Oseas 13 - Kashibo-Kakataibo Biblia

Diosan ka Israel unikama tëmëramiti ꞌikë kixun ñuia bana

⁴ Ësai ka Dios kia: ꞌËx kana mitsun ꞌIbu ꞌianan Dios ꞌain, usa ꞌaish kana anunmi Egipto menu ꞌikankë anubi anu ꞌiakën: Usa ꞌain kamina bëtsi dios ax ꞌiisa min Dios ꞌikë kakin unántima ꞌain, ꞌëx ishi kana an mi ië́miti a ꞌain.

⁵ ꞌËn kana anu uni ꞌikëma menuabi mitsu bërúankën.

⁶ “Usa ꞌaínbi kamina mitsux piti ꞌitsairañu ꞌikin tani nukamax kananuna usa ira ꞌai kixun sinani ꞌëmi manúkankën.

⁷ Usa ꞌain kana ꞌëx achúshi paru ꞌinúansa atunan ꞌianan, ꞌinu cha aín rani tunanën tsaka tsaka axa ñu binux unë́kësa usaribiokin ꞌën atu ꞌati ꞌain.

⁸ Usakin ꞌai kana xaëón aín xanuxa aín tuákama nëtë́miax anun rabanan në́kë usai ꞌikin, ꞌën aín shikan tukapati ꞌain. Usakin ꞌakin kana paru ꞌinúanën ꞌakësokin ꞌakin anuxunbi pikin këñuti ꞌain; ꞌanan kana raëkëma ñuinanën ꞌakësa okinribi anuxunbi ꞌati ꞌain.

⁹ Usa ꞌain kana Israel unikama ꞌën këñuti ꞌain, usakin ꞌaiabi ka uínbi usakin kamina ꞌatima ꞌai kixun ꞌë katima ꞌikën.

¹⁰ Usa ꞌain kara ¿uinu bërí min ꞌapu, an ëmakamanua mi ië́miti ax ꞌik? ꞌAíma ka. ¿Uinu kara mitsún kushibu ꞌimainun ꞌapukama anëxunti ñuká ꞌapu ax ꞌik?

¹¹ ꞌËn kana mimi nishkinbi mitsux mi ꞌapuñu ꞌinun ꞌimiakën, ꞌimitankëxunbi kana mimi nishkin mi ꞌapu bikuankën.

¹² Israel unikaman ꞌakë ꞌatima ñukama ka kuënëokë ꞌikën; ꞌimainun ka atun ꞌuchakama axribi anubia ꞌiti kirikanu kuënëokë bëruaxa.

¹³ Xanu aín tuákën paëokëx upiti bakënkë, ꞌaínbi túa bana kuakëma usarabi ka Israel unikama ꞌikën,

¹⁴ ¿Usa ꞌaish kaina anu uni ñukë maínti kini anuax ië́kanti ꞌain? ¿Bamati anuax kaina ië́kë ꞌiti ꞌain? Bamati, ¡min kushibëbi uxun kamina ënë ëma këñuti ꞌain!”

¹⁵ Israel unikamaxa ñu uábuti ꞌikësai mëníokakëbëbi ka suñu amiaxa bari urukë amiax bëkiti ꞌikën, usai ꞌika suñu kushiira anu uni ꞌikëma memiax bëkiti ꞌikën; usai ꞌikëbë ka anua rakákë anuax ꞌumpax ëskimainun xëxá upikamaribi ëski ꞌaíma ꞌiti ꞌikën. Usai ꞌikëbëtan ka axa ami nishkë unikaman atun ñu upíbu akama bikin ꞌibuati ꞌikën.

¹⁶ Israelkama ka aín Diosmi ꞌatimati banakë kupí ꞌatima okë ꞌiti ꞌikën. Usa ꞌain ka anu ꞌikë unikamax ꞌakanankin manë xëtokën ꞌakëx bamati ꞌikën, ꞌimainun ka aín bakë bëchikëkamax bixun memi shipënkakin rëkë ꞌiti ꞌikën, ꞌanan ka xanu tuñukama aribi paná rabë́ okin tukakë ꞌiti ꞌikën.