Números 14 - Kashibo-Kakataibo Biblia

Israel unikaman Nukën ꞌIbun kakëxunbi kuaisama tan bana

¹ Usakian atun ñuia kuati ka Israel unikama rakuë́ti munuma sharati aín sinan bënëoi, a imë́ pëkarakuatsintamainun nitë́xëkankëxa.

² Usai ꞌi ka kamáxbi atux Moisés ꞌimainun Aarón ñui ꞌatimati banai kanankëxa: “¡Uisa ꞌaish karanuna Egipto menuaxbi këñutima, anu uni ꞌikëma me ënuax bamai këñuti uakën!

³ ¿Uisati kara Nukën ꞌIbun ënë menu nu bëax? ¿Nuxnu ꞌakanani bamakëbëtan kara nun xanukama ꞌimainun nun bëchikëkama nu ꞌatankëxun bëtsi unikaman biti ꞌik? ¡Usa ꞌain sapi kananuna Egipto menubi kuantëkënti ꞌain!”

⁴ Usa ꞌain ka bëtsibë bëtsibë kánani kikankëxa: “¡An nu buánti achúshi nun ꞌapu anëtankëx kananuna Egipto menubi kuantëkënti ꞌain!”

⁵ Ësai atux kia kuati ka Moisés ꞌimainun Aarón rantinpuruni atubë kuëbikanantisama tani aín bëmánanën me tikai anua Israel unibu timë́kë atun ismainunbi ꞌiakëxa,

⁶ usaía ꞌikëbë ka Josué ꞌimainun Caleb, an me ñachai kuankë a rabëtax aín sinan xuamatani nishkin aín pañukë chupa tukakin

⁷ kamabi Israel unikama kakëxa: —¡Nun nu ñachabëtsinkë me ax ka upíira ꞌianan anuxun ñuina ꞌarakai anu tsótisa ꞌiaxa!

⁸ Nukën ꞌIbun nu kuëënkin buánxun ka, a menu nu atsínun ꞌimikin nu ꞌinánti ꞌikën. A menuax ka a kuti ñu ꞌaisamaira ꞌinun bimimainun a ꞌarakati ñuinakamax upíbuira ꞌinun kaiti uakamë ꞌëoia.

⁹ Usa ꞌain kananuna nun Nukën ꞌIbumi ꞌatimakin ñui, a menu ꞌikë unikamami uakamë iëoia rakuë́tima ꞌain, akamax ka nux ami rakuë́tisama ꞌikën; ꞌianan ka an atu ꞌakinti ꞌaíma ꞌikën, nux kananuna an nu ꞌakinti Nukën ꞌIbubë ꞌain. ¡Usa ꞌain kamina rakuë́tima ꞌikanin!

¹⁰ Ësakin kakëxun kuankin ka Israel unikaman a rabë́ maxaxan rëisatankëxa. Usakin ꞌaisa tankëbëbia xubusa okin chupa ꞌakë anuax, Nukën ꞌIbu kushi ichuti atumi chikirakëtia ka Israel unikaman isakëxa.

¹¹ Usai ꞌikëbëtan ka Nukën ꞌIbun Moisés kakëxa: —¿Uínsaran ira kara ënë unikaman ꞌën ꞌakinkëxunbia ꞌën kana ꞌakinima kixun sinánkë a ënti ꞌik? ¿Uínsaran ira kara ënë unikamax ꞌën kushínbi atun ismainun bëtsi ñukama ꞌa a sinani ꞌëmi katamëti ꞌik?

¹² Usa ꞌain kana ënë unikama a menu atsini kuankëmashi anun maëtanun achúshi ꞌinsin xuti ꞌain; ꞌaínbi kana min rëbúnkikama achúshi ëma atu mapë́scakëbu ꞌianan kushiirabu ꞌaish atusamaira ꞌinun ꞌimiti ꞌain.

¹³ Ësai kiabi ka Moisésnën Nukën ꞌIbu kakëxa: —Min kamina min kushínbi, ënë unikama Egipto menua chikían. Usa ꞌain ka egipcio unikaman usakin min ënë unikama ꞌaia kuati ꞌikën.

¹⁴ Kuakin ka Canaán menu tsókë unikama ñuixunti ꞌikën. Atúnribi ka min kamina ënë unikama atubë ꞌixun, ꞌakini kixun ñuikania kuaxa, ꞌimainun kamina an unánkë unibë uni bësúnax banakësari banain, ꞌimainunribi kamina min nëtë kuinsa axa atubë ꞌinun ꞌimin, ꞌimainun kamina nëtën kuinsa mëu rëkuë́n kiankin atu buánan imë́ribi tsi rëkirukësa a isia anunbi kuanun atu ꞌimian.

¹⁵ Ënë unikama mi achúshi okin ꞌakëinshi këñukin maëmikë kuati kara bëtsi menu ꞌikë unikama uisai kiti ꞌikën:

¹⁶ Nukën ꞌIbun ka a unikama a ꞌinánnuxua ka me anu kuantanun ënkinma, anu uni ꞌikëma menuxun maëmiaxa kiax kikanti ꞌikën.

¹⁷ Usa ꞌain kamina Nukën ꞌIbu Dios ꞌixun min kushi nu ismikin asérabi mix kiásabiokin ꞌati ꞌain. Mixbi kamina usai kian,

¹⁸ usa ꞌaish kamina sinan mënínñushi ꞌianan, min unikama ꞌitsaira nuibatin ꞌimainun kamina atun ꞌatima ñu ꞌakë tërëanan min bana kuaisama tankë akama ënkinma uisakin kaina ꞌaisatani usakin tëmëramin, ꞌanan kamina aín papanan ꞌanan aín bakë bëchikënën bëchikë ꞌimainun aín baba aín xutan bakë bëchikënën bëchikë akama ꞌatima ñu ꞌaia tëmëramiti ꞌain.

¹⁹ Minmi min unikama nuibakë ax ka upíira ꞌikën, usa ꞌain kamina ënë unikama ꞌuchaiabi nuibakin upíokin sinanamiti ꞌain, bëráma kamina Egipto menuxunbi munu ënë menu bëakën.

Nukën ꞌIbun Israel uni rairi tëmëramia bana

²⁰ Usai kiabi ka Nukën ꞌIbun Moisés kakëxa: —Asabi ka ꞌën kana min ñukákësabi okin atun ꞌucha mëníoti ꞌain.

²¹ ꞌAínbi kana ax ka asérabi kamabi menu kushiñuira ꞌikë kixuan unin unánun unikama nuibatin,

²² ui unikaman kara Egipto menuxun ꞌën kushin bëtsi unin akëma ñu ꞌaia isanan anu uni ꞌikëma menuxunribi ꞌaia iskinbi, anu uni ꞌikëma menuxun kakëxunbi ꞌën bana kuakëma ꞌikën,

²³ a unikama achúshinëxi ka ꞌën a ꞌinánuxun aín chaitiokëkama ka me anu kuantima ꞌikën. ꞌImainun ka ui unikamax kara ꞌën ñu ꞌaia isíbi ꞌëmi ꞌatimati banaxa ax ka anu tsóti kuantima ꞌikën.

²⁴ ꞌAínbi ka ꞌën uni Caleb ax raírinëxa usai ꞌikëbëbi usai ꞌikinma aín sinan upí ꞌixun ꞌën bana kuaxa. Usa ꞌain kana kuanxuan isbëtsinkë me anu atsínun ashi ꞌimianan, ain rëbúnkikamaribi a menubi tsónun ꞌimiti ꞌain.

²⁵ (Usa ꞌain ka me sapan anu amalecita ꞌimainun cananeo kakë unikama tsotia) anu kuanux kamina imë́ishi anu uni ꞌikëma me auküaxmi ukankë au kuatankëx parúmpapa xónsa kakë aubi kikiani kuanti ꞌain.

²⁶ Ësai kitankëxun ka Nukën ꞌIbun Moisés ꞌimainun Aarón kakëxa:

²⁷ —¿Uitishi okin karana Israel unikama an ꞌatima ñuishi ꞌati sinánkë ënëkamax ꞌatimati ꞌëmi banakëxun tënëti ꞌain? ꞌËnbi kana ꞌëmia ꞌatimati banaia kuan.

²⁸ Usa ꞌain kamina min kuantankëxun ꞌëx kikë bana ënë atu kati ꞌain: ꞌËx min ꞌIbu ꞌaish kana asérabi ësai kin, usa ꞌixun kana atux kia ꞌën kuakë usaibia ꞌinun atu ꞌimiti ꞌain.

²⁹ Kamabi uni veinte baritiañu aín anë kirikanu ꞌakë axa ꞌë ñui aín sinan xuamatani nishkë akamax ka anu uni ꞌikëma me ënuaxbi maëi këñuti ꞌikën.

³⁰ ꞌAínbi ka Caleb ꞌimainun Josué axëshi raírinëxa ꞌën kakësoi ꞌikëma kupín maëmainun ꞌën ꞌinánuxun ka me anu bëbai kuanti ꞌikën.

³¹ Usai atux ꞌimainun kana uin kara atun bakë bëchikëkama a ñuia abë akanankin ꞌaxuinsa bëtsi unikaman biti ꞌikë kiax kikankë akamax ishi, a ꞌinánuxun ꞌën mitsu kakëxunbimi kuëënkankëma me, anuaxa upitax kuëëni bukukanun ꞌimiti ꞌain.

³² Imimainun kamina mitsux anu uni ꞌikëma me ënu maëi këñuti mitsun nami ënubi chë́kiti ꞌikën,

³³ usa ꞌain ka mitsun bakë bëchikëkamax anu uni ꞌikëma me ënuxun aín ñuina ꞌarakakë bërúai cuarenta baritia ꞌimi niti ꞌikën. Usai ka ꞌën bana kuakëma kupí; mitsux pain anu uni ꞌikëma me ënuax maëi këñutamainun ꞌiti ꞌikën.

³⁴ Mitsun kamina cuarenta nëtë ꞌimikin Canaán kakë me ñachai nian; usaribiti ka cuarenta baritia ꞌimi mitsun bakë bëchikëkama mikaman ꞌucha kupinshi tëmërai niti ꞌikën, achúshi baritia nikë ax ka: achúshi nëtë nikësa ꞌiti ꞌikën. Usai tëmërakin kamina uix kara ꞌë ñui ꞌatimati banaxa ax kara uisai ꞌia kixun ꞌunánti ꞌain.

³⁵ ꞌËx kana min ꞌIbu ꞌaish kin: Usakin kana an ñu ꞌatima ꞌakin timë́xun ꞌë ñuikë unikama ꞌati ꞌain. Usa ꞌaish ka anu uni ꞌikëma me ënuax anúan maëti nëtë ꞌikëbë ka këñuti ꞌikën.

Ax me ñachabëtsini ukë mapai rabë́ an ꞌatimakin sinánkë uni raíri këñua bana

^36-37 Usai ꞌimainun ka Moisésnën me ñachatanun xukëx kuanx uxuan ꞌatimakinra atun bana ñuikëbëa, a kuati sharati tsuákirukë a unikama, Nukën ꞌIbun maënun ꞌimiakëxa.

³⁸ Usaia a unikama ꞌimainun ka Josué ꞌimainun Caleb ax kuni ñuama ꞌikën.

Abë ꞌakanankin Israel unibu abámikin Hormá kakë ëmánuxun ꞌakan bana

³⁹ Usakian Moisésnën Nukën ꞌIbun kakë banakama ñuixunkin kakëx ka Israel unikama masá nuituti nitë́xëakëxa.

⁴⁰ Usai ꞌiónkë pëkarakëma ꞌaínshi nirukianx aín bashi manámi anu kuaruax ka kikankëxa: —¡Ënu kananuna bërí ꞌain! Usa ꞌain kananuna ënuax a me ꞌinánuxuan Nukën ꞌIbun ka a me anu kuanti ꞌain, asérabi kananuna ꞌatima ñu ꞌaí ꞌuchan.

⁴¹ Kikaniabi ka anuax kuanxumashi Moisésnën atu kakëxa: —¿Uisati kaina mitsun Nukën ꞌIbu kakënxunbi kuaisama tanin? ¡Mikaman mi usakin ꞌakatsi kixun sinánkësa okin kamina ñu ꞌatima ꞌain!

⁴² Usa ꞌain kamina abi bana kuakësama obiani kuankantima ꞌain, Nukën ꞌIbu ka mitsubëma ꞌikën. Axa mimi nishkë unikaman ka abámikin mitsu ꞌati ꞌikën.

⁴³ Anun mi kuankanti anuxun ka amalecita ꞌimainun cananeo unikaman, kuania ꞌakanankinuxun mitsu kainia. Usa ꞌaínbi kamina Nukën ꞌIbun kakësokin mitsun ꞌaisamatan, usa ꞌain ka an bërí mitsu ꞌakintima ꞌikën.

⁴⁴ Ësokian Moisésnën kakëxbi ka aín bashi niñu ꞌikë abu kikiani karaisa kuania atu ꞌaia tankatsi kiax bana purábiani ñunshinkiani kuankankëxa; kuankëbëtanbi ka bunántisa okin ꞌakë anua Diosan ñukama purukë a ꞌimainun Moisésnëxribi anua ꞌikankë anuax kuanima bërúakëxa.

⁴⁵ Usai bana purábiani kuaniabi ka amalecita ꞌimainun cananeo unikaman a menu tsókë atun, Israel unibu ꞌakëxa, ꞌakëxa abatia nuibiankin ka Hormá kakë ëmanubi bëbarukin ꞌaisamaira këñutisa okin ꞌakëxa.