Oseas 1 - Kashibo-Kakataibo Biblia

¹ Ënëx ka Diosan Oseas Beerí kakë uni aín bakë bëchikë, a nëtëkaman Ozías Jotam Ahaz ꞌimainun Ezequías akamax Judá menu ꞌapu ꞌimainun Jeroboam Joásnën bakë bëchikë ax Israel menu ꞌapu aín ká bana ꞌikën.

Oseasnën xanu ꞌimainun aín bakë bëchikëkama ꞌia ñuikë bana

² Ësai ka uisai kara Israel unikama ꞌiti ꞌikë kixun ñuixunkin Oseas kai Dios kiakëxa: “Kamabi Israel menu ꞌikë unikama ka bëtsi bëtsi ñu ꞌai ꞌëmi manuti xanu aín nami mëakakënëx ꞌikësai ꞌiaxa. Usa ꞌain kamina minribi anu kuantankëxun achúshi xanu bëtsi bëtsi unibë ꞌikë min xanu ꞌinun biti ꞌain, bitankëxun kamina ami bakë bëchiti ꞌain, bëchikëx ka akamax achúshi xanu aín nami mëakakënën tuá ꞌiti ꞌikën.”

³ Usakin kakëx kuanxun ka Oseasnën Diblaimnën bëchikë Gómer kakë xanu a aín xanu ꞌiti biakëxa, bixun ꞌikinkin ka tuákin achúshi bëbu tuá ami ꞌakëxa.

⁴ Usa ꞌain ka Diosan Oseas kakëxa: “Min bëchikë bëbu tuá bakënkë akamina Jezreel kakin anëti ꞌain, ënuax basikëma ꞌaínshi kana Jehú kakë ꞌapu aín rëbúnkikama ꞌatima oti ꞌain, an ka Jezreel menuxun ꞌatima ñuira ꞌakin a tanti bana kikësokin ꞌakinma uni ꞌatima okin ꞌamiakëxa. ꞌËn kana Israel menua uinu ꞌikë aín rëbúnki achúshinëxia ꞌapu ꞌiaxma ꞌinun ꞌimitima ꞌain.

⁵ A nëtën kana ꞌën Jezreel kakë me sapan anuan ꞌakanankë a këñunbi Israel unikaman suntáru masóti ꞌain.”

⁶ Usa ꞌain ka Oseasnën xanu Gómer kakë ax amiribishi tutëkëntankëx achúshi xanu tuá bakë́ankëxa. Bakënkë ꞌain ka Diosan Oseas kakëxa: “Min ini bëchikë bakënkë a kamina Lo-ruahama kakin anëti ꞌain, ꞌën kana amiribishi Israel menu ꞌikë ꞌapu nuibatëkëntima ꞌain, ꞌianan kana atun ꞌakë ñu ꞌatimakama tërënxunkin mëníotima ꞌain.

⁷ ꞌAínbi kana Judánu ꞌikë unikaman ꞌapu atumi ꞌatimakin sinanima ꞌikima nuibati ꞌain: usakin nuibakin kana ꞌëxbi ꞌain Dios ꞌixun ië́miti ꞌain. ꞌAínbi kana ꞌakanankë ꞌianan, kantiñu ꞌianan, manë xëtokëñu ꞌianan, caballo an nikinkë uniñu ꞌikëbi a kupín ꞌimikima ꞌënbi ië́miti ꞌain.”

⁸ Usa ꞌain ka Lo-ruhama an kanikin xuma ënkë ꞌain Gómer ax tutëkëntankëx bëbu tuá bakë́ankëxa.

⁹ Usai bakëan ka Diosan amiribishi Oseas kakëxa: “Min bëchikë bëbu tuá bakënkë akamina Lo-amí kakin anëti ꞌain, ax ka ësai kikë ꞌikën, bërí kamina mitsux ꞌën unima ꞌain ꞌimainun kana ꞌëx mitsun Diosma ꞌain.”

Diosan Israel unikama aín uni ꞌimitëkëan ñuikë bana

¹⁰ “Usa ꞌain ka Israel unikama achúshi nëtën parúmpapa masi iskësaira ꞌaish, uínbi uiti ꞌitsaira kara kixun tupuntisama ꞌiti ꞌikën. Usa ꞌikë ka mitsux kamina ꞌën unima ꞌain kakima Diosan mitsu kati ꞌikën, mitsux kamina axa bamatima oi tsókë Dios ain bëchikë ꞌai kixun kati ꞌikën.”

¹¹ Usa ꞌain ka Judánu ꞌikë unikama ꞌimainun Israel unikama timë́kë ꞌiti ꞌikën, usa ꞌixun ka achúshi ꞌapuishi anëkanti ꞌikën, usokin ꞌan ka kamabi menu ꞌikë Israel unikama Jerusalénnu timë́kanti ꞌikën. Usakin ꞌimikëbë ka a nëtëkaman Jezreel kakë me sapan anuax ꞌitsaira kuëënti ꞌikën.