Números 27 - Kashibo-Kakataibo Biblia

Diosan Moisés ꞌikësaribitia Israel unikaman ꞌapu ꞌinun Josué anëa bana

¹² Ësokin ka Nukën ꞌIbun Moisés kakëxa: —Aín bashi Abarim kakë anu mapërakëtankëxun kamina anuxun ꞌën Israel unikama ꞌinánti me a min bërúnbi isti ꞌain.

¹³ Usakin a mekama istánkëx kamina min xukë́n Aarón ꞌiásaribiti ñukiani kuantankëx min chaitiokëkaman raraitsibë min raraitsi biranani kuanti ꞌikën,

¹⁴ mi rabëtan kamina ꞌën kakësabiokin ꞌakinma, anu uni ꞌikëma me Sin kakë anuxun israel unikaman ꞌumpax ñui bënëkin ñukákëxun atun ismainun ꞌën kakësabiokin ꞌama ꞌain. (Ënëx ka Meribá kakë ꞌumpax Cadés kakë ëma, anu uni ꞌikëma me Sin kakë anuaxmi ꞌia a ꞌikën.)

¹⁵ Usakian kakëxun ka Moisésnën Nukën ꞌIbu kakëxa:

^16-17 —Dios ꞌimainun ꞌën ꞌIbu, min kamina kamabi uni tsónun ꞌimin, usa ꞌain kamina min achúshi uni ain ꞌapu ꞌixúan, an min kaískë unikama an bëruánti uni ꞌaíma aín ñuina ꞌarakakë kuaínbëkini nikë usai ꞌitima kupín an bërúanti anëti ꞌain.

¹⁸ Ësokian kakëxun ka Nukën ꞌIbun Moisés kakëxa: —Josué Nunnën bëchikë ax ka achúshi uni upí sinánñu ꞌën kaískë ꞌikën. Usa ꞌain kamina aín maxkánu min mëkën nankin kati ꞌain.

¹⁹ Nankin anëtankëxun kamina sacerdote Eleazar anu unikaman ismainunbi uantankëxun, aín ñu mëëti ꞌanun kamabi unin ismainunbi ꞌinánti ꞌain;

²⁰ ꞌinánkin kamina minmi ꞌakësaribi okin ꞌanun kati ꞌain, usa ꞌain ka kamabi Israel unikaman an kakësabiokin aín bana tankin ꞌati ꞌikën.

²¹ ꞌAínbi ka Josuénëx sacerdote Eleazar anu pain kuanti ꞌikën, Josué axa anu kuankë ꞌain ka Eleazarnëx an kakësa ꞌitánun Urim kakë ñu anun aín anë ñui ꞌëbë banati ꞌikën. Usakin ꞌakëxuan Josuénën kakëxun ka Israel unikama añu ꞌanun kara kaia akama ꞌati ꞌikën.

²² Usakin ꞌanuan Nukën ꞌIbun Moisés kakësabiokin ka ꞌakëxa. ꞌAkin ka Josué sacerdote Eleazar anu uantakëxun kamabi unían ax ka ꞌapu anëkë ꞌikë kixun isnun ꞌunánmiakëxa.

²³ Unamikin ka axa ꞌapu ꞌinun aín maxkánu mëkën nankin Nukën ꞌIbun Moisés kásabiokin ꞌakëxa.