Nehemías 1 - Kashibo-Kakataibo Biblia

Nehemíasnën aín aintsi Jerusalénnu ꞌikë Dios ñukáxuan ñuikë bana

¹ Ënëx ka Nehemías Hacalías kakë uni aín bakë bëchikë usai ꞌia ñuikë bana ꞌikën. Veinte baritia Artajerjes ꞌapu ꞌikë anúan noviembre ꞌuxë këñuti diciembre ꞌuxë ꞌirukë anun kana Nehemías ꞌaish ꞌëx, Susa kakë ëma anu ꞌiakën,

² anu ꞌaínbi ka ꞌën xukë́n Hananí ax uni raíri Judánuax ukëbë abë uax ënu bëbakëxa. Bëbakë kana uisa kara Jerusalén ꞌikë kixun ñukánan anu ꞌikë Judíos unikama axa Babilonianu kuanima bërúkëkama atúxribi kara uisa ꞌikë kixun ñukákën.

³ Ñukákëxunbi ka ësokin ꞌë kakëxa: “Axa Babilonianu kuanima Jerusalén ëmanubi bërúkë unikama ax ka bërí bëtsi bëtsi ñu inuti ꞌaisamaira tëmërai ñuñuma ꞌain atumi uni kuaikëbë rabinkë ꞌikën. Usaia atux ꞌimainun ka Jerusalén ëma anun kënëa axribi rurupakë ꞌimainun aín xëpútikama axribi në́nkëxuan tsin këñukëx rurukubua ꞌikën.”

⁴ Ësokin ꞌë kakëxun a banakama kuatankëx kana tsótax iankën uiti nëtë ꞌitsaira masánuituti ꞌiakën, usai ꞌi pikëmëanan abë banakin kana naínu ꞌikë Nukën ꞌIbu Dios ñukákën.

⁵ Ñukákin kana ësokin kakën: “Nun ꞌIbu Dios naínu ꞌikë mix kamina chaiira ꞌianan ax rakuënmianankë a ꞌain, usa ꞌixun kamina mix kia bana kikësabiokin ꞌanan uin kara min bana kikësabiokin ꞌaia akama nuibatin;

⁶ ꞌën mi ñukákëxun kamina bërí kuati ꞌain, imë́ ꞌimainun nëtën kana min uni Israel unikama mi ñukáxunin. ꞌËnbi kana ꞌunanin Israel uni nukamax kananuna mimi ꞌuchan; ¡ꞌën aintsi ꞌibu kamabëbi kana ꞌëxribi mimi ꞌuchakën!

⁷ Nukaman kananuna min ismainunbi ñu ꞌatimaira ꞌakën; ꞌakin kananuna a tanti banakama ꞌimainun ax kikësa okin ꞌati banakama, min uni Moisésmi ꞌinan min bana ax kikësabiokin ꞌakëma ꞌain.

⁸ Usa ꞌain kamina bërí sinánti ꞌain, min uni Moisés mi ësokin ka bana a, ꞌuchaia kana mitsu bëtsi bëtsi menu kuani abístanun xuti ꞌai kixun;

⁹ ꞌaínbi kamina ësokinribi kakën, mitsun mi ꞌëmi sinanakin ꞌën bana kikësabiokin ꞌatëkënkin a tania kana uinu ꞌikë menu kara bëtsi unikaman buánkëxa anuabi mi timë́nun ꞌimitëkënkin, uinu karana anuxun ꞌë rabiti xubu ꞌati ꞌën kaisakë anubi mitsu bëtëkënti ꞌain.

¹⁰ Nukamax kananuna min kaisa ꞌaish min uni ꞌain, usa ꞌikë kamina atu min kushínbi chikínbëtsinkin Egipto menua bëakën.

¹¹ Dios ꞌën mi ñukákëxun kamina kuati ꞌain, ꞌimainun kamina min unikaman ñukákëxunribi kuati ꞌain, usa ꞌain kamina an mishi rabitisa tankë unikaman ñukákëxun kuati ꞌain. ꞌImainun kana ësokinribi mi ñukatin ꞌapuan ꞌën kakëxun ꞌëmi upíokin sinánkin ꞌakinun kamina sinánmiti ꞌain.”