Nehemías 8 - Kashibo-Kakataibo Biblia

Esdras uni timë́kë ꞌain a tanti bana kuënëo isi kia bana

¹ Usa ꞌain ka kamabi ëmanu ꞌikë unikama plaza, anun ꞌumpaxnu atsínti xëpúti a puntëbi ꞌikë anu timë́akëxa, anuxun ka an ñu ꞌinánkë uni Esdras a usai Israel unibu ꞌitia Diosan Moisés kuënëomia banakama a bënun kakankëxa.

² Anúan mapai achúshi ꞌimainun rabë́ ꞌuxë ax achúshi nëtë ꞌitabati ꞌirukë anun ka sacerdote Esdrasnën anúan usai Israel unikama ꞌiti kuënëo a kirikanua kuënëo bana kamabi unibëbia xanukama ꞌimainun tuá xumabu an bana kuakë akamanbia uisai kara kia kuati bëakëxa;

³ bëkë ax ka pëkarakëma ꞌaínshi ꞌapunkin bari manímikin kamabi unikama axa plaza anun ꞌumpaxnu kuanti xëpúti puntë, anu timë́kë atun kuati ꞌiakëxa. Usa ꞌain ka kamabi unikama timë́kë an usai ꞌitia kuënëo bana isi kia uisaibi ꞌikinma timë́xun kuakankëxa.

⁴ ꞌImainun ka an ñu ꞌunánmikë Esdras ax anuxun a kirika istia i tapuakin ꞌakë anu nikë ꞌiakëxa. ꞌImainun ka a rapasu Matatías, Sema, Anías, Urías, Hilquías ꞌimainun Maaseías akama ꞌiakëxa. ꞌImainun ka a mëkeuribi Pedaías Misael, Malquías, Hasum, Hasbadana, Zacarías ꞌimainun Mesulam akamaribi anu sëtë́kë ꞌiakëxa.

⁵ Usa ꞌain ka Esdrasnën kamabi unikama timë́kë atun ismainunbi, atun kamaxunbi istisabi ꞌinun manámi nixun kirika isi ki bananuxun bákakëxa; bákakëbë ka kamabi unikama timë́kë ax nirukankëxa.

⁶ Usakin ꞌatankëxun ka Esdrasnën Dios kamabi kushiñu a rabiakëxa, ꞌimainun ka kamabi unikama timë́kë atun ka mëkën manámi oi mëshpati kikankëxa: “Asábi ka asábi ka.” Usakin ꞌatankëx aín bëmánanën me tikai tsóbukin ka Dios rabikankëxa.

⁷ Rabimainun ka levita unikama Josué, Baní, Serebías, Jamín, Acub, Sabtai, Hodía, Maaseía, Quelitá, Azarías, Jozabed, Hanán ꞌimainun Pelaías ënë unikaman ka uisai kikë kara a bana ꞌikë kixun kuakanun ñuixuankëxa. Usakin ñuixumainun ka a unikama ax anubi sëtë́kë ꞌiakëxa,

⁸ usaía anubi sëtë́kankë ꞌain ka munuma banakin a tanti bana Diosan kakëxun kuënëo isi kia, raírinën uisai kara a banakama kia kixuan ꞌunánun unikama upiokinra ñuixuankëxa.

⁹ Usakin a banakama ñuixunkin këñuia kuatia ꞌitsaira masá nuituti inia ka kamabi unikama timë́kë a an bana mëníokë ꞌapukama ꞌimainun Nehemías, an ñu ꞌinánkë unikama sacerdote Esdras ꞌimainun Levitas an unikama timë́kë a uisai kikë kara a bana ꞌikë kixun ñuixunkë a kaman kamabi unikama kakëxa, mitsux kamina masá sinani nitë́xëti intima ꞌain, ënë nëtëx ka anun Dios rabiti nëtë ꞌikën.

¹⁰ Kanan ka ësakinribi Esdrasnën kakëxa: “Mitsun ꞌikënu rikianxun kamina upíokin ꞌaxun pianan uvas baka vino bataira ꞌitánun ꞌakë a xëanan ui kamax kara ñuñuma ꞌixun aín piti ꞌakëma ꞌikë akama kuëntankëxun pikianan xëakinti ꞌain, bërí ka achúshi nëtë anun Dios rabiti nëtë ꞌikën. Usa ꞌain kamina masá nuitukinma Diosan ka nukama ꞌakinti ꞌikë kixun sinánkanti ꞌain.”

¹¹ Usakian Esdrasnën kakëx inkaniabi ka Levitas unikamanribi kamina ꞌaisamaira masá nuituti inkantima ꞌain kixun kakëxa, bërí ka masá nuitukinma anun nun ꞌIbu Dios rabiti nëtë ꞌikë kixun ka atu kakëxa.

¹² Usakin kakëx chuámarua tani kuëëni rikianxun piananbi xëakin axa pitiñumakama aribi kuënxun pikianan xëakikin fiesta chaiira atun ꞌakëxa, upíokian atu bana ñuixunkë a kuatankëx kuëënkin ka usakin ꞌakankëxa.

Anun ꞌuta ꞌatankëx anu ꞌiti nëtë ꞌikëbëtan fiesta ꞌakan ñuikë bana

¹³ Usakin ꞌaxun ka anunbi a nëtë nuikin ónkë a pë́karakë ꞌain ka kamabi aín aintsi kushikama ꞌimainun sacerdotekama ꞌianan Levitas unikamaribi ꞌimainun an ñu ꞌunánkë Esdras abë timë́xun, uisai kara a tanti banakama anubi aín sënë́nkënua ꞌikë bana ax kara uisaira kia upiokin ꞌunánkatsi timë́kankëxa,

¹⁴ timë́xun kuakëxbi ka kirikanua Diosan usakin kuënëonun kakëxuan Moisésnën kuënëo bana ax kara uisai kia kuakatsi timë́kankëxa, kamabi Israel unikamax ka timëkamë ꞌëoxun fiesta ꞌai ꞌuta ꞌatankëx mapai achúshi ꞌimainun rabë́ ꞌuxë ꞌikëbë anu ꞌiti ꞌikë kiax kikë bana kirikanua kuënëo ꞌikë mërakëxa.

¹⁵ Mëraxun ka ëma kamanu chanionan Jerusalén ëmanuribi bana ñuiakëxa, ñuikëbë ka a bana kuati kamabi unikamax ninu ꞌikë olivos pëi ꞌimainun i pëñanakëkë aín pëi ꞌimainun xëbin pëi akamakëñun bëtsi i pëikamaribi kuënëo bana kikësabiokin ꞌuta ꞌati bitsi tsuákirukankëxa.

¹⁶ Tsuákirukiani kuanxun ka i pëi bitsínkin bëxun atun ꞌutabi ꞌutabi ꞌakin xubu manámi ꞌanan me mëníokënu, ꞌanan anuxun Dios rabiti xubunu me mëníokë anun niti anuribi ꞌanan anun ꞌumpax ꞌikënu kuanti xëpúti bëtánain ꞌikë plaza anubi ꞌanan Efraínën plaza kakënu anun atsínti xëpúti a puntë anuribi ꞌakëxa.

¹⁷ Usa ꞌain ka kamabi uni axa bëtsi menu buan ꞌaish utëkënkë unikama atúxribi ꞌuta ꞌatankëx anu ꞌikankëxa, usakin ka Nunnën bakë bëchikë Josué an ꞌamikëxun ishi ꞌa ꞌixun ëan ꞌixunbi ꞌakëxa. Usai ka ꞌaíma ꞌi në́a ꞌixun, ꞌai a unikamax ꞌitsaira kuëënkankëxa.

¹⁸ Usaia fiesta ꞌai kamabi uni timë́kë ꞌain ka Esdrasnën anúan timëkankë a nëtën pëuëxanxun mapai achúshi ꞌimainun rabë́ nëtë sënë́nmikin a tanti Diosan bana kuënëo a isakëxa; ꞌimainun ka usakin ꞌatankëx usabi okin ꞌati kikësabiokin ꞌai, achúshi nëtë ꞌimitëkëni anúnribi timëkamë ꞌëotëkëankëxa.