Oseas 11 - Kashibo-Kakataibo Biblia

Diosan ꞌain bana kuakëma ꞌikëbi ꞌain unikama nuiba ñuikë bana

¹ ꞌËn kana Israelkama ꞌën uni ꞌikë tuá xura ꞌakësokin nuibakën; usa ꞌixun kana atu Egipto menuax chikitia ꞌën bëchikë ka ax ꞌikë kixun kakën:

² ꞌaínbi ka usakin kuënkëxi, ꞌatiaira ꞌëmi ꞌurakankëxa. Usai ꞌikin ka ꞌën unikaman këmëkinshia rabikë dioskama a ñuina xaroxuankëxa, usakin ꞌanan ka sanuira ro aribi ñu tankin ꞌakëkama a xaroxuankëxa.

³ Usakin ꞌaiabi kana ꞌën Efraínnu ꞌikë unikama uisai kara tsóti ꞌikë a ꞌunánmiakën; ꞌaínbi ka atun ꞌën kana usakin ꞌakini kixun ꞌunánma ꞌikën.

⁴ ꞌËn kana atu ꞌitsaira nuibakin ënua ꞌutëkënun atu ꞌakiankën; usakin kana tuá xura ꞌakësokin ꞌanan, atun piti ꞌinánima ꞌikinma bërúankën,

⁵ ꞌaínbi ka atux ꞌëmi katamëisama tankankëxa. Usai ꞌi ka Egipto menu kuantëkënti ꞌikën, anuxun ka Asiria menu ꞌikë unikama atu tëmëramikin ñu mëëmiti ꞌikën.

⁶ Usokin ꞌakëbëtan ka atumi nishkë unikama aín ëmakamanua ꞌain manë xëtokën ꞌakin, anúan ëma kënëara aín xëpútikama ꞌatima okin masóti ꞌikën, usakin ꞌakëx ka atun ñu ꞌatima ꞌati sinánkë anunbi ꞌatimati ꞌikën.

⁷ ꞌËn unikama ka bëtsi ñuishi ꞌai ꞌë ꞌura ꞌia; usa ꞌixun ka bëtsi dioskamaishi nuikin ꞌë ënkanxa; usa ꞌixun kamina ax isa ꞌësamaira kushi ꞌikë kixun sinánkanin, ꞌaínbi ka an mitsu ꞌakintima ꞌikën.

⁸ “¿Uisa ꞌixun karana ꞌën Efraín ënti ꞌain? ¿Uisa ꞌaish karana ꞌëx Israel unikamami manuti ꞌain? ¿Admá kakë ëma ꞌásaribiokin karana mi masókin ꞌati ꞌain, ꞌanan karana mi Seboím ꞌasaribiokin ꞌati ꞌain? ¡ꞌËn mitsumi ꞌitsaira sinánkë an ka ꞌitsaira mitsu nuibanun ꞌë ꞌimia!

⁹ Usa ꞌain kana ꞌëx nishkësokinshi ꞌatima ꞌain: usakin ꞌakin kana Efraín amiribishi ꞌatima okin këñutima ꞌain, ꞌëx kana Dios ꞌain, usa ꞌaish kana ꞌëx unima ꞌain, ꞌëx kana upíira ꞌaish mi nëbëtsi ꞌain, usa ꞌaish kana mitsu këñui ukëma ꞌain.”