Números 13 - Kashibo-Kakataibo Biblia

Moisésnën mapai rabë́ ꞌimainun rabë́ uni Canaán kakë me ñachatanun xuá bana

¹ Achúshi nëtën ka Nukën ꞌIbun Moisés ësokin kakëxa:

² “Israel unibu raíri kamina ꞌën mitsu ꞌinánuxun ka Canaán kakë me a ñachatanun xuti ꞌain. Xukin kamina achúshi achúshi ñakánu ꞌikë aín kushibu xuti ꞌain.”

³ Ësokian kakëxun ka Moisésnën Diosan kakësabiokin a unikama anu uni ꞌikëma me Parán kakë anuxun xuakëxa. A unikamax ka an Israel unibu ꞌakinkë aín kushibukamaishi ꞌiakëxa.

²⁵ Usakin xukëx kuantankëxun ka achúshi ꞌuxë ꞌimainun mapai rabë́ nëtë ꞌimi nikin ñachabëtsini amiribishi anua aín patsan bukukë,

²⁶ Cadés kakë anu uni ꞌikëma me Parán anubi rikuatsiankëxa. Anu ka Moisés, Aarón ꞌimainun kamabi israel unibu ꞌiakëxa. Anu bëbatankëxun ka uisa kara a mekama ꞌiaxa a ꞌimainun an buánkë bimi akama ismianan a menu ꞌikë unibu isbiankë akamabi Moiséskëñun israel unibu ñuixuankëxa.

²⁷ Ñuixunkin ka ësokin Moisés kakëxa: —A ñachatanunmi nu xukë me anu kananuna bëban. Bëbaxun kananuna kamabi isan a mex ka upíira ꞌikën, anuax ka vaca, oveja ꞌimainun carnero kamabi ñuina ax upiti kania, ꞌimainun ka ënë bimikamax a menuxun ꞌapákë ꞌikën.

²⁸ Usa ꞌaínbi ka a menu ꞌikë unikama ax kushiirabu ꞌikën. Aín ëmakamax ka chaiirabu okin upíokin kënëkëbuishi ꞌikën. Usa isanan kananuna Anacnën rëbúnkikamaribi chaiira unibu ꞌaish nu tupumabu nun titikaisamabuira ꞌikë isan.

²⁹ Négueb kakë me sënënakëkë anu ka amalecita unibu tsótia, ꞌimainun ka ain bashi niñu me anu hitita, jebuseo ꞌimainun amorreo, unibu tsómainun ka parúmpapa kuëbí Jordán kakë anu cananeo uniburibi tsótia.

³⁰ Ësakin atun ñuixunia kuati sharákin Moisés ñukai kikania okin ka Caleb kakë uni an kamabi Israel unibu nëtëmikin, ësokin kakëxa: —¡Nun kananuna a mekama atubë ꞌakanantankëxun bitsi kuanti ꞌain! ¡Nux kananuna a unikama tupuma ꞌain, usa ꞌixun kananuna atu ꞌatankëxun aín me biti ꞌain!

³¹ ¡Usai kikankëbëbi ka abëa kuankë uni raíri kiakëxa: —Nux kananuna a unikama ꞌai kuantima ꞌain! Atux ka nu tupumabu kushiirabu ꞌikën.

³² Kianan ka Israel unibu raírinëx a me ꞌatimakin ñui ësairibi kiakëxa: —Nun anu kuanxun isbëtsinkë me ax ka ꞌaisama ꞌikën. Kanan ka anu kuanxunu isbëtsinkë me anuax ka atúxbi ꞌakanani uni bamaia, ꞌimainun ka anu tsókë unikama nu tupumabu nun titikaisamabu ꞌikë kananuna isbëtsian.

³³ Isanan kananuna Anacnën rëbúnkikamaribi chaiira ꞌaish, nun mapë́skaisamabu ꞌikë isan. Usa ꞌain kananuna nux atu rapasunuax champusara ꞌikë atúnribi nu isaxa.