain.

⁸ ꞌËn unikaman aín ꞌucha mëníokakin ꞌinainshikë ñukama a marui kamina mitsux tsotin; usakin ꞌakin kamina ꞌën unikamaxa abi ꞌuchanun ꞌimin.

⁹ Usa ꞌain kana ꞌën unikama ꞌakësaribi okin sacerdote unikama upiti atux tsótima kupín ꞌatima oti ꞌain.

¹⁰ Usa ꞌain ka atun Dios rabiti ënkë ꞌixun piti ꞌikë, ꞌaínbi ka puchákin pitima ꞌikën; ꞌianan ka xanun nami ꞌakinbi bëchikantima ꞌikën.

Israel unikaman bëtsi ñukama rabia ñuikë bana

¹¹ Ësaribiti ka Dios kiakëxa: Bëtsi bëtsi unin aín nami ꞌakë xanubë nikin, uvas baka paëokin ꞌakë xëai paëini nikin ka upíokin ñu ꞌati a ëanxa.

¹² Usa ꞌain ka ꞌën unikama atun rabinuxun nitsínkë ikama abë banakin ñukatia; ꞌianan ka aín tsatikama anun uisai kara ꞌiti ꞌikë kixun anun tanti aribi ꞌaia. Usa ꞌain ka ꞌën unikama xanun nami ꞌati kuëëinra ꞌixun, bëtsi ñu ꞌatishi kuëënia: Usa ꞌixun ka aín Dios ꞌikëbi aín nami mëakakë xanukaman abë ꞌikë uni ꞌakësokin ꞌë manuakëxa.

¹³ Usa ꞌain ka aín bashi manan kuaruxun aín rëbu anuxun sanuira ro a xaronan ꞌaímai këñutanun ñuinaribi xaroia, ꞌimainun ka i roble kakë pëñanakëkë ꞌianan álamos kakë i ꞌimainun muxañu ikama aín tupën tëmúxun ñuina xaroia. Usa ꞌain ka mitsun ini bëchikëkaman bëtsi bëtsi uni aín nami ꞌamia, ꞌimainun ka mitsun bakë bëchikënën xanu min piakakamaribi atun bënë ëanx bëtsi unibë ꞌia.

¹⁴ ꞌAínbi kana ꞌën mitsun ini bëchikë xanukama uni aín nami ꞌatima oíma ꞌianan mitsun bëchikënën, bëtsi uni aín nami ꞌamia tëmëramiti ꞌain, mitsúxbi kamina bëtsi bëtsi uni aín nami ꞌakë xanubë ꞌin; ꞌikin kamina a rabikësokin atubë timë́xun ñuina xarokanin. ¡Usokin ꞌai kamina achúshi ëmanu ꞌikë unikaman sinánkimaishi ñu ꞌakë usaribi ꞌikanin!

¹⁵ Israel unikama mitsux kamina bëtsi bëtsi ñuira ꞌakë ꞌain, ꞌaínbi ka Judánu ꞌikë unikama atun kuni usakin ꞌai ꞌuchatima ꞌikën. ¡Usa ꞌain kamina Guilgalnu kuankantima ꞌain, ꞌianan kamina Bet-avén anuribi kuarutima ꞌain, ꞌianan kamina sinanatëkëntima oi ꞌën anë ñui banatima ꞌain!

¹⁶ Israel unikamax bana kuati ꞌunánma unibu ꞌikën, usa ꞌaish ka burro xanu bërí kanikë bisama usaribi ꞌikën, usa ꞌikë, ¿kara Diosan pasto ꞌapákë upíira anua carnero kamara ꞌakësokin bërúanti ꞌik?

^17-18 Usa ꞌain ka Israelkama axribi unínbia ꞌakë ñukama rabitinu atsínxun rabia. ¡Usa ꞌain ka kamabi uni axa bëtsi ꞌatima onux timë́ax bëtsibë paë́nkë unikama usaribiti ꞌia! Usai ꞌi amiribi amiribi ñunshinakëkin xanun nami ꞌai ka anun rabinima upiti tsótisa ꞌashi ꞌatimati tsótishi kuëënia.

¹⁹ ¡Usakin atun ñu ꞌakë ax ka suñu bëkikin nuámikësa ꞌiti ꞌikën, usa ꞌaish ka atun ñu rabikë anubi katë́kë ꞌiti ꞌikën!