Nehemías 2 - Kashibo-Kakataibo Biblia

Artajerjes ꞌapun Nehemías Jerusalénnu kuantanun xuá ñuikë bana

¹ Usa ꞌixun kana Marzo ꞌuxë këñutia Abril ꞌuxë ꞌirukë anun achúshi nëtë ꞌikëbëtan anua veinte baritia ꞌapu ꞌikë anun, kana ꞌën uvas baka buánxun masá nuitukë ꞌaish bëtsi sinánkëshi ꞌixun aín xëati ꞌinánkëxun iskin,

² ka ꞌapun ꞌë ñukákëxa: —ꞌËn iskëx kamina ꞌitsaira masá nuituti nitë́xëkësa ꞌain. ¿Uisai kaina ꞌian? ꞌËn iskëx kamina ꞌinsínkëmabi ꞌain, bëtsi ñu ꞌinúkë ꞌixun sapi kamina a sinanin. Usakian ꞌë ñukákë anun kana ꞌitsaira rakuëan,

³ usai ꞌikin kana ꞌapu ësokin kakën: —¡Mix ꞌapu ꞌaish kamina ꞌitsa baritia buini tsóti ꞌain! ¿Uisa ꞌaish karana ꞌëx ꞌën aintsikama anu maían ëma axa rurupakë ꞌimainun aín xëpútikama axribi në́nkëxa rurukubua ꞌain nitë́xëtima ꞌiti ꞌain?

⁴ Kakëxun ka —¿Añu karana mi ꞌaxúnti ꞌain? —kixun ꞌapun ñukákin ꞌë kakëxa. Usakin kakëx Dios naínu ꞌikë abë pain banatankëxun kana,

⁵ ꞌapu kakën: —Mix ꞌapu ꞌikë ꞌën ñu ꞌaxúnkëxun ꞌë upí uni ꞌikë ñu ꞌaxúntisa tankin kamina Judá menu kuantankëxun anua ꞌën aintsikama maínkan ëma ꞌikëbia rurupakin masókan a mëníotëkënuxun istánun ꞌë xuti ꞌain.

⁶ Ësakin ꞌapu kaia kuakin ka a rapasu tsókë xanu ꞌapu anribi ꞌë ñukákëxa: —¿Uiti nëtë kara anumi kuanti basiti ꞌik? ¿ꞌImainun kaina uínsaran utëkënti ꞌain? Kixun ñukákëxun ati nëtë kana basiti ꞌai kixun kakëxun ka ꞌë asabika kamina kuanti ꞌai kixun kakëxa.

⁷ Usokian ꞌë kakëxun kana ësaribiokin kakën, ꞌëx anu kuanti kuëënkin kamina achúshi kirika kuënëoxun Éufrates kakë baka amia bari kuabúkë ꞌukëmanan ꞌikë ꞌapukamama Judá menu kuani atun men kuania ꞌë inumima, usa ꞌain ꞌinabiantanun ꞌë ꞌaxúnti ꞌain kixun kakën;

⁸ ꞌimainun kana ësokinribi kakën bëtsi kirikaribi kamina ꞌë an ni bërúanti ꞌapun nankë Asaf a ꞌëa i anun ëmanu atsínti xëpútikama anuxun Dios rabiti xubu ꞌikë ꞌurama ꞌikëkama a mëníonan, anun ëma kënëarakë kënë ꞌikëbia rurupakin masókan a mëniomianan anu ꞌëx ꞌiti xuburibi ꞌaminun ꞌinánun kirika kuënëoxunti ꞌain. Usakin kakëxun ka ꞌapun ꞌën ñukákësabi okin kamabi ꞌë ꞌaxuankëxa ꞌën Diosanbia ꞌë ꞌakinia.

⁹ Usakin kakëxua ꞌë kirika ꞌinánkëx kana kuankën, kuanxun kana Éufrates ꞌukëmanan ꞌikë ꞌapukama a, ꞌapúan buámikë kirika kuënëokë a ꞌinánkën, ꞌimainun ka ꞌapun ꞌëbëa kuanun suntárunën kushikama ꞌimainun caballonuax ꞌakánanti ꞌunánkë unikamaribi xuakëxa.

¹⁰ ꞌAínbi ka ꞌëx anu bëbakë kuati ka Sambalat Horónnu ꞌikë a ꞌimainun Tobías amonitakaman ꞌapu israel unikama an ꞌakinsatankë unikama ka atunu bëbaxa kixun ñuikania kuati kuëënima ꞌitsaira nishakëxa.

Nehemíasnën Jerusalén anun kënëara kënë a kananuna ꞌatëkënti ꞌai kixun unikama ká bana

¹¹ Jerusalénnu bëbatankëx kana. Achúshi ꞌimainun rabë́ nëtën anu tantiakën,

¹² tanti tankëx kana imë́ ꞌitsama unibëshi uisakin karana Jerusalén ꞌati ꞌai kixun Diosan ꞌë kakë a ñuikin uibi kaima kuankën. Kuankin kana ꞌëx anun nikë burro ashi uankin raíri anun kuanti burrokaman uánma ꞌain.

¹³ A imë́bi kana ꞌëx ami me sapan ꞌikë xëkuë ami kikiani kuantankëx amia ꞌumpax manánuax xobuti timë́kë Dragón kakë a ꞌimainun anu ñu puti kuanti xëpúti ami kikiani kuainakëkin, Jerusalén anun kënëara kënë a rurupakan a isanan kana aín xëkuë në́nkan akamaribi isakën.

¹⁴ Usakin amia pain istánkëx kana anuaxa baka xobukë a ꞌimainun ꞌapun amia ꞌumpax ꞌikë ami kiribi kuankin isakën; ꞌaínbi ka anun ꞌëx kuankë burro ax anun inútisama ꞌiakëxa.

¹⁵ Usa ꞌain kana a ꞌimë́bi pëkaratisama ꞌaínshi, xëxá buarukin isanan, anun ëma bëararakin kënëa, akama istánkëx, kana amiribishi anun me sapan kianxa bashi ꞌirukë anun atsínkë xëkuë anunbi utëkëankën.

¹⁶ Usai ꞌëx nitsiabi ka anu ꞌikë ꞌapukaman uinu karana ꞌëx kuani ꞌunánan añu ꞌai karana nitsi kixunbi ꞌunánma ꞌikën. Usai ꞌi nikinbi kana ꞌën judíos uni sacerdotekama ꞌianan, uni upí sinánñu akama kanan ꞌapukamaribi kakëmapan ꞌianan uni raíri atúxribia ñu mëëti ꞌakëbë anu tëëti unikama abi káma ꞌain.

¹⁷ Kaxumabi kana ꞌën pain istankëxun atu kakën: —Mitsúnbi kamina upíokin ꞌunanin, nux kananuna ꞌaisamaira ñu inuti tëmërain, Jerusalén ëma ënëx ka anun kënëa akama rurupanan aín xëpútikamaribi në́nkan ꞌaish ꞌaisama ꞌikën. Usa ꞌain kananuna anun Jerusalén ëma kënëara ꞌikëa rurupakan ënënu mëníotëkënun kamáxbi timë́kanti ꞌain, numima unikama kuaia usa ꞌain kananuna mëníotëkënti ꞌain.

¹⁸ Usa ꞌain kana Diosan ꞌë upíokin ꞌakinkë a ñuixuanan usakian ꞌapun ꞌë kakë a banakamaribi ñuixuankën, ñuixunkëxun ka atúnribi ësokin ꞌë kakankëxa: —¡Asabi ka usa ꞌain kananuna kamaxunbi amiribishi ënë ëma kënëtëkënti ꞌain! Usai ki ka kamaxunbi kananuna ꞌati ꞌai kiax kuëëni bëtsibë bëtsibë kánani kikankëxa.

¹⁹ ꞌAínbi ka usakinu ꞌati a banakama kuati Sambalat Horónnu ꞌikë a ꞌimainun, Tobías amonita unikama an ꞌakinkë a ꞌimainun Guésem árabe unikaman kushi akamax nukamami kuai nu istisama tani kiakëxa: —¿Añura ꞌixun kara atun usakin ñu ꞌatëkëinsatanin? ¿Atun kara ꞌapumi kuaiti sinánkin usakin ñu ꞌaisatanin?

²⁰ Kixun kakëxunbi kana ꞌënribi ësakin kakën: —Dios naínu ꞌikë an ka usakinu nukaman ꞌatëkënun nu ꞌamiti ꞌikën. Nukamax aín uni ꞌixun kananuna an nu ꞌakinkëxun amiribishi nun ëma aín kënë ꞌatëkënkin taëoti ꞌain, usakin nukaman ꞌakëbëbi kamina mitsux a ñui uisaibi kikantima ꞌain, Jerusalén ꞌia a kamina mitsun uisaxunbi sinántima ꞌain.