Números 11 - Kashibo-Kakataibo Biblia

Nukën ꞌIbun israel unikama nami ꞌinánuxun ka bana

¹ Achúshi nëtën ka Israel unibu tëmërai Nukën ꞌIbumi ꞌatimai banai kiakëxa. Usai kikania kuati nishkin ka Nukën ꞌIbun atux anu ꞌikë a bëararati tsi rëkirunun ꞌimiakëxa.

² Usai ꞌikëbë sharákin ka unikaman Moisés atua ꞌakinun kixun kakëxa, kakëxun ka Moisésnën Nukën ꞌIbu atu ꞌakinun kixun ñukáxuankëxa. Ñukáxunkëbë ka tsi rëkirukësa ꞌinun ꞌikë ax nëtë́akëxa.

³ Usai anuax ꞌikë ka a me Taberá kakin anëakëxa, anuxun Nukën ꞌIbun atu bëaramikin tsi rëkirumikë ꞌikë.

⁴ Anu ka Israel unikamabë mëskuax kuankë bëtsi menu ꞌikë unikama an pitishi sinánkë unikama atux pain nami pikatsi kia kuati. Israel unikamaxribi tsuákirui nami pikatsi kiax ini sharati kánani kikankëxa: “¡Uinua karanuna a piti nami mërati ꞌai kiax kánani kikankëxa!

⁵ ¡Bëríbi kananuna nun sinanin Egipto menuxunu kupímashi tsatsa pianan! pepinu, santira, cebolla, ꞌimainun ꞌajos, akama kananuna piakën.

⁶ ꞌAínbi kananuna bërí ënuxun bëtsi ñu pikinma namiratsushi pikasmati akëñuma këñútisa tanin.”

⁷ (Maná ax ka ꞌatsa putu iskësa ꞌiakëxa; usa ꞌaish ka panshian bëpinñu ñu bëru iskësaribi ꞌiakëxa,

⁸ ꞌimainun ka harina xënikëñun mëskukësa ꞌikë ꞌunánkëxa. Usa ꞌikë ka manánuax nipakëtia aín ꞌikënuax chikítankëxun bixun unin rëanan chakaxun pëpëkaxun ꞌanan pánsa okin ꞌaxun xuiakëxa.

⁹ Anúan, kuénkuru atux anu ꞌikë anu ꞌibúkë a imë́ ka maná axribi abë ꞌibúakëxa.)

¹⁰ Usa ꞌain ka Moisésnën Israel unikama atux anu ꞌikë aín xëkuënu xëkuënu nitsax aín aintsikamabëbi sharati ini kikania kuakëxa. Usaia ami katamëtima ꞌikania kuati ka Nukën ꞌIbu atumi nishakëxa. ꞌImainun ka Moisésnëxribi atux usai ꞌikankë a kuëëanma ꞌikën,

¹¹ kuëënkima ka Nukën ꞌIbu kakëxa: —¿Uisoti kaina ꞌëx min uni ꞌikëbi ꞌë ꞌatima oin? ¿Uisa kaina min ënë unikaman ꞌapu ꞌimixunbi ꞌë oisatanin?

¹² ¿ꞌËx aín papa ꞌianan aín tita ꞌixun karana atu ꞌikúxun tuáxura ꞌakësokin aín chaitiokëkama ꞌinankatsimi kia me anu buánti ꞌain?

¹³ ¿Uinua karana ënë unikama piminuxun nami biti ꞌain? Ënë unikaman ka ꞌë nami ꞌinánun kikin kaia.

¹⁴ ꞌËn kana ënë unikama ꞌaisamaira ꞌikë ꞌëratsushi ꞌixun buankasmati ꞌain; ax ka ꞌënan tëira ꞌiti ꞌikën.

¹⁵ Ësokin ꞌaisatankin kamina, ꞌë bamatanun ënti ꞌain, asérabi min nuibakin kamina usakin ꞌë ꞌati ꞌain. Usakinmi ꞌakëx kana ꞌitsaira nuibakatima ꞌain.

¹⁶ Kiabi ka Nukën ꞌIbun ësokin kakëxa: —ꞌË kamina setenta Israel unikama aín kushibu min ꞌunánkë timë́xun, xubusa okin chupa ꞌakë anuax ꞌëbë banati anu bëxun kaínti ꞌain.

¹⁷ Anu ubútankëx kana ꞌëx mibë anuax banati ꞌain, ꞌimainun kana mi ꞌinánkë ꞌën kushi usaribi atu ꞌinánti ꞌain, ꞌinánkëxun ka atúnribi ënë unikama buánti isti mi ꞌakinti ꞌikën. Usa ꞌain kamina atun ꞌakinkëx mixi nuibakatima ꞌain.

¹⁸ ꞌAtankëxun kamina a unikama imë́ishi, nami pinúxa mëníokanun kati ꞌain. ꞌËn kana inia ësai atux kia kuan ¡Uinua karanuna a piti nami biti ꞌain! ¡Egipto menuax kananuna asábi ꞌiakën! Usai kia kuax ka Dios ësai kiakëxa, asábi ka ꞌën kana a piti nami atu ꞌinánti ꞌain,

¹⁹ ꞌinánkin kana achúshi nëtë, rabë́ nëtë, mapai achúshi nëtë, mapai rabë́ nëtë ꞌimainun mapai rabë́ ꞌimainun mëkën rabë́ nëtëra atun piti nami ꞌinántima ꞌain.

²⁰ Usokin ꞌinánkëxun ka unikaman achúshi ꞌuxë ꞌimikin nami piti ꞌikën, a nami pikëxuan aín rëkinanbi chikíkin namin tënankëx ami kuinsati anábukin istisamatankin ka timati ꞌikën, atúnbi ka ꞌën ꞌakinkëxunbi Nukën ꞌIbu ka nubë ꞌikë kixun sinanima ꞌën kuamainunbi ꞌatimati banai ini kikanxa: ¿Uisakatsi karanuna Egipto menuax chikían?

²¹ Usa ꞌain ka Moisésnën Dios kakëxa: —Axa ꞌëbë ukë unikama ax ka seiscientos mil uni ꞌaish ꞌaisamaira ꞌikën. ¿Usa ꞌaínbi karamina mix ꞌën kana achúshi ꞌuxë ꞌimikin piti nami ꞌinánti ꞌain kiax kin?

²² ¿Uinu kara ꞌaisamaira oveja ꞌimainun vacakama nun kamabi unibëtan sënë́ntanun rëti a ꞌik? Nun tsatsa parúmpapanu ꞌikë, kamabi bixun ꞌinánkëxi ka atubëtan sënë́nma ꞌiti ꞌikën.

²³ Ësai kiabi ka Nukën ꞌIbun kakëxa: —¿Min sinánkëx kara ꞌën kushi chamaratsu ꞌik? Bërí kamina asérabi kara ꞌëx kikësabi oi ꞌia kara ꞌima kixun isti ꞌain.

Setenta ꞌain kushibunëxa Diosan aín bana ñuixunti kaískë uni ꞌikësaribiti bana

²⁴ Usakian kakëx anuax chikixun ka Moisésnën kamabi uni usakin Nukën ꞌIbun kakë banakama ñuikin kakëxa, kanan ka setenta Israel uni aín kushibu aribi xubusa okin ꞌakë rapasu sëtëankëxa.

²⁵ Usai kuin nëbë́tsin ubuax ka Nukën ꞌIbu Moisésbë banakëxa; banatankëxun ka Moisés ꞌinánkë aín kushi chukúmashi bitankëxun setenta unikama aturibi aín kushi chukumashiñu ꞌinun ꞌimiakëxa. Usakian ain kushi ꞌinánkëxun an Dios kikë bana uni ñuixunkë kamasa ꞌixun bana ñuixuankëxa; ꞌaínbi ka amiribishi usai ꞌitëkëanma ꞌikën.

²⁶ Anu ka setenta unikama anua kaískë Eldad ꞌimainun Medad kakin anëkë uni rabë́ ꞌiakëxa, ꞌaínbi ka xubusa okin chupa ꞌakë anu kuanima ain ꞌikënubi tikiakëxa. Anu ꞌaínbia, atunuribi aín kushi chukúmashi ꞌiruan ka an ꞌamikëxun raírinën ꞌakësaribi okin anu ꞌikë unikama an Dios kikë bana unikaman ꞌakësaribi okin bana ñuixuankëxa.

²⁷ Usokian ꞌakëbë abákiani kuanxun ka achúshi tuákën Moisés kakëxa: —¡Eldad ꞌimainun Medadnën ka an Dios kikë bana uni ñuixunkëkaman ꞌakësa okin anua ꞌikankë anuxun bana ñuixunia kixun kakëxa!

²⁸ Usokian kaia kuakin ka Josué, Nunnën bëchikë bënáxuinshi ꞌakinia ax kanikë an Moisés kakëxa: —¡Diosan uni Moisés min, kamina usakian ꞌakanun ꞌamitima ꞌain!

²⁹ Kiabi ka Moisésnën kakëxa: —¿ꞌËn usakin ñu ꞌati kuëënima kaina usai kin? ¡ꞌËn kana kuëënin Nukën ꞌIbun ain bëru ñunshin ꞌinánkëx ka kamabi unix an aín bana ñuikë unikamasaribi ꞌiti ꞌikën!

³⁰ Usai ꞌitankëx ka Moisés ꞌimainun Israel unibunën kushibu atux anu ꞌikënu kuankëxa.

Nukën ꞌIbun ꞌumpánxonënmë ꞌëo ꞌinan ñuikë bana

³¹ Ësokin kakin Nukën ꞌIbun Moisés sënë́on ka aín sinanën parúmpapanuax bëkikin suñun ꞌumpánxonënmë ꞌëo anua Israel unibu ꞌikë atun xubu rapasu rërëkibunun ꞌimiakëxa, ꞌimikëx ka ꞌaisamaira ꞌaish achúshi metro manansa ꞌiakëxa, usa ꞌaish ka achúshi nëtën bain kuankëbëtan sënën ꞌiakëxa.

³² Usa ꞌikë ka nëtën bibaikin imë́ribi binë́kinbi a pëkarakëbëtanribi ꞌumpanxónnëmë ꞌëo unikaman biakëxa. Bikin ka mapai rabë́ sënë́onkin kamaxunbi bukunkin biakëxa, usokin bitankëxun ka mëníoxun atún ꞌikë rapasubi ëskitanun bariónkankëxa.

³³ Aínbi ka ꞌumpanxónnëmë ꞌëo nami pikin Israel unibunën sënë́onkë ꞌaímabi amia ꞌatimai banakankë kupín atu Nukën ꞌIbun këñumikin ꞌitsaira masókëxa.

³⁴ Usaia anuax ꞌikë ka a me Quibrot-hataavá kakin anëakëxa, anua an pitishi sinánkë unikama maínkë kupín.

³⁵ Maínbiani Quibrot-hataavá kakë anuax kuantankëx ka Haserot kakë me anu pain i bërukankëxa.