Números 21 - Kashibo-Kakataibo Biblia

Israel unikaman Hormá kakë me bia

¹ Usa ꞌain ka anu achúshi ꞌapu cananeo ax Négueb kakë me anu tsókë uni ax, Arad kakë ëma anu ꞌapu ꞌiakëxa, anuxun ka israel unikama ka Atarim kakë bai anun aia kixun ñuikania kuakëxa, kuati aín suntárukamabë kuanx abë ꞌakanankin ka Israel uni raíri ñatankëxa.

² Usokëxun ka israel unikaman Nukën ꞌIbu, a mekama biti ꞌakinkëxuinsa atun anu ꞌikë ëmakama ꞌimainun anua ꞌikë ñukama këñuti ꞌikë kixun kakëxa.

³ Kakëxun ka Nukën ꞌIbun israel unikama atun ñukákësabi okin ꞌanun ꞌamiakëxa, ꞌamikëxun ka Cananeos unikama abë ꞌakanankin israel unikaman achirabi bërutanuma këñuakëxa, këñukin ka atun ëmakamaribi usaribi okin ñuñuma ꞌitánun këñuakëxa. Usakin ꞌatankëxun ka a me Hormá kakin anëakëxa.

Moisésnën runusa okin manë panshían ꞌá bana

⁴ Matá me Hor kakë anuax tsuákirukiani ka Israel unikama parúmpapa xónsa kakë ami kikiani kuankëxa, kuani ka Edom kakë me au kuanima a ratanarati amotan kuankëxa. Kuani ka anúan kuankë bainuax, unikama aín sinan bëtsi bënë́kankëxa,

⁵ bënëti ka Israel unikama Diosmi ꞌatimai bananan Moisésmiribi ꞌatimati banai kiakëxa: —¿Uisati karamina mitsun nu Egipto menua chikínbëtsían? ¿Anu uni ꞌikëma me ënuax këñun karamina nu bëan? ¡Ënë menu ka ꞌumpaxbi ꞌaíma ꞌimainun a pitibi ꞌaíma ꞌikën! ¡Nux kananuna ënë piti ratsushi pi atsani bënëtin!

⁶ Usai kikania kuakin ka Nukën ꞌIbun kamabi uni pitanun axa pianankë runu unimiakëxa, unimikëxuan runun pikëx ka ꞌitsaira Israel unibu këñuakëxa.

⁷ Usokëbë anua ꞌikë anu kuanxun ka Israel unibunën Moisés kakëxa: —¡Nukamax kananuna Nukën ꞌIbu ñui ꞌatimati bananan mi ñuiribi ꞌatimati banai ꞌuchan! ¡Usa ꞌain kamina Nukën ꞌIbu ënua runu nëtëminun kati ꞌain! Kakëxun ka Moisésnën atun ꞌuchakama tërënxunun Nukën ꞌIbu ñukáxuankëxa,

⁸ ñukáxunkëxun ka Nukën ꞌIbun Moisés kakëxa: —Manë panshían kamina an atu pikë runu abi tankin ꞌati ꞌain, ꞌatankëxun kamina imaxu chaxkë́ achúshi nitsíntankëxun anu bëntanti ꞌain. Bëntankë a runu ami bësukin isi ka ui kara runun pia ax pëxkúti ꞌikën.

⁹ Usokin ꞌanun kakëxun achúshi runusabi ꞌitánun manë panshian ꞌatankëxun ka Moisésnën i achúshi nitsínkë anu bëntankëxa; bëntankë ꞌikë runu tankin manë ꞌakë ami bësukin isi ka ui uni kara runun pia ax pëxkúakëxa.