Números 9 - Kashibo-Kakataibo Biblia

Usai pascua nëtë inuti ꞌiti bana

¹⁵ A nëtë́an xubusa okin chupa ꞌakë a sënë́onkë a nëtënbi ka manámiax ubukin Diosan amikëxun kuinan a xubu mapuakëxa, mapukëx ka pëkaratamainun usai ꞌiakëxa.

¹⁶ Usakin ka kamabi nëtën kuinan xubusa okin ꞌakë a mapuakëxa: usa ꞌikë ka imë́ribi tsi rëkirukësa ꞌixun kuinan mapukë Israel unikaman isakëxa.

¹⁷ Uisaran kara xubusa okin chupa ꞌakë aín kaxunuax kuin niruia anun ka Israel unikamax mëníokakiani anua ꞌikë anuax kuani uinu kara kuinsa ax nirakëtia anubi Israel unikamax anu ꞌi nirakëakëxa.

¹⁸ ꞌImainun ka uínsaran kara Nukën ꞌIbun atu kuanun kaia a nëtën kuni kuanux anu pain ꞌi bërukankëxa, anuax kuinsa nirakëkëbë anu pain i bërúakëxa. Anu ka uiti nëtë kara ꞌiti ꞌikë, ati nëtë xubusa okin chupa ꞌakë anu kuin ꞌiakëxa.

¹⁹ Kuin axa xubusa okin ꞌakë anu pain basi ꞌikëbë ka Israel unikamax kuaníma anu pain bukuxun Nukën ꞌIbu Dios rabikankëxa.

²⁰ Kuin axa xubusa okin ꞌakë anuax ꞌitsama nëtë́ishi ꞌinun Diosan ꞌimitankëxua anuax kuanun ꞌimikëbë ka Israel unikama a nuibiani kuankëxa, kuaníbi ka kuin axa Diosan nirakënun ꞌimikëbë atúxribi nirakëakëxa.

²¹ ꞌImainun ka ꞌikatsi imë́ nirakëónxa, pëkarakëbë kuin ax kuankëbë nirukiani Israel unikamax kuankëxa. Usaia imë́ ꞌikësairibi nëtën ꞌikëbë ka a isbiani atúxribi kuankëxa.

²² Kuin axa xubusa okin chupa ꞌakë anu nirakëti ꞌitsama nëtë ꞌianan, achúshi ꞌuxë ꞌikatsi ꞌianan achúshi baritia ꞌikatsi nirakëtankëx kuankëbë ka Israel unikama atux pain rëkuë́nkianima anu pain ꞌi bërúakëxa. ꞌAínbi ka kuin axa kuankëbë kuni atúxribi a nuibiani kuankëxa.

²³ Nukën ꞌIbun ka kuantima ꞌikë kixun nirakëmikëbë bërúanan ka kuanti ꞌikë kiax kikëbë kuni kuankëxa. Aínbi ka Diosan kuin ꞌianan tsi rëkirukësa a kuanun ꞌimikëbë atúxribi kuankëxa, ꞌaínbi ka uinu kara kuin nirakëaxa anuxun Dios rabiakëxa, usakian Israel unibu kanun Moisés Nukën ꞌIbun kásabiokin ꞌakëxa.