Nehemías 4 - Kashibo-Kakataibo Biblia

Jerusalén ëma kënëkin ꞌatëkënkëbë ami nishkë unikama atumi kuai kia bana

¹ Amiribishinu Jerusalén ëma rurupa aín kënë ꞌatëkënia kuati ka a kuëënima, Sambalat numi kuaianan ꞌaisamairai judíos unikamami nishi pëukuti,

² abëa ꞌikë unikama ꞌimainun Samarianu ꞌikë suntárukamax ësai kiakëxa: “¿Atux añu ꞌixun kara judíos unikama numin bamai bukukë ꞌixunbi usakin ñu ꞌatëkënkatsi kiti ꞌik? ¿Atun kara amiribishi anuxun atun Dios rabitëkënkin ñuina xaroti sinánkanin? ¿ꞌImainun kara atun achúshi nëtën ishi kananuna ñu mëëkin këñuti ꞌain kixun sinánkanin? ¿Atun kara xaró ꞌaísh bukukë anua maxá upíbu amiribishi bitëkënti sinánkanin?”

³ Usai kia a ꞌurama ꞌikë uni kuati ka Tobías, amonita uni axribi ësai kiakëxa: “Ka kuat, atun ka anun ëma kënëara a birutëkënia: ¡ꞌaínbi ka kapa ꞌinu achúshinëxa anu ꞌirukëbë rurukubutisa ꞌikën!”

Nehemíasnën Dios ñuká bana

⁴ Ësaia atux kikëa ñuikania kuakin kana Dios ñukákin ësokin kakën: “Nukën ꞌIbu Dios: bëtsi unikamaxa numi kuai kikë a kamina kuati ꞌain. Atúxa numi kuai kikë ax ka usaía atúxbi ꞌiti ꞌikën, usa ꞌain kamina axa atumi nishkë bëtsi unikaman aín menu buántanun ꞌamiti ꞌain.

⁵ Usa ꞌain kamina atun ñu ꞌatima ꞌakëkama a tërënxunkin atun ꞌuchakëkama manutima ꞌain, atun ka anun ëma kënëara a ꞌatëkënkin mënionbi nu chichakin ñuia.”

Anun ëma kënëara ꞌatëkënia ꞌakatsi kixun ami nishkë unikaman sinán bana

⁶ Usai kikëbëtanbi kananuna a tankima anun ëma kënëara ꞌikëbia rëupakan a pëuxun aín manámi nëbëtsi sënë́onkin ꞌakën. ꞌAkin ka unikaman ꞌatibi sinánxun kuëënkin ꞌakankëxa.

⁷ ꞌAínbi ka Sambalat, Tobías a ꞌianan árabe unikama ꞌianan Amónnu ꞌikë unikama a ꞌimainun Asdodnu ꞌikë unikama atúnribi anun Jerusalén bëarara kënë kananuna aín kinikama bëtasbiankin ꞌatëkëni kixun kuati ꞌitsaira nishakëxa,

⁸ usai ꞌikin ka timë́xun a kamaxunbi Jerusalén kananuna amiribishi atu ëmikin ꞌatima otëkënti ꞌai kixun sinánkankëxa.

⁹ Usa ꞌain kananuna Nukën ꞌIbu Dios pain ñukátankëxun, atúan tëiabi nu uxun ꞌatima kupí, nëtën ꞌanan imë́ribi nu bërúanti suntárukama nankën.

¹⁰ Usakin pëuxun ꞌakëbëbi ka Judánu ꞌikë unikamax kiakëxa: “Anun ëma kënëara ꞌikëbia rëupatëkënkan maxáx ax ka ꞌaisamaira ꞌikën, usa ꞌain ka an papikëkama kushiñuma ꞌaish bënainsa tania, usai ꞌikëbëtan karanuna uisaxun amiribishi anun ëma kënëara a ꞌatëkënkin nukaman sënë́oinsa ꞌain.”

¹¹ Usakinnu ꞌamainun ka axa numi nishkë unikaman sinánkëxa, nun isanuna ꞌunanima, usa ꞌainsa atun nukama atsínxun ꞌakin nun tëëti ꞌaxuma ꞌanun rakamiti ꞌikë kixun.

¹² Usakin sinani nu ꞌakatsi kia kuati ka atu ꞌurama ꞌikë Judíos uni raírinën uxun nu bëtsin kakë ꞌikëbi an kuakë raíri unikamanribi nu manonkin kakëxa, a unikaman ka amami amamiax ukin bëarabuinxun nu ꞌaisatania,

¹³ usakin ñuixunkëxun kana ꞌën unikama atun aintsibë aintsibë mëníokaxun anun ꞌakánanti manë xëtokë ꞌimainun masíbun aín kanti akama bitankëxuan, anun ëma kënëara kaxú aín kini tanainuxun, bërúanun kixun ꞌamiakën.

¹⁴ Usai anun ꞌakánanti biaxi rakuë́tia kana nirukin, aín sinan mëninshi unikama ꞌianan an ëmanuxun bana mëníokë unikama ꞌimainun raíri unikama ësokin kakën: “Nux kananuna atumi rakuë́tima ꞌain. Rakuë́kinma kamina mitsun sinánti ꞌain Dios ax kushiira ꞌianan chaiira ꞌixun ka atu rakuëmiti ꞌikën, ꞌimainun ka an mitsun bakë bëchikë bëbukama ꞌianan ꞌini bëchikë xanukama ꞌimainun mitsun xanukama këñunbi mitsun ëma upí ꞌinun bërúanti ꞌikën.”

¹⁵ Usai nu ꞌakatsikia kuati mëníokakë ꞌain ka axa numi nishkë unikamax asérabi ka nu Diosan atun ꞌakinia, usa ꞌain kananuna nun sinánkësokin ꞌatima ꞌai, atux kikëbëtan kananuna abi nun tëëti ënkinma ꞌakën.

¹⁶ Usakin ꞌakin kana a nëtënbi, axa tëëti ꞌën unikama atiribi an ñu mëëti ꞌimianan, atiribi an mëníokaxun anun ꞌakánanti manë xëtokë, ꞌianan ami katamëti manë parókë a ꞌimainun kanti iru, ꞌianan ñuina xaká ꞌakë chupa akama pañuxuan bërúanun ꞌamiakën. Usakin ꞌaia ka anu ꞌikë ꞌapukaman Judánu ꞌikë unikama kamabi,

¹⁷ anun ëma kënëara ꞌikëbia rurupa ꞌikëa an kënë ꞌatëkënkë unikama atu ꞌakiankëxa. Usakin ꞌakinkëx tëkin ka an ñu papikë unikamanan ënkinma papikinbi, aín mëkën amotanribi anúan atu ꞌanux aia ꞌati aín manë pia xëtokë tuínxun ñu mëëkankëxa.

¹⁸ Usa ꞌain ka kamabi uni axa anun ëma bëarara kënë ꞌaia tëkë unikama atux aín manë xëtokë tsiñukin tëkërëkax, usai ꞌimainun ka an manë banañu banoti anëkëkama atux ꞌë rapasubi ꞌikankëxa,

¹⁹ ꞌën kana ësokin aín sinan mëninshi unikama ꞌianan an ëmanuxun bana mëníokë ꞌapukama kanan uni raíri ësokin kakë ꞌiakën: Anunu tëkë ënëx ka chaiira ꞌaish bëríra ꞌabuinkinshi sënëoinsama ꞌikën, usa ꞌain kananuna uni aín patsan raírinën amoxun ꞌamainun raírinënribi amoxun ꞌai, bëtsi ꞌura ꞌura ꞌiruax tëi ënanankë ꞌian.

²⁰ Usa ꞌain kamina anumi tëkankë anuxunbi pakon bana ꞌoia kuati bënëtishi nubëbi timë́kanti ꞌain, usai nux ꞌikëbë ka nun Dios ax nubë ꞌiti ꞌikën.

²¹ Ësai tëi nux bari urukëma ꞌaínshi ꞌipuni bari kuantamainun tëmainun ka ꞌati uníxribi ain manë xëtokë tuínxun nun ñu mëia bërúankëxa.

²² ꞌImainun kana ësokinribi kamabi uni ax tëkë ꞌimainun an ꞌakinkë kamaribi kakën, kamabi mitsux kamina Jerusalén mëu ënubi imë́ nëtën ishi tënux ënananima bëruanani ꞌikanti ꞌain.

²³ Usai ꞌi kana ꞌëx, ꞌën ꞌaintsikama ꞌianan, an tëia ꞌakinkë unikama ꞌimainun an bërúankë unikama axa ꞌë rapasu ꞌikë, akamabëtanbi kana chupa pëax ꞌuxkinma kamaxunbi manë xëtokë tuínxun bërúankë.