Números 22 - Kashibo-Kakataibo Biblia

Balacnën aín unikama Balaam katánun xuá bana

¹ Anua ꞌikankë anuax tsuákiru kiani kuantankëx ka israel unikamax Moab kakë me auküax bari urukë Jordán kakë baka ꞌurama Jericó ëma bëmánon anu bëbakëxa.

² Anu ka Sipor kakë uni aín bakë bëchikë Balac ax ꞌapu ꞌiakëxa, anuxun ka uisakin kara israel unikaman abë ꞌakanankin amorreo unibu kupitanuma ꞌaxa kixun kuakë ꞌiakëxa.

³ ꞌImainun ka Moab kakë Menu ꞌikë unikamanribi Israel unibunën ꞌaisamaira ꞌixun atun me ꞌurama obëtsinia kuanan Amorreo unibu këñúkë, aribi kuati ꞌitsaira rakuëkankëxa.

⁴ Usa ꞌain ka Moabnu ꞌikë unikaman Madiánu ꞌikë aín kushibukama kakëxa: A unibunëx kaisa ꞌaisamaira ꞌikën. Usa ꞌixun ka vaca bënëan me tsitsibiankin ñu ꞌapákë pianan basi pikësa usokinshi nun me tsitsiruti ꞌikën. A nëtëkaman ka Balac ax Moab kakë me anu ꞌapu ꞌiakëxa.

⁵ Anuxun ka Beor kakë uni aín bëchikë Balaam Petor kakë ëma Éufrates baka ꞌura ꞌikë a bitánun kixun aín unikama xuakëxa, ax ka Amav kakë me anu ꞌiakëxa. Usakin xukin ka ësokin Balaam katánun Balacnën aín uni kakëxa: ꞌAisamaira uni ka Egipto menuax kamabi nun me tsitsiru bëtsini uaxa kixun ka kamiakëxa. Atux ka nubë sënë́maira ꞌianan nu ꞌuramaira ꞌikë kixun katánun kamiakëxa.

⁶ Usa ꞌain kamina bënëti uxun ënë unibu ꞌatima okin sinánxuni uti ꞌain, atux ka nubë sënë́nma kushiirabu ꞌikën. Usakinmi ꞌaia sapi kana abë ꞌakanankin ënë menua ꞌën chikínti ꞌain. ꞌËn kana ꞌunan minmi upíokin sinánxunkëx ka uni upitax bukuia, ꞌimainun min këñutanun sinánxunkëx ka uni mix kikësabi ꞌí këñutia.

⁷ Ësokin kamia ka Moabnu ꞌikë aín kushibu ꞌimainun Madiánu ꞌikë aín kushibu anribi anun Israel kama ꞌatima okin sinánxunia kupíoti kuríki buani kuanxun uinu kara Balaam ꞌia anu bëbaxun Balacnën kakë banakama ñuixunkin kakëxa.

⁸ Ñuixunkëxun ka Balaamnën kakëxa: —Ënu kamina ënë imë́ ꞌuxti ꞌain, ënë imë́ kara Nukën ꞌIbu uisakin ꞌë kati ꞌikë kixun ñukátamainun. Ësokin kakëx ka Moabitanën xukë aín kushikama anu bërúakëxa.

⁹ ꞌAínbi ka Diosan ami mërakin ësokin Balaam ñukákëxa: —¿Uinu ꞌikë unikama kara min ꞌitinu bëbakë ax ꞌik?

¹⁰ Kakëxun ka Balaamnën kakëxa: —Ax ka Moab kakë menu ꞌikë aín ꞌapu Balac Sipornën bakë bëchikë an ꞌë kanun xukë ꞌikën.

¹¹ Egipto menuax kaisa ꞌaisamaira uni atun me tsitsibëtsi uaxa kiax ami rakuë́kin ka ꞌë binun kixun xuaxa. Usa ꞌain ka bënëti kuanxun a unibu ꞌën ꞌatima okin sinánxunti kuëënia, usokëbëtan karaisa ain suntárukamabëtan ꞌakin ain menua chikínti ꞌikë atun tanun kixun ka ꞌë kamiaxa.

¹² Ësokin kakëxun ka Diosan Balaam kakëxa: —Atubë kamina a unibu ꞌatima okin sinánxuni kuantima ꞌain, ꞌën kana atu upíokin sinánxunkin upitax bukunun ꞌimin.

¹³ Usokian Diosan kakëx pë́karakëbë niruxun ka Balacnën xukëxa a kai kuankë unikama a Balaamnën kakëxa: —Mitsun menu kamina rikianti ꞌain. Nukën ꞌIbu ka mitsubë ꞌëx kuanti kuëënima.

¹⁴ Usokian kakëx anu kuantëkëxun ka Moabnu ꞌikë ain kushikaman Balac kakëxa: —Balaam ka nubë uisama tanxa kixun ka unikama an kakëxa.

¹⁵ Kakëxunbi ka amiribishi xutëkënkin a paían xukë ain kushikama ꞌasamaira xukin sinánñuira a kaístankëxun xuakëxa.

¹⁶ Xukëx rikianxun ka amiribishi Balaam kakëxa: —Balac Sipornën bakë bëchikë an ka ësokin mi kanun nu xuaxa: Kamina ꞌën mi kamikëx uisama tanima ꞌuti ꞌain.

¹⁷ ꞌËn kana uiti kuríki kaina kuëënin atibi ꞌinánan nuibakin añu kaina kuëënin abi mi ꞌinánti ꞌain; usa ꞌain kamina a unikama ꞌë ꞌatima okin këñutanun sinánxuni uti ꞌain.

¹⁸ ꞌAínbi ka Balaamnën a unikama kakëxa: —Balac an kamaishi ain xubunu ꞌikë ain kuri ꞌimainun aín kuríki ꞌinánkëxunbi kana ꞌën ñu chaiira ꞌaxuanan ñu chukumarabi ꞌaxuntima ꞌain, ax ka Dios kuëënkësama okin ꞌën ꞌakë ꞌiti ꞌikën.

¹⁹ Katankëxun ka mitsúxribi kamina ënë imë́ ënu bërúti ꞌain, uisakin kara Nukën ꞌIbun ꞌë kaia kuatëkëmainun kixun ka a unikama kakëxa.

²⁰ Kakë a imë́ ka Diosan ami mërakin Balaam kakëxa: —A unibu mi bitsi uan kamina nirukiani abë kuanti ꞌain. Aínbi kamina ꞌën mi kakësabiokinshi ꞌati ꞌain.

Balaam Nukën ꞌIbun ángelbë mëranan bana

²¹ Usai ꞌiónx pëkarakëma ꞌaínshi niruxun burro ain xanu mëníobiani ka Balaam a bitsia ukë moabitas uni aín kushikamabë kuankëxa.

²² Kuanía aín burronu ꞌirukiani kuankëbë ka an ñu mëëxunkë uni rabë́ axribi abë kuankëxa. ꞌAínbi ka Nukën ꞌIbu kuania oi ꞌitsaira ami nishakëxa. Usaia nishkëbë ka aín ángel anúan kuankë bai anun inútisama okin bëarati nirakëakëxa.

²³ Bain kuankinbi ka burron Nukën ꞌIbun ángel aín manë xëtokë tuíanx bai nëbëtsi nikë isakëxa, isi ka anúan kuankë bai a ꞌimainun amo ki abákëxa; abatia okin ka bainubi kuantëkënun kixun Balaamnën aín burro mëëakëxa.

²⁴ Usokëbë ka Nukën ꞌIbun ángel anúan kuankë bai kuëbí ñu ꞌapákë amo rabë́ maxá chaiorukin kënëkë nëbëtsi nirakëakëxa.

²⁵ Usai Nukën ꞌIbun ángel nikë isi abati kënëkë amo nipakëkin ka burron Balaamnën xo amibi tsënkakin bitaxakëxa. Usokin ꞌakëxun ka Balaamnën ain burro amiribishi mëëtëkëankëxa.

²⁶ Usomainun ka Nukën ꞌIbun ángel anpan atu rëkuë́nbiani kuanx bai, tsítsi anun amo ki kuainsama okin bëarati nirakëakëxa.

²⁷ Usa ꞌain ka burro an Nukën ꞌIbun ángel isi rakuë́ti Balaam menu nipáti rakábuakëxa. Usakëbë nishkin ka Balaamnën aín burro i tëakënën rishkiakëxa.

²⁸ Rishkikëxëshi Nukën ꞌIbun ꞌimikëx banakin ka aín burron Balaam kakëxa: —¿Uisa ꞌën okëxun karamina amiribishi ꞌë rishkitëkënin? Bërí kamina rabë́ ꞌimainun achúshi okin ꞌë rishkin.

²⁹ —ꞌËmi karamina kuaitisatanin —kixun ka Balaam kakëxa—. ꞌËn mëkënu manë xëtokë ꞌain kana bëríbi mi ꞌaxun rakantsian.

³⁰ Kakëxunbi ka burrun Balaam kakëxa: —ꞌËx kana min burro ꞌain uínsaranbi kana ësokin mi ꞌakëma ꞌain uinu kaina kuainsatani anubi kana mi nikian, minbi kamina ꞌunan. —Asérabi ka usa ꞌikë —kixun ka Balaamnën kakëxa.

³¹ Usakin aín burro ꞌaia ka Nukën ꞌIbun Balaam aín ángel, manë xëtokë tuianxa bai nëbëtsi nikë isnun ismiakëxa. Ismikëxun nikë isi ka Balaam rantinpuruni aín bëmánanën me tikai tsóbuakëxa,

³² usai ꞌiabi ka Nukën ꞌIbun ángelnën kakëxa: —¿Uisa oti karamina min burro rabë́ ꞌimainun achúshi okin rishkian? ꞌËn kana anun mi kuankë bai bëaran ꞌëx kuëënkëbëmabi mi ukë a kana kuëënima.

³³ Usa ꞌain ka min burro ꞌë, isi rabë́ ꞌimainun achúshi oi amo pátsianxa. Min burro kuainakëtima kuanshikëbëtan kana axa kuantamainun mi ꞌakë ꞌitsían.

³⁴ Ësakin kakëxun ka Balaamnën Nukën ꞌIbun ángel kakëxa: —ꞌËx kana ꞌuchan, ꞌën kana ꞌunánkëma ꞌain mix kamina anun ꞌëx kuanti bai bëarati anu nitsa kixun. Mix kuëënkëbëma kana ënuaxëshi kuantëkënti ꞌain.

³⁵ Usakian kakëxunbi ka Nukën ꞌIbun ángelnën kakëxa: —A unikamabë kamina kuanti ꞌain, ꞌaínbi kamina ꞌën mi kakë banaishi kati ꞌain. Kakëx ka aín kushikama a bitia, Balacnën xukë akamabë Balaam kuankëxa.

Ami bëbakuatsini aia Balacnën Balaam bia bana

³⁶ Kuania bëbaia kuabiani kuanxun ka Balac kakë ꞌapun an Balaam Moab ꞌurama ꞌikë achúshi ëma anua Arnón kakë baka ꞌikë a rapasu anubia atun ëma sënënakëkë anua bikin,

³⁷ ësokin kakëxa: —ꞌËn kana uisama taniabi mi kamian; ¿Uisa kupín kaina uisama tan? ¿Min kaina ꞌën mi kupíoisama sinan?

³⁸ Kakëxun ka Balaamnën kakëxa: —Ënu kana ꞌain min kamikëx kana uan. ꞌAínbi kana ꞌën kushínbi mi katima ꞌain; usa ꞌixun kana uisa okin kara Diosan ꞌë kaia a banaishi mi kati ꞌain.

³⁹ Ësokin kabiani ka Balaam buani Balac Quiriat-husot anu kuankëxa,

⁴⁰ kuanx aín ꞌikënu bëbaxun ka Balaam ꞌimainun abëa kuankë aín kushibu pimitia vaca ꞌimainun ovejakama an ñu mëëxunkë unikaman rëxun piti ꞌabiankin buánxunun kamiakëxa.

⁴¹ Usakin ónkë pëkarakëbëtan ka Balacnën bibiankin Balaam matán me Bamot-baal kakë anu mapërakëxun kamaira iskinmabi anua Israel unikama bukukë aín xubu ismiakëxa.