Miqueas 4 - Kashibo-Kakataibo Biblia

Anúan Nukën ꞌIbun kamabi menua aín unikama upiti tsónun ꞌimiti ñuikë bana

¹ ꞌItsa baritia inúkëbë ka anun usai ꞌiti nëtëkama ꞌikëbë, anuxun Nukën ꞌIbu rabiti xubu anu ꞌikë bashi ax uínbi uisabi oisama ꞌiti ꞌikën. Usa ꞌaish ka a bashi manan ꞌaish; bëtsi bashi kamasamaira manainra ꞌiti ꞌikën. Usa ꞌain ka kamabi ëmanu ꞌikë unikama anu ꞌuti ꞌikën;

² ai ka ꞌaisamaira uni ëmakamanuaxa ukë ax bëbai ësai kikanti ꞌikën: Anua Nukën ꞌIbun bashi ꞌikë anu kuaruti kamina ukanti ꞌain, anu ka anuxun Dios rabiti xubu anuxuan Israel unikaman rabikë a ꞌikën, an ka anuxun uisai karanuna ꞌiti ꞌai a nu ꞌunánmiti ꞌikën, usakin ꞌakëx kananuna upiti niti ꞌain. Usa ꞌain ka Siónnuxun Nukën ꞌIbu kikë bana a unin ꞌunánmiti ꞌikën, ꞌimainun ka Jerusalénnuxun aín bana ꞌain unikaman ñuiti ꞌikën.

³ Usa ꞌain ka Nukën ꞌIbun bëtsi bëtsi menu tsókë unikama uix kara ꞌuchaxa kixun istankëxun uisa kara okatsia usakin ꞌati ꞌikën, ꞌakin ka ꞌura men tsókë unikama ꞌakanankë a mëníoxunti ꞌikën. Usakin ꞌakëxun ka atúnbi atun manë xëtokëkama a anun me tukati ꞌanan, ꞌain paka piakama anun ñu bimi biti tëntuñu ꞌitánun xëtokin ꞌati ꞌikën. Usa ꞌain ka uinu ꞌikë ëmanu ꞌikë unínbi anun bëtsibë ꞌakánanti sinánxun amiribishi anuan ꞌakanankë a bitëkëntima ꞌikën, ꞌianan ka uínbi usai ꞌakánanti ka kixun bëtsi ꞌunánmitëkëntima ꞌikën.

⁴ Usa ꞌain ka kamabi uni rakuë́tima ꞌianan, upí tani atun ꞌapákë ꞌapákënu uvas ꞌimainun higueranën tupëonkënu tantikanti ꞌikën. ¡Ax ka Nukën ꞌIbu kamabi kushiñu aín banabi ꞌikën!

⁵ Bëtsi ëmanu ꞌikë unikaman ka atun diosbi rabia, ꞌaínbi kananuna nukaman Nukën ꞌIbu Diosan kakësokinshi ꞌati ꞌain.

Nukën ꞌIbun ꞌain unikama ië́miti ñuikë bana

^6-7 Ësai ka Nukën ꞌIbu asérabi kia. A nëtën kana an ñuina ꞌarakakë unían aín ñuinakama timëkësa okin, bëtsi bëtsi menu buánxun tëmëramikë unikama a timëti ꞌain: usokin kana ami nishkian tantimikëmax atsanxa abískëkama ꞌain. Akama ꞌimainun axa bamakëma abi timë́xun kana, achúshi ëma kushiira ꞌinun ꞌimiti ꞌain. Usakin ꞌakin kana ꞌëx Dios ꞌixun ꞌën unikama aín bashi Sión kakë anuxun ꞌa ꞌixun, bëríbi ënkinma abi ꞌakinti ꞌain.

⁸ ꞌImainun kamina Jerusalén mix anuxun ñuina bërúanti torre ꞌakë ꞌimainun, ami katamëti ꞌakë usaribi Siónan ꞌiti ꞌain, usa ꞌain kamina mix amiribishi bëráma ꞌikësai ëma chaiira ꞌitëkënti ꞌain, usai ꞌikamina bërámami ꞌiásabi chaiira ꞌiti ꞌain.

⁹ Bërí kaina, ¿Uisa kupín ꞌain tuákën paëokëx xanu bënë́kë usaribiti ꞌi kuënkëni bënë́kanin? ¿Mitsunu kara ꞌapu ꞌaíma ꞌik? ¿ꞌIanan kara an mitsu ꞌësëkin bana ñuixunkë unikama ñuax?

¹⁰ Kuënkëni katsati ka Sión ëmanu tsókë unikama ꞌiti ꞌikën, usai ꞌika achúshi xanu bakënun ꞌain tuákën paëokëx ꞌikësai ꞌiti ꞌikën, usa ꞌain ka minuax chikíkiani kuani unikama ëman ꞌiti ꞌikën, usai ꞌikiani kuani ka unikama Babilonia menu bëbakanti ꞌikën. ꞌAínbi ka anuabi Nukën ꞌIbun aín unikama; ië́mikin axa atumi nishkë unikamanuabi bëtëkënti ꞌikën.

¹¹ Usa ꞌain ka bërí bëtsi bëtsi menu ꞌikë unikama mi ꞌanux timë́ax mimi banai ësai kikania: ¡Nukamax kananuna Jerusalén masókin rurupakë isi kuëëntisa tanin!

¹² ꞌAínbi ka a unikaman uisakin atu ꞌati sinánxun, kara Diosan mëníoxa a ꞌunanima; usa ꞌaínbi ka an atu timëkin trigo bimi nëatankëxun anuxun tákatinu nanxun tákakë usaribiokin, atu timënuxun ꞌaia kixun ꞌunanima.

¹³ ¡Jerusalénnu bukukë unikama mitsun kamina kuantankëxun axa mimi nishkë unikama ꞌatima okin tëmëramikin vaca bënëa trigo aín bimi rëukutanun aín taën chakakë usaribi okin ꞌai kuanti ꞌain! Usakin ꞌanun ka Dios kia usa ꞌain: ꞌËn kana vaca bënë achúshinën kushisa ꞌinun ꞌimianan aín manchankama aribi manë tunánsa iruira ꞌimianan aín ꞌuntsískamaribi manë panshian ꞌakësa ꞌixun kamabi ëmakama ꞌatima oti ꞌamiti ain, usakin ꞌatankëxun kamina min atun ñu kupíkëkama a bitankëxun ꞌënan ꞌinun ꞌimiti ꞌain, ꞌëx kana mitsun ꞌIbu kamabi men ꞌIbu a ꞌain.