Oseas 14 - Kashibo-Kakataibo Biblia

Oseasnën Israel unikama Diosmi sinanatëkënun kixun ka ñuikë bana

¹ Israel unikama Nukën ꞌIbu Diosmi kamina sinanatëkënti ꞌain, mitsúxmi ꞌuchakë a kupí kamina ꞌaisama kan.

² Usa ꞌain kamina Diosmi sinanatëkënkin ësokin mitsun a ñukáti ꞌain: “Nukaman ꞌuchakama kamina nu mëníoxunti ꞌain, mëníoxunkin kamina mix upí ixun nun mi rabikëxun upíokin kuati ꞌain.

³ Asiria unikamax ka nu ië́misama ꞌikën, usa aín caballokama anbi nu abáti kuania ꞌabákintisama ꞌikën. Usa ꞌain kananuna mix kamina nun Dios ꞌai kixun nunbi uniokë ñukama anëtëkëntima ꞌain, axa ꞌibuñumakë unikaman ka ꞌain, Dios ꞌixun min nuibakëxun ꞌunania.”

Diosan Israel unikama amiribishi upiti tsotia ꞌakinuxun ꞌaia kia ñuikë bana

⁴ Ësai ka Dios kia: ꞌËn kana Israel unikama ñunshinakëkia atun ꞌakë ñukama mëníoxunti ꞌain; usokin ꞌakin kana ꞌën nuibaisa ꞌikëmabi atu nuibati ꞌain, ꞌëx atumi nishtankëxunbi kana atu nuibatëkëan.

⁵ ꞌËx kana Israel kama nibitan ꞌibúkin chabókë usaribi ꞌiti ꞌain, usa ꞌain ka atux ro ꞌapákëxa uábukësa usaribi ꞌiti ꞌikën. Usai ꞌika aín tapunkama Líbano menu ꞌikë i aín tapun menu takáshkikë usaribi ꞌiti ꞌikën;

⁶ usai ꞌika aín pëñankama ax pëñanakëti olivos pëñan upíirabu usaribi ꞌiti ꞌikën, ꞌianan ka aín sanu ax Líbano menu ꞌikë kunxankama ꞌain sanusaribi ꞌiti ꞌikën.

⁷ Usai ꞌika Israel kama amiribishi ꞌën bërúankëx upitax bukui trigo ꞌapákëxa ꞌupitax kanikë usai ꞌianan, uvas ꞌapákëxa kanitankëx uábukësa ꞌianan Líbano menu ꞌapáxun uvas baka bikësa usaribi ꞌiti ꞌikën.

⁸ Usa ꞌain ka Israel unikama kiti ꞌikën: ¿Uisati karana a rabinuxun ꞌakë ñukama ꞌën kuëënti ꞌain? ¡ꞌËx kana an ꞌën unikama ꞌakianan bërúankë ꞌain! ꞌËx kana pino kakë ꞌi paxaira ꞌain pëchi usaribi ꞌain, usa ꞌain ka atux ꞌën ꞌakinkëx upiti tsóti ꞌikën, kiax ka Dios kiakëxa.

Diosan anuishi sënë́nkin Oseas ká ñuikë bana

⁹ An ñu ꞌunánkë unikama ꞌimainun sinánñu unikama, akaman ka ënë bana kuati ꞌikën: Kamabi ñu Diosan ꞌá ax ka upíokin ꞌá ꞌikën, usa ꞌain ka an ñu ꞌupíshi akë unikaman ax kikësabiokin ꞌaia; usa ꞌaínbi ka ꞌatima sinánñu unikama usakin ñu ꞌaiama Diosan ꞌatima oia.