Números 20 - Kashibo-Kakataibo Biblia

Diosan ꞌimikëx maparanua ꞌumpax chikia bana

¹ Anúan baritia ꞌirutabakë ꞌuxë achúshi ꞌirukë anun ka israel unibu anu uni ꞌikëma me Sin kakë anu bëbakëxa, bëbatankëx ka ꞌitsama nëtë́ishi Cadés kakë anu bërúakëxa. Anu atux aínbi ñuia ka María anubi maínkankëxa.

² Usai atux a menu aínbia a xëati ꞌumpax ꞌaíma ꞌain ka Moisés ꞌimainun Aarón ñui sharati banai ki kamabi uni timë́kankëxa,

³ timë́xun ka Moisés ësokin kakëxa: —¡Uisati kara ax pain ñukë unikamabë ñunun Nukën ꞌIbun nu ꞌimikëma ꞌit!

⁴ ¿Uisati kaina mitsun Nukën ꞌIbun unibu anu uni ꞌikëma menu bëan? ¿Mitsun kaina nukamax nun ꞌarakakë ñuina kamabëbi bamati kuëënin?

⁵ ¿Uisati kaina Egiptonua chikínbëtsinkin ꞌaisama me ënu nu bëan? Ënë mex ka anu añu ñubi ꞌapátisama ꞌikën; ꞌimainun ka higuera kakë ibi ꞌaíma ꞌianan uvas ꞌapákëbi ꞌaíma ꞌimainun i bimiñubi ꞌaíma ꞌianan ¡ꞌUmpax a xëatibi ꞌaíma ꞌikën!

⁶ Usai kia kuakin atu ëbiani ꞌuri kuanx ka Moisés ꞌimainun Aarón xubusa okin chupa ꞌakë aín xëkuënu, nukutishi rantinpuruni aín bëmánanën me tikai tsóbuakëxa. Usaia ꞌikëbë ka Nukën ꞌIbu kushi ichuti mërakëxa,

⁷ usai mërakëbëtan ka Nukën ꞌIbun Moisés kakëxa:

⁸ —Min tsati bikin kamina min xukën Aarónën mi ꞌakimainun unikama timë́ti ꞌain. Timë́këbëtan kamina atun ismainunbi min tsati bikin ꞌumpax anuax chikínun mapara kati ꞌain, kakëxa anuax ꞌumpax chikitia kamina isti ꞌain, isia ka unikaman xëamainun atun ñuinakamanribi xëati ꞌikën.

⁹ Kakëxun ka Moisésnën Nukën ꞌIbun kakësabiokin aín tsati biakëxa;

¹⁰ bitankëxun ka Moisés ꞌimainun Aarónën kamabi uni mapara rapasu timë́xun kakëxa: —Bana kuakëma unibu mitsun kamina kuati ꞌain: ¿Nun karanuna ënë maparanua mitsun xëati ꞌumpax biti ꞌain?

¹¹ Ësokin kakinshia Moisésnën aín tsati manámi okin rabë́okin mapara taxkakëxa, taxkakëbëshi ka mapara mëuküax chaiira ꞌinun tanpëkuatsini ꞌumpax chikíakëxa. Usai ꞌia ka unikaman atun ñuina kamabëtan ꞌumpax xëakëxa.

¹² ꞌAínbi ka Nukën ꞌIbun Moisés këñun Aarón kakëxa: —Mi rabëtan kamina ꞌën kakësabiokin Israel unikaman ismainun ꞌakëma ꞌain usa ꞌain kamina ënë unikamabëbi a me ꞌën mitsu ꞌinánti anu bëbantima ꞌain.

¹³ A ꞌumpax upíira ax ka Meribá kakë me anuaxa Israel unikama ami ꞌatimati banakëxunbi Nukën ꞌIbun aín kushi ismikin maparanua ꞌumpax chikimia a ꞌikën.

Edom kakë menu ꞌikë ꞌapun Israel unibu aín men kuanti kuëë́ama bana

¹⁴ Usa ꞌain ka Moisésnën Cadés, kakë me anuxun Edom kakë menu ꞌikë ꞌapu ësokin katánun uni xuakëxa: “Min aintsi israel unikaman ka ësokin mi kanunkixun nu xuaxa: Minbi kamina upíokin ꞌunan nukamax kananuna ꞌaisamaira tëmërai kixun.

¹⁵ Nun chaitiokëkamax ka Egipto menu kuanx anu ꞌitsa baritia tsóakëxa, ꞌaínbi ka egipcio unibunën atu ꞌasaribiokin nuribi ꞌatima okëxa, nun chaitiokëkama ꞌasaribiokin;

¹⁶ usakin ꞌakëxun kananuna Nukën ꞌIbu nu ꞌakinun kixun sharákin ñukákën, ñukákëxun kuankin ka aín ángel achúshi Diosan xuakëxa, xukëxun ka Egipto menua nu chikíankëxa. Usa ꞌain kananuna bërí, Cadés kakë ëma anua min me sënënakëkë anu ꞌain.

¹⁷ Usa ꞌain kananuna mi ñukatin min men inuti karamina kuëënti ꞌai kixun mi ñukati uan. ꞌAínbi kananuna anumi ñu ꞌapámianan uvas ꞌapámikë me anun kuantima ꞌain, ꞌianan kananuna min me naëmikë kamanua ꞌikë ꞌumpax xëatima ꞌain. Kuani kananuna uinu ꞌikë baix kara anúinra nikë ꞌikë anuinshi min me inubiani kuanti ꞌain.”

¹⁸ Kixun kakëxunbi ka Edomnu ꞌikë ꞌapúnribi kakëxa: —¡ꞌËn memi kamina bëba kuantsintima ꞌain, ꞌën men bëbakuatsini aia mërakin kana ꞌën suntárukamabëtan mitsu ꞌati ꞌain!

¹⁹ Kixun kakëxunbi ka Israel unikaman amiribishi katëkëankëxa: —Anun kuanunmi nu kakë bai cha anuinshi kuankin min me naëkë kamanua ꞌumpax mëraxun xëanan nun ñuinakama xëamixun kananuna mi kupíoti ꞌain. Usa aín kananuna min me ënuaxëshi bënëkiani kuanti ꞌain.

²⁰ Kakëxunbi ka Edom menu ꞌikë ꞌapun katëkëankëxa: —¡Kana mitsu kan ꞌën men kamina inúkantima ꞌain! Usokin katankëxun ain suntárukama an ꞌakánanti ꞌunánkë upíbu a bibiani kuanxun ka

²¹ anun israel unibu kuainsama okin bai bëarakëxa. Bëarakëbë ka anun kuanima Israel unibu bai itsi bibiani amotan kuankëxa.

Aarón ñua ñuikë bana

²² Usokian ꞌakëx ka kamabi Israel kama Cadés kakë me anu paían ꞌikë anuax chikíkiani Hor kakë aín bashi ami kikiani kuankëxa.

²³ Anua Edom kakë me sënënakëkë anuxun ka Nukën ꞌIbun Moisés ꞌimainun Aarón kakëxa:

²⁴ Aarón ka ñuti ꞌurama ꞌikën, usa ꞌaish ka ꞌën israel unikama ꞌinánti me anu bëbatima ꞌikën, anua ꞌumpax Meribá kakë anuxun kamina ꞌën kakësokin mitsun ꞌakëma ꞌain.

²⁵ Moisés min kamina Aarón ꞌimainun aín bakë bëchikë Eleazar Hor kakë bashi ain rëbunu buánti ꞌain;

²⁶ anuxun kamina aín papa Aarón ñukëbëtan ain bakë bëchikë Eleazar Sacerdotenën pañukë chupa a pëmitankëxun pañumiti ꞌain. Anuax ka Aarón ñuti ꞌikën.”

²⁷ Usakin ka Moisésnën Nukën ꞌIbun kakësabiokin ꞌakëxa. ꞌAi kuani ka kamabi Israel unibunën ismainunbi, aín bashi Hor kakë a mapërakëruakëxa,

²⁸ anuxun ka Moisésnën Aarón Sacerdotenën pañukë chupa a pëmitankëxun aín bakë bëchikë Eleazar a pañumiakëxa. Usokëbë ka aín bashi anuaxbi Aarón ñuakëxa; ñukë ka Moisés ꞌimainun Eleazar anua ꞌikankë anu aín bashinuax ubúakëxa.

²⁹ Ubukëbëtan Aarón abë aiama iskin ka ñuaxa kixun sinani ka israel unibu, nitë́xëti masá nuituti achúshi ꞌuxë ꞌimi inkankëxa.