Miqueas 5 - Kashibo-Kakataibo Biblia

Davidtan rëbúnki achúshi Belénnu ꞌapu ꞌiti ñuikë bana

¹ Jerusalénnu bukukë mitsun kamina amimi mitsux katamëkanti ëma kënëarakin ꞌakánti ꞌain, nuka chikítisama okin bëararakanxa, usakin ꞌaxun ka Israelnu ꞌikë ꞌapukama a ꞌaisamaira okin tëmëramiti ꞌikën.

² ꞌAínbi kana: Belén Efrata, mi Judánu ꞌikë ëmakamanu ꞌikë ëma chukúma anuax achúshi uni Israel unikaman ꞌapu ꞌinux chikiti ꞌikën, ax ka uni achúshi bërámaira ax tsóa aín rëbúnki ꞌiti ꞌikën.

³ Usa ꞌain ka bërí Diosan aín unikama ënia, ꞌaínbi ka xanun aín tuá achúshi bakënuxun kainkë usa ꞌiti ꞌikën. Usa ꞌain ka a tuá aín aintsi Israelkama ñatanbiankin buánkama abë birananti ꞌikën.

⁴ Usa ꞌain ka a ꞌapu aín unikama bërúankin ꞌakinun aín kushi ꞌinánti ꞌikën, usakin ꞌakëx ka a unikama upiti tsóti ꞌikën, usakin ꞌakëbë ka Diosan ꞌakë ñu chaiira ax kamabi menuxun ꞌunánkë ꞌiti ꞌikën.

⁵ An ka kamabi uníxa upiti tsónun ꞌimiti ꞌikën. Uínsaran kara asirio unikama nun menu bëbai nun ꞌapun xubukamanu atsinia, anun ka a ꞌapunbi mapai achúshi ꞌimainun rabë́ aín kushibu a këñun mapai ꞌimainun rabë́këñun achúshi ꞌapukama atu ꞌanun xuti ꞌikën.

⁶ Usa ꞌain ka Asiria unikaman nun menu bëbaxun nu bibiankin atun menu ñatanbiankin buankësokin buánkë ꞌain, nun kushikama ꞌimainun aín suntárukaman anua ꞌakanankë ñukama anun atu ꞌaxun atunua nu chikínti ꞌikën. Usakin ꞌatankëx ka nun kushikama atux Asiria me anua Nimrod ꞌapu ꞌia anubi ꞌapu ꞌiti ꞌikën.

Diosan axa atumi nishkë unikama këñunun Israel unikama ꞌamia ñuikë bana

⁷ Usa ꞌain ka Israel unikamax bëtsi bëtsi ëmanu ꞌikë unikamasamaira ꞌaish, nibí ꞌimainun ꞌuí Diosan menu ꞌibúmikëxua, xubi komikë usaribikin ka unixa usai ꞌiti ꞌikë kixun sinánkë ꞌaímabi ꞌiti ꞌikën.

⁸ Usa ꞌain ka bëtsi ëmakama nëbë́tsia bërúkë, Jacobnën rëbúnkikama ax achúshi paru ꞌinúansa ꞌaish raëkë ñuinakama nëbëtsi ꞌianan, paru ꞌinúan achúshi anua ovejakama ꞌarakakë anu ꞌikësa ꞌiti ꞌikën, usa ꞌain ka inúkinshi bixun aín ꞌuntsisan tukapakë usaribi ꞌiti ꞌikën, usakin ꞌakin ka achúshinëxi abati ꞌiakëtanun ëntima ꞌikën.

⁹ Usakin kamina mix Dios ꞌixun kamabi axa mimi nishkë unikama këñuti ꞌain.

ꞌApun ꞌakanantima bana nankin a rabikë ñukamaribi këñuti kia bana

¹⁰ Ësai ka Dios kia: A nëtë ꞌikëbëtan kana min caballokama këñukin ꞌanan anuax ꞌakanankë caballonën nirinkëkama aribi masókin këñuti ꞌain.

¹¹ ꞌAnan kana min ëmakamaribi ꞌatimokin masónan anuan min ëma kënëarakama aribi rurupati ꞌain;

¹² usakin ꞌanan kana minua ꞌikë ñubë́ unikama nëtënun ꞌimiti ꞌain, ꞌimianan kana an ñu tankë unikama aribi minu ꞌaíma ꞌinun ꞌimiti ꞌain;

¹³ usotankëxun kana min rabikëñukama ꞌimainun maxákama diosmabi rabikë akamaribi masóti ꞌain, usakin ꞌaia kamima uínsaranbi mitsúnbi ꞌa ñukama a rabitëkëntima ꞌain.

¹⁴ ꞌIanan kana min i upíirabu akamaribi ëchianan, aín ëmakamaribi ꞌaíma ꞌitánun këñuti ꞌain.

¹⁵ ꞌËx ꞌitsaira nishkin kana, axa ꞌëmi sinántisama tankë, ꞌën kakëxun kuaisamatankë unikama uisokin karana ꞌaisatani usokin ꞌati ꞌai kiax ka Dios kiakëxa.