Nehemías 9 - Kashibo-Kakataibo Biblia

Esdras Israelkama atun ꞌuchakë chikínati ñui kia bana

¹ A ꞌuxënbia veinticuatro nëtë ꞌikëbë ka anun Israel unikamax añu ñubi pima samanux timë́tëkënkankëxa; usai ꞌikin chupa xënikama pañuanan me bitankëx atun maxkánu anun matakakiakëxa;

² usai ꞌikin ka bëtsi menu ꞌikë unikama atubëa ukë a pain, amo sëtë́natankëxun, atun ꞌuchakama chikinanan atun chaitiokëkama ꞌucha akamaribi sinánkin Dios ñukákankëxa.

³ Usakin ꞌai ka anua nikë anubi rabë́ ꞌimainun achúshi hora anua sëtë́kankë anuxunbi kamabi unían kuanun a tanti bana Diosan kuënëomia a isia kuati anubi sëtëkankëxa, usai ꞌitankëxun ka amiribishi rabë́ ꞌimainun achúshi hora basitëkënkin atun ꞌucha chikinakin Dios rabikankëxa.

⁴ Usai ꞌian ka levita unikama Josué, Binuy, Cadmiel, Sebanías Binui, Serebías, Baní ꞌimainun Quenaní akamax anuax banati ꞌakë anu këñuruxun munuma banakin Diosan bana ñuiakëxa;

⁵ usokin ꞌatankëxun ka levita unikama Josué, Cadmiel, Binuy, Hasabnía, Serebías, Hodía, Sebanías ꞌimainun Petahía akaman kakëxa: “Chairukin kamina Nukën ꞌIbu Dios rabikanti ꞌain. ¡Ax ka kushiira ꞌikë, usa ꞌain ka xënibua ꞌaínbi aín anë upíokin sinánxunkin rabikë ꞌiti ꞌikën!”

⁶ Ësokin unikama katankëxun ka Esdrasnën Dios ësokin kakëxa: “Mixmi Dios ira ꞌain ka misaribi Dios uixi ꞌitima ꞌikën. Min kamina naíkamë ꞌëo ꞌanan a manámia ꞌikë ñukama këñun anu ꞌikë ꞌispakamaribi uniokën; ꞌanan kamina meribi ꞌatankëxun anu ꞌikë ñukamaribi ꞌakën, ꞌatankëxun kamina parúmpapanu ꞌikë ñukamaribi ꞌakën. Usa ꞌain ka min ꞌimikëx kamabi ñukamax upiti tsotia. Usa ꞌikë ka min ángel naínu ꞌikë kaman rabimainun menuxunribi mi rabiti ꞌikën.

⁷ Usa ꞌain ka anu ꞌikë ꞌispakamanribi mi rabia, Dios min kamina min uni ꞌiminuxun Abraham kaisakën usa ꞌixun kamina Ur kakë caldeokaman, ëma anua chikíntankëxun Abraham kakin minbi anëakën.

⁸ Min iskëx ka ax achúshi uni mimira sinani katamëkë ꞌiakëxa, usa ꞌixun kamina abëtan achúshi ñu ꞌakinmi min rëbúnkikama kana anua cananeos unibu ꞌimainun hititas, amorreos, ferezeos, jebuseos ꞌimainun gergeseos; ¡a unikaman me ꞌinánuxun ꞌai kixunmi kásabiokin ꞌakën, min kamina asérabi mix kikësabiokin ñu ꞌain!

⁹ Min kamina uisai kara nun chaitiokëkama Egipto menuax tëmëraia kixun isakën, usa ꞌixun kamina parúmpapa xónsa kakë a kuëbínuxuan atun mi ñukákëxun kuakën.

¹⁰ ꞌImainun kamina min kushi ismikin faraón ꞌimainun an ñu ꞌaxunkë unikama ꞌimainun kamabi unikama aín menu tsókë akama ismikin ñu chaiirabu ꞌakën, min kamina uisakin kara atun Israel unikama tëmëramia kixun ꞌunánkën. Usa ꞌixun kamina bërámami ꞌása okinbi mix kamina kushiira ꞌai kixun unin ꞌunánun bëríbi ñu ꞌain.

¹¹ ꞌImainun kamina atun ismainunbi parúmpapa panarabëtanun ꞌimiakën, usakin ꞌimikëbëa me rakati ëskikëbë ka a nëbë́tsinën atux sikarakëakëxa ꞌaínbi kamina axa atu nuibëtsini ukë unikama bakan këñunun ꞌimiakën, ꞌimikëx ka maxáx ꞌikësaishi nanëti bakami kikankëxa.

¹² Usakin ꞌanan kamina a isiania min unikama kuanti nëtën kuin ꞌimianan imë́ribi tsi rëkirukësa ꞌixuan anun kuanti pë́kanun ꞌimiakën, ꞌimikëxuan anúan kuanti a pë́kakëbë ka anun atux kuankëxa.

¹³ Usokin ꞌatankëxun kamina aín bashi Sinaí kakë, anuax nun chaitiokëkamabë naínuaxëshi banakin min bana upíirabu a ꞌunámikin asérabi a tanti banakama ꞌimainun ax kikësabi oi ꞌiti akama upíokian ꞌunánun min banakama ꞌinánkën.

¹⁴ ꞌInánkin kamina uisai kara sábado nëtë ꞌikëbë tantiti ꞌikë aribi ꞌunámianan a tanti banakama asérabia min uni Moisésnën upíokin ꞌunánminun ꞌamiakën.

¹⁵ ꞌImainun kamina naínu ꞌikë pán ꞌakëñuma ꞌixuan pinun ꞌinánan ꞌumpaxribi maparanua shióbutia shimaxun xëanun ꞌinánkën. Usokin pain ꞌatankëxun kamina a ꞌinánkatsi kixunmi nun chaitiokëkama ká me a bitsia anu kuanun atu ꞌimiakën.

¹⁶ ꞌAínbi ka nun chaitiokëkama usakin kamina ñu ꞌati ꞌai kakëxun kuatima ꞌianan, min banakama kikësokin ꞌama ꞌikën.

¹⁷ Usai ꞌikin ka min kakëxun kuaisama tanan minmi chaiira ñu atu ꞌaxuan abi sinánkama ꞌikën. Usai ꞌikin ka min bana kuaisama tankin achúshi ꞌapu an isa anuaxa tëmërakë Egipto me anubi uantëkënun kixun anëakëxa. ꞌAínbi kamina mix Dios an ꞌuchaiabi uni nuibakë a ꞌixun uisabi okinma, nuibairakin ꞌatimokinma ꞌakinkin ñu ꞌatima ꞌaiabi atu ëanma ꞌain.

¹⁸ ꞌImainun ka atúnbi sinánxun vaca bakë tankin achúshi ñu a rabinuxun manë charóxun ꞌakëxa, ꞌatankëx ka ënëx ka nun dios an Egipto menua chikínbëtsinkin nu bëkë a ꞌikë kiax kikankëxa, usakin atun ñu ꞌakë ax ka ꞌaisamaira ñua ꞌakë ꞌiakëxa,

¹⁹ usai ꞌiabi kamina min atu nuibakin, anu uni ꞌikëma menuxun uisa kara nitsia usai ꞌitánun ënkinma ꞌakiankën. Usokinmi ꞌakinkëbë ka nëtë kuinsa ax atu ënima nëtënbi a isbiania kuankanun rëkuë́nkiankëxa, ꞌimainun kamina imë́ribia tsi rëkirukësa ꞌixun anun kuankanun pë́kati ꞌimiakën.

²⁰ Usa ꞌain kamina min atu ꞌakinkin uisai kara tsóti ꞌikë min kushin ꞌunamikin uínsaranbi ënkinma atun piti maná ꞌinánan shimakian xëati ꞌumpax aribi ꞌinánkën.

²¹ ꞌInánkin kamina cuarenta baritia anu uni ꞌikëma menu nitsia atun piti panax nikinma pinun ꞌinánkën, usakinmi ꞌakëx ka uínsaranbi ain piti ñuñuma ꞌima ꞌikankëxa: ꞌianan ka atun pañuti chupabi chë́kima ꞌianan, ꞌitsaira nikëbëbi atun taëbi paë ꞌuatimabi ꞌikankëxa.

²² ꞌImainun kamina bëtsi bëtsi me anua ꞌapu ꞌikë ꞌimainun ëmakama bitankëxun achúshi achúshi uni atunan ꞌinun ꞌinánkën, usokin ꞌinánkëxun ka atun Hesbón kakë me anua ꞌikë ꞌapu Sihón aín me ꞌimainun Basán kakë me anua ꞌikë ꞌapu Og aín meribi bikankëxa.

²³ Usonan kamina atúxa ꞌitsaira bëchipati naínua imë́ ꞌispa iskësa ꞌitanua bakë bëchipanun ꞌimianan, atunan ꞌinun a ꞌinánnuxumi nun chaitiokëkama ká me a bitsi kuanun minbi a menu kuanun atu buánkën.

²⁴ Usakin ꞌimikëxun ka atun Canaán kakë me anu kuanxun bikankëxa; bikëbëtan kamina minbi anu ꞌikë unikama atu uisabi oxunma ꞌanun ꞌimiakën, ꞌimia ka atun ꞌapukama këñunbi atu ꞌurama ꞌikë unikama uisokin kara ꞌaisa tania usakin ꞌakankëxa.

²⁵ ꞌAkin ka ëmakama upíokian kënëarakama a ꞌimainun me upíbu anu ñu ꞌapákëxa upiti kookë ꞌimainun atun xubu anua ñu upíirabu bukúnkë a ꞌianan anua atun ꞌumpax biti me kinikë upíirabu a ꞌianan atun uvas ꞌapákë a ꞌianan olivos ꞌimainun raíri i bimi an tuákë akama bikankëxa; bitankëx ka a menu upíokin puchákin pi xuati atun kuëënkësa oi ꞌi tsókankëxa.

²⁶ Usokinmi min ꞌakinkëxbi ka min kakësokinshi ꞌaíma a tanti bana kuaisama tani ꞌikankëxa. ꞌAnan ka an min bana ñuikë unikamaribi, mimia sinánun kakëxunbi kuaisatankin, kamaxunbi kuamainun mimisa ꞌatimai banaxa kixun këmëkin ꞌuchoxun rëkankëxa.

²⁷ Usakin ꞌaia kamina axa ami nishkë unikama tëmëraminun ꞌinánkën. Usakin ꞌakian tëmëramikëxun tankin ka atun min ꞌakinun kixun mi ñukákëxa, ñukákëxun nuibakin kamina naínuxunbi atun bana kuakin; an ꞌatimokë unikamanua an chikínti unikama bariakën.

²⁸ Usakinmi ꞌakinkëx upiti tsótankëxi ka amiribishi ꞌatima ñu ꞌai atux mimi ꞌuchatëkëankëxa; usai ꞌia kamina axa ami nishkë unikaman ꞌatimonun ëankën, ënia ka atun an kuëënkësokin ꞌakankëxa. Usakin ꞌakëxun ka minmi ꞌakinun kixun amiribishi mi ñukátëkëankëxa, ñukákëxun kamina ꞌitsaira nuibakin naínuxunbi atun bana kuakin, ënkinmaira ꞌitsa okin atu ꞌakiankën.

²⁹ Usokin ꞌanan kamina a tanti bana amiribishi ax kikësabi okían ꞌanun atu kakën; ꞌaínbi ka a banakama isa ꞌunánxa kikin atun min banakama kikësokinbi ꞌama ꞌikën; uin kara min bana kikësabiokin ꞌaia ax ka upitax tsóti ꞌiakëxa, usa ꞌaínbi ka min bana kikësabiokin ꞌakinma ꞌatimakin ꞌakëxa usakin ꞌaika atux a bana kuaisamatani ax kuëënkësa ꞌoíshi ꞌiakëxa.

³⁰ Usaia ꞌitsa baritia ꞌiabi kamina atu munu nuibakin min bëru ñunshin ꞌimainun; an min bana ñuikë unikaman usai kamina tëmërakanuxun ꞌai kixun kakëxa, kakëxunbi kuaisama tankën, usai ꞌia kana ami nishkë unikama bëtsi menu ꞌikë unikaman atu ꞌatimonun ëankën.

³¹ Usai ꞌiabi kamina min ꞌitsaira nuibakin kamabi atu këñuananbi manukin ëanma ꞌain; usa ꞌaish kamina mix nuibanairakë Dios a ꞌain.

³² Mix kamina chaiira ꞌianan Dios kushiira ꞌain ꞌimainun ka kamabi unix mimi rakuë́tia, usa ꞌaish kamina Dios ñu ꞌakatsi kiax kana ꞌaima kikínma an ñu asérabi ꞌakë a ꞌain, ꞌimainun kamina uínsaranbi nu nuibakin ënkëma ꞌain, minbi kamina isan uitishi kara nun ꞌapukama ꞌimainun ain kushikama ꞌianan, nun sacerdote ꞌimainun an min bana ñuikë unikamabë nun chaitiokëkama ꞌiásaribiti tëmëraia, a nëtëkaman Asiria ꞌapun aín suntárukamabëtan ꞌakëxnu ꞌia usaibi kananuna bëríbi tëmërai ꞌin.

³³ ꞌAínbi kamina nuxnu nun ñu ꞌatima ꞌakë kupí usa ñukama ꞌinúkëbëbi uisa karamina mix ꞌain usabi kamabi ñu ꞌinúkëbë ꞌin; min kamina upíokin ñu ꞌain, ꞌaínbi kananuna nukama ꞌatimakin ñu ꞌai mimi ꞌuchakën.

³⁴ Usa ꞌaínbi ka nun ꞌapukama ꞌimainun aín kushikama ꞌianan sacerdotekama, ꞌimainun nun chaitiokë kamanbi ka min bana a tanti bana kikësokinbi ꞌama ꞌikën.

³⁵ ꞌAima ꞌianan ka anua atun ꞌapubë tsókë me anuxunbi min ꞌitsaira ꞌakinkë a sinánkin mi rabiama ꞌikën, ꞌianan ka atun ñu ꞌatima ꞌakëkama ëinsamatankin ñu ꞌatimashi ꞌakankëxa.

³⁶ Usa ꞌain kamina nukamami sinánti ꞌain, bërí kananuna bëtsi unikaman ñu mëmikë uni ꞌain, usa ꞌaish kananuna nun chaitiokëkamami anu ñu ꞌapáxun bimia pia bukunun ꞌinan me ënu uni itsin ñu mëëmikë ꞌain.

³⁷ Usa ꞌain ka ꞌaisamaira ñu ꞌapákëxa bimikë ax ꞌapukamananshi ꞌikën, minbi kamina nun ꞌucha kupían atun usakin nu ꞌanun ëan. Usa ꞌain ka nukama ꞌimainun nun ꞌarakakë vaca atun kuëënkësa okin ꞌaia. Usakin nun ñu ꞌakëbë kananuna a sinani ꞌitsaira masá nuituti tëmërain.”

Israel unikaman a tanti bana kikësa okinshi ꞌakatsi kia ñuikë bana

³⁸ Usa ꞌain kananuna kamabi ënë ñukama inuti nux tëmëran, usa ꞌixun kananuna bërí Nukën ꞌIbu Diosan bana kikësa okinshi ënkinma kirikanu kuënëoti, ꞌamianan anun atun ñu takáshkakë anua nun ꞌapukamabëtan Levitas unikama ꞌimainun sacerdotekaman ꞌanun ꞌamiti ꞌain.