Miqueas 3 - Kashibo-Kakataibo Biblia

Uisai kara ꞌatimakin ñu ꞌakë ꞌapukamax ꞌiti ꞌikë kixun ñuikë bana

¹ Bërí kamina an bana mëníokë ꞌapukama ꞌimainun, Israel unikaman kushibu mitsun ësai kia küakanti ꞌain, ¿mitsun mi ꞌunántima kara unin ñu ꞌatima ꞌaia mëníoxunti ax ꞌik?

² Usa ꞌaínbi kamina ñu upí ꞌati kuëënkinma ꞌatima ñuishi upisa ax ꞌikë kixun ꞌati kuëënin; mitsun kamina ꞌën kaískë unikama ꞌatimaira okin aín namishi bianan ñuina xo rakánkë usokinshi ꞌakanin.

³ Mitsun kamina ꞌën unikama unima ꞌikë ꞌakësokin ꞌakin; aín bëxi tukapanan aín xokama tëkënpakësokin ꞌanan; ñuina nami ñutënu ꞌaruti tëapakësa usakin ꞌakanin.

⁴ Achúshi nëtën kamina mitsun Dios ꞌakinun kixun kati ꞌain, ꞌaínbi ka mitsun ñukákëxun an kuatima ꞌikën. A nëtën ka Dios mitsumi unë́kësa ꞌiti ꞌikën ñu ꞌatimaira ꞌaimi ami ꞌuchakankë ꞌain.

Dios kikë bana ñuikë ꞌixunbi këmëkin bana ñuikë unikama ñui kikë bana

⁵ Ësai ka Dios an aín unikama këmëkin bana ñuixunkë unikama ñui kiaxa, a unikamax ka upiti kananuna bukuti ꞌai kiax mitsun piti ꞌinánkëxun pi kia, ꞌaínbi ka uin kara piti ꞌinanima a unikama ꞌakánanti ka ꞌiti ꞌikë kixun kaia. Usa ꞌain ka an bana ñuikë unikama a Diosan ësakin kaia:

⁶ An bana ñuikë mitsun kamina namákësokin imë istëkentima ꞌain, bari kuabuti bëankikë ꞌain iskamakësa usaribi okin, ꞌianan kamina ñukama kara ꞌiti ꞌikë kixunbi bëan bëánkibukë anuxunbi ꞌunántima ꞌain. ꞌImainun ka an paránkinshi uni bana ñuixunkë unikamanribi raíri unin ꞌakësaribi okin bari xupinbutankëxa imë́ naëx ꞌain bëánkibukë ꞌaínbi añu ñubi iskëma usaribi okin añubi istima ꞌain.

⁷ An uni paránkinshi bana ñuixunkëkama ꞌimainun an ñu tankë unikama atux ka ami kuaikian unikaman ñuikëx ꞌitsaira katë́kë bërúkanti ꞌikën. Kamabi atux ka uisa banarabi banaima nëtë́këshi Diosan atun kakëxunbi kuaisama tankëbë ꞌiti ꞌikën.

⁸ ꞌAínbi ka Diosan an kakësabiokin ꞌaia aín bëru ñunshinan ꞌakinkëx ꞌëx kushiñu ꞌianan rakuëma uni ꞌixun atu ꞌakinun ꞌë ꞌimiaxa, usa ꞌixun kana atu bana ñuixunkin Dios ax ka kushiira ꞌikë kixun Israel unikama kanan atux ami ꞌuchakian an kuëënkëma ñuishi ꞌakë akama kati asábi ꞌain.

Jerusalén ëma ka Diosan ꞌamikëxun axa aminishkë unikaman masóti ꞌikë kixun ñuikë bana

⁹ Bërí ka an bana mëníokë ꞌapukama ꞌimainun Israel unikaman kushibu an ënë bana kuati ꞌikën, mitsun kamina upí ñu ꞌati a kuëënkinma ꞌatima ñuishi ꞌakin usakin ñu ꞌati kikë bana ax kikësokin ꞌakaniman,

¹⁰ usa ꞌixunbi kamina Sión kakë bashi anua ꞌikë, Jerusalén ëma, uni ꞌakin upíokin ñu ꞌakëma ꞌixunbi ꞌatima ñuira ꞌakinbi birutëkënkanin.

¹¹ Axa Jerusalén ëmanu ꞌikë an bana mëníokë unikama an ka uin kara kupíoia a ëanan an kupíokë a ꞌatima oti sinania, ꞌimainun ka sacerdotekaman kupíokëxunshi uni ꞌunánmiti kuëënia, ꞌianan ka an Dios kikë bana ñuikë unikamanribi kuríki kupíshi abi sinántankëx ësai kia: Nukën ꞌIbu ka nubë ꞌikën usa ꞌixun ka ñu ꞌatima inútima rabanan Nukën ꞌIbun nu bërúaia.

¹² Usa ꞌain kana mitsun ꞌuchakë kupí Jerusalén ëma Sión kakë bashinua ꞌikë a ꞌën bërí ꞌakintima ꞌain, achúshi me anu ñu ꞌapátisama ꞌikë ꞌakësokin, usakin ꞌakëx ka maxax ꞌaisamaira bukunrukësa usaribi ꞌiti ꞌikën ꞌimainun ka anuxun Dios rabiti xubunua ꞌikë me anu ꞌaisamaira xubi muxañu uniti ꞌikën, mitsun mi ñunshinakëkin ꞌatima ñuira ꞌai ꞌuchakë ꞌain.