Números 23 - Kashibo-Kakataibo Biblia

¹ Istánkëxun ka Balaamnën kakëxa: —Ënu kamina mapai achúshi ꞌimainun rabë́ okin maxá, maburukin anuxun ñuina xaroti ꞌë ꞌaxunti ꞌain. ꞌAtankëxun kamina mapai achúshi ꞌimainun rabë́ vaca bëna ꞌimainun mapai achúshi ꞌimainun rabë́ carneroribi ꞌë mëníoxunti ꞌain.

² Usakian Balaamnën anun kakëxun ka Balacnën anuxun ñuina xaroti ꞌatankëxun a rabë́xunbi vaca achúshi këñun carnero achúshiribi rëtankëxun xarokëxa.

³ Usakin ꞌaia ka Balaamnën Balac kakëxa: —Anu ñuina xaroti ꞌakë ënuxunbi kamina Nukën ꞌIbun kara ꞌë uisokin kaia kuatamainun kaínti ꞌain. Kuabëtsini uxun kana uisakin kara ꞌë kaxa a mi kati ꞌain. Kaxun anu ëbiani ka Balaam anu uni ꞌikëma matán menu kuankëxa,

Balaamnën Israel unikama upíokin sinánxuan bana

⁴ kuankëbëa ami mëratia ka Balaamnën Dios kakëxa: —ꞌËn kana mapai achúshi ꞌimainun rabë́ okin maxá bukúnrutankëxun anu achúshi achúshi vaca bakë ꞌimainun achúshi achúshi carnero xaronun ꞌamian.

⁵ Ësokian kakëxun ka Nukën ꞌIbun usakian katánun kixun. Balaam kakëxa: —Amiribishi anua ꞌikë anu kuanxun kamima ꞌën mi kakë banakama a Balac kai kuanti ꞌain.

⁶ Kakëx kuankinbi ka Balaamnën anuxun aín ñuina xarakë a rapasubia Balac abëa ukë moabitas uni aín kushi kamabë nikë mërakëxa.

⁷ Mërai ka ësai Balaam kiakëxa: “Amiaxa bari urukë matá me Aram kakë anuabi ka Balac Moabnu ꞌikë ꞌapu an unun kixun ꞌë kamiaxa Kamikëx kana uan, israel unikama kamina ꞌë uisai kara ꞌisa tania usaía ꞌitánun ꞌë ꞌatimakin sinánxunti ꞌain, usa min okëx ka Jacobnën rëbúnkikama ꞌatimokë ꞌiti ꞌikën, —kixun ka ꞌë kaxa.

⁸ Uisa ¿ixun karana Diosan ꞌatimakin sinánxunkë ꞌikëmabi ꞌën ꞌatimakin sinánxunti aín? ¿Uisaxun karana Nukën ꞌIbun ꞌatima oiamabi ꞌën atu ꞌatima oti ꞌain?

⁹ Anua mapara chaiirabu bukukë ënuxunbi kana isti ꞌain, ꞌimainun kana matá me ënuxunbi isin: Atux ka bëtsi menu ꞌikë unikamabë mëskuax tsótima atúxbi upitax bukuia.

¹⁰ Usa ꞌaish ka masi bëru iskësaira ꞌikën; ¿Uin kara atu tupúnti ꞌik? ¿Uin kara uiti ꞌitsaira kara atux ꞌikë kixun ꞌunánti ꞌik? ¡ꞌËx ñukë ax ka ñu ꞌatima amaxbia a unikama ñukësaribi ꞌiti ꞌikën, usa ꞌaish kana atux ꞌikësaribiti ꞌëx ñuti ꞌain!”

¹¹ Usai kia kuankin ka Balacnën ami nishkin Balaam kakëxa: —¿Añu karamina ꞌain? ꞌËn kana minmi axa ꞌëmi nishkë unikama ꞌatima okin sinánxunun mi bëan, ꞌaínbi kamina min upíokin sinánxuan.

¹² Ësakian kakëxun ka Balaamnën kakëxa: —ꞌËn kana mi kan uisakin kara Nukën ꞌIbun ꞌë kaia kuatankëxun mi kaxun.

¹³ Usai kiabi ka Balacnën amiribishi katëkëankëxa: —Amanuribi ꞌëbë kuanxun, kamina anuxun anua ꞌikankë a kamaira iskimabi aín kuainakëkë ashi isti ꞌain. Anuxun iskin kamina ꞌatima okin atu sinánxunti ꞌain.

¹⁴ Ësakin kabiankin ka Balacnën Balaam anua Sofin, kakë me ꞌikë aín bashi Pisgá a manámi anu buánxun mapai achúshi ꞌimainun rabë́ maburukin maxá, ꞌatankëxun anuxun vaca bakë achúshi ꞌimainun carnero achúshiribi anuxun xaroti ꞌakë achúshi achúshi rëtankëxuan xaronun ꞌamitëkëankëxa.

¹⁵ Anuxun ka Balaamnën Balac kakëxa: —Anuxun ñuina xarokë ënuxunbi kamina Diosan kara uisokin ꞌë kaia kuatamainun kaínti ꞌain.

¹⁶ Kabiania kuankëbë ami chikirakëtëkënkin ka Nukën ꞌIbun Balaam usakian Balac kati bana kakëxa. ꞌImainun ka ësokinribi kakëxa: —Anua ꞌikë anu kuantankëxun kamina Balac ꞌën mi kakësabiokin kai kuanti ꞌai kixun ka kakëxa.

¹⁷ Kakëx anuaxa kuankë anu kuantëkënkin ka Balaamnën anuxun ñuina xarokë rapasu Moabnu ꞌikë aín kushi kamabë nikë Balac mërakëxa. Mërakëxun ka Balacnën ñukákëxa: —¿Uisakin kara mi Nukën ꞌIbun kax?

¹⁸ Usakin ñukákëx ka ësai ki Balaam banai kiakëxa: Balac Sipornën bëchikë ꞌën mi kamainun kamina upíokin kuati ꞌain.

¹⁹ Dios ax ka nusama ꞌikën: ax ka këmëi bananan bëtsi okin sinántëkëkini kima. Uisa ñu ꞌakatsi kara ax kia a ka asérabi ꞌaia. Uisa ñu ꞌanux kara kiáxa a ka asérabi ax kikësabiokin ꞌaia.

²⁰ Diosan ka Israel unikama upíokin sinánxunun ꞌë kaxa: Usa ꞌain kana Diosan upíokin sinánxunia ꞌën usama ka kixun katima ꞌain.

²¹ Uínbi ka paránani ꞌatimonania Israel unibu Jacobnën rëbúnkikama iskëma ꞌikën. Usa ꞌain ka Dios atubë ꞌikën, usa ꞌikë ka atun ꞌapusa ꞌikë rabia.

²² Dios an Egipto menua atu chikínbëtsinkin bëa ax ka, vaca aín bënë raëkëma aín kushisamaira atunan ꞌikën.

²³ Jacobnën rëbúnki Israel unibukama ka ñunshinan aín kushin ꞌanun ꞌamikëxunbi uisabi otima ꞌikën; Israel unibu ka ñubë́ unikaman uisabi oima. ¡Usa ꞌaish ka bërí Israel unikama ësakin kaisa ꞌikën Uiti ñu upí ishi kara Diosan mitsu ꞌaxuanxa kixun!

²⁴ A unikamax ka paru ꞌinuánëxa aín piti ñuina binuxun bari rakábutima nikë usaribi ꞌikën. Usa ꞌixun ka usaribikin Israel unikaman abë ꞌakanankin bëtsi unikama ꞌaia.

²⁵ Ësakian kakëxun kuakin ka Balacnën Balaam kakëxa: —¡Kamina a unikama ꞌatimakin sinánxuinsama tanin, usa ꞌain kamina upíokinribi sinánxuntima ꞌain!

²⁶ Ësakian kakëxun kuakin ka Balamnën kakëxa: —¿Karana ꞌën mi kakëma ꞌain, ꞌën kana Nukën ꞌIbun kara uisokin ꞌë kaia ꞌashi ñuixunkin kanuxun mi kakëma ꞌain?

²⁷ Usokin kakëxun ka Balacnën kakëxa: —Amoribi kananuna kuanti ꞌain. Anu kuankëbë sapi ka Dios Israel unikama ꞌatimakin sinánxunti kuëëntima ꞌikën.

²⁸ Usakin kabiankin ka Balac an Balaam ain bashi Peor kakë anu mapërakë kiankëxa. Anuxua kamabi me anu uni ꞌikëma iskë anu buánkëxa.

²⁹ Anuxun ka Balaamnën Balac kakëxa: —Ënu kamina mapai achúshi ꞌimainun rabë́ okin maburukin anuxun ñuina xaroti ꞌë ꞌaxunti ꞌain, ꞌatankëxun kamina mapai achúshi ꞌimainun rabë́ vaca bëna ꞌimainun carnero mapai achúshi ꞌimainun rabë́ ꞌë mëníoxunti ꞌain.

³⁰ Usakian Balaamnën kakëxun ka Balacnën an kakësabiokin anuxun ñuina xaroti ꞌakë achúshi achúshinu vaca bëna achúshi këñun carnero achúshiribi rëtankëxun xarokëxa.