Números 24 - Kashibo-Kakataibo Biblia

¹ Usa ꞌaínbi ka Balaamnën Nukën ꞌIbun iskëxa an Israel unibu upíokin sinánxunkë ax asábi ꞌikë ꞌunánkëxa, usa ꞌain ka amiribishi nëtë itsin kuakësa okin Diosan usaía ꞌiti ñukama ñuikin kakëxun kuatëkëni kuanma ꞌikën, kuantëkënkima ka anuxunbi anu uni ꞌikëma me ami bësukinshi isakëxa.

² Usakian Balaamnën Israel kama anu ꞌikë anua ain aintsibë aintsibë bukukë a iskëbëshi ka Diosan bëru ñunshin anu uakëxa;

³ ꞌai anu ꞌirukëbë ka Balaam ësai kiakëxa: ꞌËx kana Balaam Beornën bëchikë ꞌain, usa ꞌixun kana Diosan kara uisai kinun ꞌë kaia unánan upíokin añu kara ꞌia akama ꞌunánkë uni ꞌëx ꞌain,

⁴ usa ꞌixun kana ꞌën Diosan bëru ñunshinan ꞌë ꞌunánmikëxun upíokin unánkin ꞌaia ka Dios kushiira kushi an ꞌë namákësa okin ismianan ain banaribi ꞌunánmia.

⁵ ¡Jacobnën rëbúnki, mitsun xubusa okin chupa këxtú ꞌakë akamax ka upíira upíbu ꞌikën! ¡Israel unibu anu mitsux ꞌikë axribi ka upíira ꞌikën!

⁶ Usa ꞌaish kamina ënën menma kuani sëtë́kë xëbin iskësa ꞌain, ꞌianan kamina achúshi naë baka ꞌurama ꞌikënu ñu ꞌapákësa usaribi ꞌain, ꞌianan kamina unin ꞌapákëxa áloes kakë i Nukën ꞌIbu ꞌapákë uábukë upíira iskësa ꞌain, ¡ꞌimainun kamina kunxan i upíira baka kuëbí nikë iskësa usaribi ꞌain!

⁷ Israel unibunëx ka a xëati ꞌumpax ꞌitsairañu ꞌianan anun atun ñu ꞌapákë chabótiñu ꞌiti ꞌikën. ꞌImainun ka ain ꞌapu ax ka Agagbëtan sënë́maira ꞌiti ꞌikën; a ꞌapu aín kushi ka chaiira ꞌiti ꞌikën.

⁸ Dios an Egipto menua chikinbëtsikin atu bëa ax ka atun Dios ꞌikën, usa ꞌaish ka vaca ain bënë raëkëma manchañu aín kushisa ꞌikën. Usa ꞌixun ka Israel unibunën axa ami nishkë unikama ñuina raëkëman nami pikësa okinshi abë ꞌakanankin; kupitanuma aín pian ꞌakin këñuti ꞌikën.

⁹ Ax tanti rakábukë ka paru inuán tanti rakábukë usaribi ꞌiti ꞌikën: usa ꞌikë ka uínbi atu an ꞌakaskëxuma ubíotima ꞌikën. ¡Chúamarua ka uikaman kara atu nuibatia akamax ꞌiti ꞌikën, ꞌimainun kara uin atu uxkë ubioti kuëënti ꞌit! ¡Uin kara mitsu nuibatia ax ka chuámarua ꞌianan upíokin sinánxunkë ꞌiti ꞌikën, ꞌimainun ka uin kara mitsu ꞌatima oia axribi ꞌatima okë ꞌiti ꞌikën!

Balaam usaía ꞌiti ñukama ñui kia bana

¹⁰ Usai kikëbëtan aín sinan xuáma tani nishkin aín mëkën kushioi mëtashki ꞌikin ka Balacnën ñúkakin Balaam kakëxa: —ꞌËn kana mi kamian ꞌë ꞌai ukë unikama ꞌaisamaira iskin ꞌatimokin sinánxuni unun kixun, ꞌaínbi kamina achúshi ꞌimainun rabë́ okin ꞌakinbi atu upíokin sinánxuan.

¹¹ ¡Usa ꞌain kamina min xubunubi kuanti ꞌain! ꞌËn kana uisa ñu kaina kuëëni akamabi mi ꞌinánti sinánkë ꞌian, ꞌaínbi ka Nukën ꞌIbun usakinmi ꞌati mi sinánxunkëma ꞌikën.

¹² Ësokian kakëxunbi ka Balaamnën kakëxa: —ꞌËn kana ꞌë binunmi xukë unikama ësokin mi kai unun kamian,

¹³ minmi anumi ꞌikë ꞌapun xubu anu ꞌikë kuri ꞌimainun kuríki kamabi ꞌë ꞌinánkëxunbi kana Nukën ꞌIbun kakësama okin ñu upí ꞌanan ñu ꞌatima ꞌakin uibi ꞌëx kuëënkësokin ꞌatimotima ꞌain, usa ꞌain kana Nukën ꞌIbun kakësabiokinshi ꞌati ꞌain kixun kana mi kamian.

¹⁴ Asabi ka usa ꞌain kana ꞌën menubi kuanti ꞌain; ꞌaínbi kana kuanuxun pain ësokin mi kain, uisai kara a unikamabë min rëbúnkikama ꞌinuxun ꞌaia.

¹⁵ Usa ꞌain ka Balaam banai usai ꞌiti ñukama ñui kiakëxa: ꞌËx kana Balaam Beornën bëchikë ꞌain, usa ꞌaish kana ënë banakama ki kísatanin ꞌën kana uisai kara ñu ꞌiti ꞌikë isanan upíokin ꞌunánin,

¹⁶ usa ꞌixun kana Diosan bëru ñunshinan ꞌunánmikëxun upíokin ꞌën an ꞌakësaribi okin ñu ꞌunánin, usa ꞌikë ka an namámikësa okin ismianan añu kara ꞌiti ꞌikë a uni ñuixunun ꞌë ꞌunánmia.

¹⁷ Diosan ꞌë ismikë ñukama ax ka ꞌisama pain ꞌikën, usa ꞌikë kana ꞌurakëo ñu iskësokin ꞌën isin: ax ka Jacobnën rëbúnkinuax achúshi ꞌispa chikíkësa ꞌaish an Israel kama ꞌakinti ꞌapu ꞌiti ꞌikën. An ka Moabnu ꞌikë unikama kupitanunma ꞌanan Setnën rëbúnkikamaribi kupitanunmashi ꞌati ꞌikën.

¹⁸ ꞌAnan ka Edom menu ꞌikë unikamaribi ꞌati ꞌikën, ꞌakin ka anua axa ami nishkë unikama tsókë Seír kakë me aribi ꞌibuakin biti ꞌikë, usakin Israel unibunën ꞌaia ka bëtsi menu ꞌikë unikaman kuati ꞌikën.

¹⁹ Jacobnën rëbúnkinuax ka achúshi uni an kamabi uni abë ꞌakanankin kanantankëxun axa aín ëmanu bërukëkamaribi këñukin ꞌati ꞌikën.

²⁰ Ësai kitankëx ami bësukin Amalecnën rëbúnkikama isi ka Balaam ësairibi kiakëxa: Amalec ax ka achúshi ëma chaiira ꞌaish kushiira ꞌikën, usa ꞌikëbi ka ami nishkë unikaman këñukin achúshirabi bërutanuma atu ꞌati ꞌikën.

^21-22 Kitankëxun quenita unikamaribi isi ka ësairibi banai kiakëxa: Caínan rëbúnkikama ax ka: amia katamëti upíokin ꞌakin, maparanu ꞌisakan aín na unëkin ꞌakësa atun xubu ꞌikën, ꞌaínbi ka ain na ax tsin rëkirukin këñúkë usa ꞌitánun Asiria unibunën ꞌakin atu biti ꞌikën.

²³ Usai kitankëx sënëni ka ësai kiakëxa: ¿Uix kara bamakëma ꞌikë ax kara Diosan usakin ñu ꞌakëbë anubi tsóti ꞌik?

²⁴ Chipre kakë me aín nasí anuax aín manë nuntin ukin ka suntárukama Asiria ꞌimainun Éber aribi këñukin ꞌati ꞌikën.

²⁵ Ësai ki sënë́ntankëxa Balaam aín xubunu kuantamainun ka. Balac axribi aín xubunu kuankëxa.