Miqueas 6 - Kashibo-Kakataibo Biblia

Israel unikamax an kakësama okin ꞌai Diosmi ꞌucha ñuikë bana

¹ Mitsun kamina bërí uisokin kara Diosan mitsu kaia kixun kuati ꞌain: ¡Usa ꞌain kamina nirutankëx bashikama ꞌimainun matá me kaman min bana kuanun mixribi kiti ꞌain!

² Bashikama ꞌimainun an me tuinkë akaman ka kuati ꞌikën: Nukën ꞌIbu ka aín unikama ꞌatima oti sinania, usa ꞌaish ka Israel unikamami nishia.

³ Ësai ka Nukën ꞌIbu kia: Israel unikama mitsun kamina ꞌë kati ꞌain. ¿Uisa onan karana añu ꞌaxunkin mi ubion?

⁴ ꞌËn kana mitsun chaitiokëma Egipto menuxun tëmërakin ñu mëëiabi chikiankën; usokin ꞌanan kana Moisés këñun, Aarón ꞌimainun María, an atu ꞌakinun xuakën.

⁵ ꞌËn unikama bërí kamina sinánkanti ꞌain uisakin kara Balac Moabnu ꞌikë ꞌapu an sinánkëxa kixun, ꞌimainun kara Balaam Beornën bakë bëchikë an uisakin ribi a kamiakëxa kixun. ꞌImainun kamina Sitimnuax, Guilgalnu kuania kara Diosan mitsun ꞌunánun uisokëxa kixun aribi sinánkanti ꞌain.

Nukën ꞌIbun aín unikaman kara uisakin ñu ꞌaxunia kixun kainkë ñuikë bana

⁶ ¿Uisa ñu uani kuanxun karanuna, Nukën ꞌIbu Dios manámi ꞌikë a rabiti ꞌain? ¿ꞌIanan karana vaca bakë achúshi baritiañukama ꞌaímai këñutanu xaroxunti ꞌain?

⁷ ¿ꞌËn mil carnero ꞌinánanbi, xëxá ꞌumpax iskësaira xëniribi ꞌinánkëx kara Nukën ꞌIbu kuëënti ꞌit? ¿ꞌIanan karana ꞌën ꞌatima ñu ꞌai ꞌuchakë kupín ꞌë a tërënxunun ꞌën bakë bëchikë apan ꞌinánuxun ñukati ꞌain?

⁸ Ënë ñukama ꞌaxunti ka Dios kuëënima, an ka nukama kaxa uisa ñux kara upí ꞌikën, ꞌimainun uisa ñu nun ꞌaxunti kara ax kuëënia: ax ka ësa ꞌikën, bëtsi unikamabë upí ꞌiti, uisa ñu ꞌakatsi karanuna kia usakinbi ꞌati, ꞌimainun an kakësabiokin ꞌanan ax kikësabiokin ñu ꞌati.